Read gitonga Genesi 27 Bible Online

Genesi 27 - gitonga bible

Genesi 27

¹Isaki a di gumbide ngudzu. Maho yaye ma di garade, ma di si woni. A di rana Esawu, gyanana gyaye nya matiwula, a mu embela, khuye: “Mwanangu!” Uye a di hakha, khuye: “Nyi womo avba.”

²Isaki a di khuye: “Kha nga u wonago, eni nyi gumbide, kha nyi liti litshigu nya gufe gwangu.

³Nyi ngu gu lomba u dzega matshari yago, gikhweso ni wulaho wago, u bela khabini u sota. Egi u na songago,

⁴nyi phulele u tshambisela gwadi kha nga idzo nyi golago khidzo, u nyi resela nyi ta hodza, nyi fela gu gu kategisa na nyi si gufi.”

⁵Aholu Rebheka a di bani a gu yingisela, a pwa esi Isaki a nga embelago gyanana gyaye. Esawu a di duga aya sota, gasi gu resa ga babe waye.

⁶Rebheka a di embela mwanaye Jakobe, khuye: “Nyi ngari gupwa babe wago a na gu embela ndriyago Esawu, khuye:

⁷Indra uya sota u ta nyi phulela nyama nya gunone nyi hodza, kholu nya gu vbweta gu gu kategisa mahoni ga PFHUMU Nungungulu na nyi si gufi.”

⁸Olu, upwa gwadi mwanangu, esi nyi gu embelago.

⁹Indra phandroni u ya mola siphongwana sivili nya gunone, u nyi resela. Eni nyi nata si dongisela gwadi nyi phulela babe wago nyama nya gutshambe gwadi kha nga idzo a yi golago khidzo uye.

¹⁰“U na yisa ga babe wago aya hodza, afela gu gu kategisa na si gufi.”

¹¹Jakobe a di hakha mayi waye, khuye: “Ndriyangu Esawu mwama nya gutale khu mafefeleti milini gwaye, gasi eni nyi mwalo nawo.

¹²A gu nyi phara babe, nyi na khala muthu nya malipha gwaye, wulangani nya gikategiso nyi na mana givalo.”

¹³Mayi waye a di phindrula, khuye: “Givalo gyogyo gi na thegela eni, mwanangu. Upwa esi nyi gu embelago; indra u ya dzega esi nyi gu embedego.”

¹⁴Jakobe a di hongola aya mola siphongwana a gu wuya naso ga mayi waye. Uye a di ta phula gwadi a tshambisela kha nga idzo a nga bani a gu gola khidzo babe waye.

¹⁵Rebheka a di hatha dzingandzu dzile nya gumbure ngudzu dza Esawu, mwanaye nya matiwula, edzi dzakone nya gumbure ngudzu a nga bani ari nadzo ndrangani, a gu ambagisa Jakobe gyanana gyaye nya nandra.

¹⁶Na vbedzide a di mu ambagisa lidowo nya phongo mandzani ni ngoloni, gu nga bani guri mwalo mafefeleti,

¹⁷a gu ninga gyanana gyaye Jakobe gi phara mandzani nyama nya guphudwe ni gibaba a nga dongiselago.

¹⁸Jakobe a diya ga babe waye aya, khuye: “Baba wangu.” Isaki a di hakha, khuye: “Nyi womo avba, gasi khuwe mani, mwanangu?”

¹⁹Jakobe a di hakha babe waye, khuye: “Kheni Esawu, gyanana gyago nya matiwula; nyi giride esi u nga nyi ruma. Nyi ngu gu lomba u wuga, u khala, u hodza nyama nyi nga sotago, gasi u nyi kategisa.”

²⁰Isaki a di khuye: “U dzi kodzide kharini guvbiredzela gu sota girengo, mwanangu?” Jakobe a di hakha, khuye: “Kholu PFHUMU Nungungulu wago khuye a gi residego mbeli gwangu.”

²¹Khavbo avbo, Isaki a di embela Jakobe, khuye: “Delu, hidzimela nyi ta gu phara, mwanangu, nyi wone gukheni khu lisine kamwe khuwe gyanana gyangu Esawu mwendro khandruwe.”

²²Khavbo avbo, Jakobe a di hidzimela ga babe waye Isaki, a nga mu pharago, a gu ganela, khuye: “Lito kheli la Jakobe, aholu mandza khaya ya Esawu.”

²³Isaki kha tugula Jakobe kha nga a nga bani ari ni mafefeleti nya nga ya ndriyaye Esawu, a di rula gasi gu mu kategisa.

²⁴Ambari ulo a di mu wudzisa nyaluphye, khuye: “Ina kamwe khu lisine khuwe gyanana gyangu Esawu, gani?” Jakobe a di hakha, khuye: “Ina kheni.”

²⁵Khavbo avbo, Isaki a di khuye: “Nyi ninge guhodza nya girengo u ngaya sota, gasi nyi hodze nyi gu kategisa.” Jakobe a di mu ninga uye a gu hodza; a mu yisela gambe vbinyu aya sela.

²⁶Khavbo avbo, Isaki, babe waye, a di mu embela, khuye: “Hidzimela mwanangu u nyi ninge besu.”

²⁷Jakobe a di hidzimela aya mu bhejari. Na gupwa gunengela gwadi dzingandzu dzaye, a di mu kategisa, khuye: “Ina, gunengela ga gyanana gyangu, gu ngu fanana ni gubhumula nya lithembwe li kategisidwego khu PFHUMU Nungungulu.

²⁸Nungungulu a na gu ninge thondrwane ya ndzadzini ni gunona nya mafu, gu na manege talo nya tirigu ni vbinyu!

²⁹Mayigo ma na gu khozele, ma na khidzime mahundzu nya vathu mbeli gwago! Fumela vandriyago, mbelii gwago si na noge sanana sa mayi wago! A na vadwe oyu a na gu valago, a kategiswe oyu a gu kategisago.”

³⁰Isaki, na ngari guvbedza gu kategisa Jakobe, Jakobe na ngari gu duga khu ga babe waye, a di vboha Esawu na gu wuya khu gusotatunu.

³¹A di phula nuye nyama nya gunone, a yi yisa ga babe waye, a mu embela, khuye: “Wuga baba wangu u hodze nyama nyi ngaya sota eni gyanana gyago, gasi u nyi kategisa.”

³²Babe waye Isaki a di mu wudzisa, khuye: “Khuwe mani uwe?” Uye a di hakha, khuye: “Kheni Esawu gyanana gyago nya matiwula.”

³³Isaki a di liwuga khu tshivba, a ganela, khuye: “Gasi khu mani a nga nyi resela nyama nya gusotwe nyi hodzidego eni nu si gu vbohi uwe? Nyi mu kategiside, khu guralo khuye a kategisidwego.”

³⁴Na pwide magana yoyo ya babe waye, Esawu a di phela gu gira ligwaha ni gulila khu wuvi waye watshavbo, a ganela, khuye: “Nyi kategise neni, baba wangu!”

³⁵Aholu Isaki a di khuye: “Ndriyago dzude khu wugengeli a ta hakha gikategiso gyago.”

³⁶Esawu a di ganela, khuye: “Khu olu gikhati nya wuvili na gu nyi kanganyisa, khu guralo va nga mu thangisa lina nya gupwani khu Jakobe. Guhegula a nyi wandrede wukoma wangu, olu a nyi dzegede gikategiso gi nga bani gi gu nyi lumba.” A di engedza gambe a ganela, khuye: “Baba, ina kamwe khwa nyi vegela neni gikategiso gimwegyo, gani?”

³⁷Isaki a di mu hakha, khuye: “Nyi mu giride pfhumu yago, nyi mu ningide vandriyago vatshavbo gu khala sithumi saye, nyi mu ningide tirigu ni wadwa nya dziuvha. Ginani gambe nya gu gu ninge olu mwanangu?”

³⁸Esawu a di wudzisa babe waye, khuye: “Ina gikategiso gimwegyo basi u gu nagyo gani baba wangu? Nyi kategise neni baba wangu.” A di khusa lito a lila khu tshivba.

³⁹Babe waye Isaki a di mu hakha, khuye: “Ndranga yago yi na hamuga gunona nya mafu ni thondrwane yi thegago khu vbatshani ndzadzini.

⁴⁰U na vbanya khu litshari lago u na khala githumi gya ndriyago, aholu mugugimbilani gwago nya gulegalege, u na tshula kanga waye thamoni gwago.”

⁴¹Esawu a dipwa likhulo khu Jakobe, khu kotani nya gikategiso gile a nga ningwago khu babe waye. A di ganela khu monyoni gwaye, khuye: “Ma na vboha matshigu nya gulile babe wangu, hwane nya ugo, nyi na songa ndriyangu Jakobe.”

⁴²Rebheka a di tiviswa magana yaya ya mwanaye nya koma Esawu. A di ranisa Jakobe, gyanana gyaye nya nandra, a mu embela, khuye: “Ndriyago Esawu a gu vbweta gu phodza khu gu gu songa.

⁴³Nyipwe mwanangu, vbiredza u thavela ga ndriyangu Laboni, tigoni ga Harani.

⁴⁴Indra u ya khala ndrangani gwaye matshigu ma vbwetegago kala li bosa likhulo la ndriyago.

⁴⁵Avbo uye a na rulago, a divaledwa khiso u mu giredego khavbo nyi na rumelago va ta gu dzega u wuye khiyoyo. Kha nyi vbweti gukheni nyi luze sanana sangu sa sivili khu litshigu limwedo basi.”

⁴⁶Rebheka a di embela Isaki, khuye: “Nyi ngu garadzega ngudzu guvbanyani gwangu khu kotani ya vanyamahegyane nya Vahiti; Jakobe nuye a gu dzegana ni nyamayi nya Muhiti kha nga avo, i tshukwana nyifa basi.”