Read gitonga Genesi 24 Bible Online

Genesi 24 - gitonga bible

Genesi 24

¹Abrahama a di gumbide ngudzu, myaga yaye yi diri yingi ngudzu, PFHUMU Nungungulu a di mu kategiside khu satshavbo.

²Abrahama a di embela githumi gyaye nya gikhongolo gya ndrangani gwaye, egi gi thangelago silo saye satshavbo, khuye: “Vega mandza yago vbanyongatunu gwangu, [16]

³Nya gu vbweta gukheni u sambanye khu lina la PFHUMU Nungungulu wa ndzadzini ni Nungungulu wa mafuni, khuwe, gima khu na nga vbwetela gyanana gyangu, nyamayi vbakari ga vanyamahegyane nya lifumbu nya Vakhanani nyi vbanyago vbakari gwawe.

⁴Aholu, u na hongola tigoni gwathu, ga valongo vangu, u na ya hatha iyo mwangadzi wa gyanana gyangu Isaki.”

⁵Githumi gi di hakha, khigyo: “Ahati nyamahegyana a gumba dzina gu wuya ni eni tigoni momu, nyi na dzega gyanana gyago nyi gi bweledza tigoni gwago nya mavelego, gani?”

⁶Abrahama a di hakha, khuye: “Ne khu mevbini magirelo, u nga dzegi gyanana gyangu u gi bweledza iyoyo!”

⁷PFHUMU Nungungulu wa ndzadzini a nyi dusidego ndrangani ga babe wangu ni tigoni gwangu nya mavelego, a nyi embede, a sambanya gwangu khuye a na ninga litigo leli ga sanana sangu, Uye a na rumela ngilozi yaye mbeli gwago, a na resa nyamayi a na khalago mwangadzi wa gyanana gyangu.

⁸Aholu, nyamayi a gu bomba gu wuya nago, u na bani na wu tshulegide ga gisambanyo gyangu, nya gikhongolo khu gumba bweledza iyoyo gyanana gyangu.

⁹Khavbo avbo, githumi gi di vega mandza yaye vbavbatshi nya nyonga ya mune waye, gi sambanya esi uye a nga gi rumago.

¹⁰Githumi gi di dongisela likhumi dzingameriya dza mune waye, gi gu phara ndzila gi hongola, na gi pharisidwe miningelo nya yingi nya lisima khu mune waye. Gi di dzega ndzila nya guhongole Mesopotamiya, gi hongola dhoropani ga Nahori.

¹¹A di khidzimisa dzingameriya gasi gu dzi hefemudza vbavbandze nya lidhoropa, vbafuvbi ni nambo. A diri silambo, guhwani nya lidambo, gikhati vanyamahegyane va dugago va ya rega mati.

¹²Githumi gi di ganela khu monyoni gwaye, khigyo: “PFHUMU Nungungulu wa Abrahama, mune wangu, Gira khuwe nyi mane muhuno egi nyi gi vbwetago, wonegisa wuwadi wago ga mune wangu Abrahama.”

¹³Wona gukhuwe nyi emide vbafuvbi nya nambo yoyu dzimbiri dza dhoropani momu dzi tago guta rega mati.

¹⁴Nyamahegyane wule nyi na mu lombago, kheni: “Gira wuhindzi u wegedza khali yago nyi kodza gu sela mati, a gu hakha khuye sela, nyi na ninga gambe mati dzingameriya dzago dzi sela, a na khale uye u mu hathidego gu khala mwangadzi wa githumi gyago Isaki. Khu kharati nyi na dziti gukheni u wonegiside wuwadi ga mune wangu.”

¹⁵Githumi gi si gu vbedzi gu ganela, Rebheka, gyanana gya Bhetuweli, gyanana gya Milika ngadza Nahori, ndruye wa Abrahama, a di vboha na vbagaride khali yaye.

¹⁶Nyamahegyane a di mburide ngudzu, a diri likendzi kholu a di si gu tidwi khu mwama. A di relela namboni aya tadza khali yaye a gwela.

¹⁷Khavbo avbo, githumi gi di tutuma gi mu khinga, gi mu embela, khigyo: “Khu wuhindzi wago, nyivbe nyi sela vbadugwana mati ya khalini gwago.”

¹⁸Uye a di hakha, khuye: “Sela, mune wangu,” a di wegedza khali mandzani a mu ninga a sela.

¹⁹Na sede, nyamahegyana a di khuye: “Nyi nguya rega gambe mambe nyita sedza dzingameriya dzago, kala dzi kodwa.”

²⁰A di dzegela gu guhula khali nya mati umo nya gighowolo a tutuma a bwelela gambe namboni aya rega mati a ta sedza dzingameriya dzaye dzatshavbo.

²¹Mwama a di mu khedzisela nyamba ganela gilo gasi guti mwendro Pfhumu a gimbidziside gwadi lendro laye.

²²Avbo dzi nga vbedzago gu sela dzingameriya dzatshavbo, mwama a di dusa phera nya gipandre nya pimo nya ndralama, ni maniya mavili nya likhumi mipimo nya ndralama.[17]

²³A di wudzisa nyamahegyane, khuye: “U gyanana gya mani uwe? Nyi ngu gu lomba u nyi embela, ndrangani ga babe wago womo wulanga nya gu hi ya lala avbo wutshigu wowu, gani?”

²⁴Uye a di hakha, khuye: “Eni nyi nyamahegyane wa Bhetuweli, gyanana gya Milika a nga velega ni Nahori.”

²⁵A di engedza gambe, khuye: “Gaya gwathu womo mwasi ni mahawo nya mangi ngudzu nya guhodzise sifuyo. Womo gambe wulanga nya gulale.”

²⁶Khavbo avbo, mwama wule a di noga a khidzima a lombelela mbeli ga PFHUMU Nungungulu,

²⁷a ganela, khuye: “A na rungudzwe PFHUMU Nungungulu wa mune wangu Abrahama, a ngamba diga gu wonegisa wuwadi ni gutumbega ga mune wangu, a nga nyi gimbidzisa kala ndrangani ga valongo va pfhumu yangu.”

²⁸Nyamahegyane a di tutuma a hongola ndrangani ga mayi waye, aya va embela satshavbo si nga mu dugelelago.

²⁹Rebheka a diri ni ndriyaye nya mwama nya gupwani khu Laboni, a di tutuma a relela namboni aya hakha mwama yoyo.

³⁰Laboni a di wone phera ni maniya mandzani ga ndriyaye, gambe a di pwide Rebheka na gu ganela, khuye: “Mwama yoyo a nyi embede esi, a diya vbweta mwama aya mu mana ni dzingameriya vbafuvbi ni nambo.

³¹A di mu embela, khuye: Delu nya gukatege wa PFHUMU Nungungulu, khu ginani u khalago vbavbandze yoyo? Eni nyi dongisede nyumba ni wulanga nya dzingameriya.”

³²Khavbo avbo, mwama a di bela ndrangani. Laboni a di ruma gurula dzingameriya a ninga mwasi ni mahawo sirengo, ni mati nya guhambe mawundru mwama ni dziphelegedzi dzaye.

³³Khu hwane, va di va ninga guhodza. Aholu uye a di ganela, khuye: “Kha nyi na hodza gilo nyi si gu ganeli esi nyi vbwetago gu ganela.” Laboni a di khuye: “Ganela.”

³⁴Khavbo avbo, Mwama a di ganela, khuye: Eni nyi githumi gya Abrahama.

³⁵PFHUMU Nungungulu tadzide mune wangu khu wuhigo ni makategwa, a mu dandriside khu tshivba ni dzithomba. A mu ningide dzinvuta, dzimombe, parata ni ndralama, ni sithumi nya vama ni vanyamayi, dzingameriya ni dziburu.

³⁶Sara, mwangadzi wa mune wangu, ambari a nga bani na gumbide, a mu ningide gyanana nya gikhwathana, a gi ningidego dzithomba dzaye dzatshavbo.

³⁷Mune wangu a di nyi gira nyi sambanya, khuye: U nga lowodzisi nyamayi mwamana wangu vbakari nya sagadzyana sa tigoni ga Khanani a vbanyago umo.

³⁸Aholu u na hongola, ndrangani ga babe ni valongo vangu u ya dzegela nyamayi gyanana gyangu.

³⁹Eni nyi di mu hakha, kheni: Ahati nyamahegyane a gu bomba nyi landra?

⁴⁰Uye a di nyi hakha, khuye: PFHUMU Nungungulu a nyi thangelago dzindzilani gwangu gwatshavbo, a na rumela Ngilozi yaye yi gu bangaladza gasi lendro lago li mane mihandro hi yi vbwetago; u na dzegela gyanana gyangu nyamayi nya lihundzu langu, wa ndrangani ga babe wangu.

⁴¹Uwe u na tshulega ga gisambanyo gegi nyi giridego nago, wa gu vboha ga valongo vangu avo va ya bomba gu gu ninga nyamahegyane.

⁴²Aholu, muhuno, gikhati nyi vbohidego namboni, nyi di ganela, kheni: Uwe PFHUMU Nungungulu wa mune wangu Abrahama, gira gukhuwe liendro langu li katege.

⁴³Eni nyi guromo avba vbafuvbi ni nambo yoyu nya mati, gyagadzyana gi na dugago gita rega mati, eni nya gu gi embela, kheni: Nga nyivba nyi sela mati madugwana ya khalini gwago,

⁴⁴uye a gu nyi hakha, khuye: Sela, nyi na ya rega gambe mati nyi ta sedza dzingameriya dzago, khuye PFHUMU Nungungulu a mu hathidego gu khala mwangadzi wa gyanana gya mune wangu.

⁴⁵Nyi di si gu vbedzi gu ganela esi khu monyoni gwangu, gikhati Rebheka a dugidego ni khali a relela namboni aya rega mati. Eni nyi di mu embela, kheni: Nyivbe mati nyi sela.

⁴⁶Uye a di dzegela guwegedza khali, a nyi embela, khuye: Sela, nyi na ninga gambe mati dzingameriya dzi sela nidzo. Eni nyi di seda, uye a di sedza nidzo dzingameriya.

⁴⁷Khavbo avbo, nyi di mu wudzisa gukheni u gyanana gya mani. Uye a di nyi hakha, khuye: Nyi gyanana gya Bhetuweli, mwamana wa Nahori ni Milika. Khavbo avbo, nyi di mu ambagisa phera vbathonvutunu ni maniya mawogoni gwaye.

⁴⁸Nyi di khidzima mbeli ga PFHUMU Nungungulu; nyi bonga PFHUMU Nungungulu wa mune wangu Abrahama, a nga nyi gimbidzisa khu ndzila nya gudzegele gu nyi vbohisa wulanga nya gukodze gu mana gyanana gya ndruye wa mune wangu gasi gu khala mwangadzi wa gyanana gyaye.

⁴⁹Olu, mwa gu dzina gu yeyedza mune wangu, lihaladzo ni lisine lanu, nyi embeleni; mwa gu bani mu hungide simbe silo nyi embeleni gambe, nyi fela gu dziti ndzila muni nyi na gu yi dzegago.”

⁵⁰Khavbo avbo, Laboni ni Bhetuweli va di hakha, khavo: “Satshavbo sesi sa guta khiyo ga PFHUMU Nungungulu, ethu hi mwalo gilo nya gu gu embele nya gyadi mwendro nya guvivbe.

⁵¹Rebheka khuye oyu, womo mbeli gwago, mu dzege u hongole naye; a na khale mwangadzi wa gyanana gya mune wago, kha nga idzo a ganedego khidzo PFHUMU Nungungulu.”

⁵²Avbo gi ngapwa magana yaya, githumi gya Abrahama gi di noga mbeli ga Pfhumu.

⁵³Gi di dusa sombo nya parata, sombo nya ndralama ni guambala gi ninga Rebheka; gi ninga gambe sombo nya lisima ga ndriyaye ni ga mayi waye.

⁵⁴Hwane nya isoso, va di hodza, va sela, mwama ni dziphelegedzi dzaye, va di lala. Khu mindru gakone, gikhati va nga wugago githumi gya Abrahama gi di ganela, khigyo: “Nyi tshuleni nyi bwelela ga mune wangu.”

⁵⁵Aholu, ndruye ni mayi wa Rabheka va di khavo: “Nyamahegyane a na khale nethu khu matshigwanyana, tanga nya likhumi matshigu, khu hwane, a na hongola.”

⁵⁶Uye a di phindrula, khuye: “Mu nga nyi hwedzini, kha nga olu PFHUMU Nungungulu a kategisidego lendro langu, nyi digeni nyi bwelela gaya ga mune wangu.”

⁵⁷Avo va di mu embela, khavo: “Hi na rane nyamahegyane hi mu wudzisa a gu pimisa ginani.”

⁵⁸Va di rana Rebheka va mu wudzisa, khavo: “U ngu dzina gu hongola ni mwama yoyu, gani?” Uye a di hakha, khuye: “Ina. Nyi ngu dzina.”

⁵⁹Khavbo avbo, va di diga Rebheka a gu hongola, ni ndriyaye nya gyagadzyana ni muyayi waye ni githumi gya Abrahama gumogo ni vama va nga bani va gi bangaladza.

⁶⁰Va di kategisa Rebheka, khavo: “Uwe ndriyathu! U na khale melegi wa mazana ni mazana! Sanana sago si na dzege madhoropa ya valala vawe!”

⁶¹Rebheka ni sithumi saye va di khuga, va khilela dzingameriya va gu landra mwama wule. Githumi gile gi di dzega Rebheka gi hongola naye.

⁶²Gu pfolani nya lidambo, Isaki a di gu wuya khu namboni wa Lahayi-Royi; kholu uye a di gu vbanya tigoni ga Negebhi.

⁶³Ni silambo soso a nga bani a dugide a gimbila gimbila mahangeni, a di khusa maho a gu wona dzingameriya dzi nga bani na dzi gu hidzimela.

⁶⁴Rebheka nuye a di khusa maho a wona Isaki, a di tshiga khu vbangameriyatunu.

⁶⁵Uye a di wudzisa githumi, khuye: “Khu mani mwama a hi khingago khu thembweni?” Githumi gi di hakha, khigyo: “Khu mune wangu.” Khavbo avbo, Rebheka a di dzegela gufenengela khovbeni khu mwendra.

⁶⁶Githumi gi di embeledzela Isaki satshavbo iso gi thumidego.

⁶⁷Khu vbale, Isaki a di dzega Rebheka a mu bedza tshatshani ga mayi waye Sara, a mu hakha kha nga mwangadzi waye, a mu haladza. Isaki a di tangadziswa kharati hwane nya gufe ga mayi waye.