Read gitonga Genesi 23 Bible Online

Genesi 23 - gitonga bible

Genesi 23

¹Sara vbanyide lizana ni magumavili na livbandre na mivili (127) myaga. Khugo ogu gulapha nya matshigu nya guvbanye gwaye.

²Fude nari tigoni ga Kiriyati-Araba, muhuno gu ranwago pwani Hebroni, tigoni ga Khanani. Abrahama a di gira gililo nya gulile Sara.

³Abrahama a di khuga vbale gi nga bani gi romo girumbi gya mwangadzi waye, aya ganela ni Vahiti, khuye:

⁴“Eni nyi muwuyi ni pfhumba vbakari gwanu; nyi dzumeleni nyi renga wulanga wangu tigoni gwanu, gasi nyi gira lithowo nyi kodza gu dzinga mwangadzi wangu.”[14]

⁵Vahiti va di hakha Abrahama, khavo:

⁶“Hipwe gwadi pfhumu yangu: Uwe u muthu wa Nungungulu vbakari gwathu. Hatha eli nya ladi ngudzu vbakari nya marowo yathu, u dzinga umo mwangadzi[15] wago. Vbakari gwathu mwalo a kodzago gu guma lithowo laye gasi uya dzinga umo mwangadzi wago.”

⁷Abrahama a di khuga a ema, a noga mbeli ga vathu va tigoni mule ni mbeli ga sanana nya Vahiti,

⁸a ganela, khuye: “Mwa gu dzumela gukhenu nyi dzinga mwangadzi wangu avba, nyi pweleni wuhindzi mu ya nyi lombelani ga Efroni, mwamana wa Zowari,

⁹a nyi rengisela khu tengo nya lisine liphala la giwindrini gya Makipela gi lumbago uye, li guromo tshokatunu nya gipeto gyaye, gasi nyi khala eni mune nya lithowo lile.”

¹⁰Uye Efroni wurumba waye, a di romo vbale na khade vbakari ga Vahiti. Efroni Muhiti a di hakha Abrahama, na gu pwidwa khu Vahiti ni vatshavbo va nga bani va gu bela khu nyangwa nya lidhoropa lawe, khuye:

¹¹“Ahihi, pfhumu yangu! Nyipwe gwadi: Eni nyi ngu gu ninga gipandre gyogyo ni liphala li guromo umo. Nyi ngu gu ninga isoso mbeli ga vathu vangu; dzinga mwangadzi wago.”

¹²Khavbo avbo, Abrahama a di noga mbeli ga vathu va tigoni,

¹³a ganela ga Efroni khu lito nya gukhugege gasi gu pwidwa khu vatshavbo, khuye: “Nyi ngu lomba u nyipwe, nyi na gu ninga tengo nya gipeto, dzumela u hakha, khavbo nyi na dzingago mwangadzi wangu.”

¹⁴Efroni a di hakha Abrahama, khuye:

¹⁵“Pfhumu yangu, nyipwe. Giphaso muni gi na manegago ga eni ni uwe khu gipandre nya gurengwe khu tengo nya mazana mana sipimo nya parata? Dzinga mwangadzi wago umomo.”

¹⁶Abrahama a di dzumela tengo wu nga vegwago khu Efroni, a di pima gikaloni, na gu wonwa khu Vahiti, tengo nya parata wu nga ganedwago nya mazana mana sipimo nya parata khu dzitsapawu dza tigoni mule.

¹⁷Gipeto gya Efroni, gi guromo Makipela, gi khedzanago ni Mambre, gipeto ni liphala nya giwindri, ni misimbo yatshavbo yi dandrago ndrani nya mivbingano ya gipandre gyogyo,

¹⁸gu di tiyiswa kharati gu khala gipeto gya Abrahama mbeli ga Vahiti ni vathu vatshavbo va nga bani va bela khu nyangwa nya lidhoropa.

¹⁹Khu hwane nya ugo, Abrahama a di dzinga mwangadzi waye Sara, phalani nya giwindri gya Makipela, a gu Hebroni, tigoni ga Khanani.

²⁰Gipandre ni liphala nya giwindri si guromo umo, si di tiyiswa mandzani ga Abrahama, khu Vahiti si khala lithowo nya gudzingele umo.