Read gitonga Genesi 3 Bible Online

Genesi 3 - gitonga bible

Genesi 3

¹ Nyoga yi diri igyo girengo nya gugengele ngudzu ga sirengo satshavbo sa khabini, si nga giriwago khu PFHUMU Nungungulu. Yi di embela nyamayi, khiyo: “Ina lisine nya gupwani Nungungulu a mi layide gukhuye, mu nga hodzini mihandro nya misimbo yatshavbo ya thembweni, gani?”

²Nyamayi a di hakha nyoga, khuye: “Ahihi. Ethu hi ngu dzumedziswa gu hodza mihandro nya misimbo yatshavbo ya thembweni.

³Aholu, khu mahungu nya simbo wu guromo vbakari ni vbakari nya lithembwe, Nungungulu a hi layide gukhuye: Mu nga wu hodzi, ambari gu wu kuha basi, mu ngafa.”

⁴Nyoga yi di engedza, yi ganela gambe ga nyamayi, khiyo: “Khu lisine kha mu na ngafa gilo!

⁵Aholu Uye Nungungulu a ngu dziti nya gukhuye, litshigu mu na gu wu hodzago, mu na tulega maho, mu khala kha nga Nungungulu; muti esi nya sadi ni esi nya guvivbe.”

⁶Khavbo avbo, nyamayi, khu gu wona gukhuye handro nya simbo khwadi gu wu hodza, gambe wu ngu tsakisa mahoni; simbo nya wadi nya gutule mapimo ni guti, a di hava handro wule a gu hodza a gu ninga mwama waye a hodza nuye.

⁷Gukhugela avbovbo, ma di tulega maho yawe va vavili, va tugula gukhavo kha va ambala gilo. Khu guralo, va di sonedzela mahagane nya ngonva, va gu gira tshalu.

⁸Ga igyo gikhati, va dipwa lito la PFHUMU Nungungulu a nga bani na gu gimbila thembweni apwa gupepa nya silambo, mwama ni nyamayi va di thava va sihalela PFHUMU Nungungulu misimboni ya thembweni.

⁹Aholu, PFHUMU Nungungulu a di rana muthu a mu wudzisa, khuye: “U womo hayi?”

¹⁰Uye a di hakha, khuye: “Nyi pwide lito lago avbo U nga bani na wu gimbilagimbila thembweni, nyi di thava, kholu, nyi diri wumbwiri; nyi ta sihala.”

¹¹Nungungulu a di mu wudzisa, khuye: “Khu mani a nga gu tivisa gukhuye u wumbwiri? Ina khandri u di hodza handro nya simbo nyi nga gu himbedzela gu wu hodza, gani?”

¹²Mwama a di hakha, khuye: “Nyamayi u nga nyi ningago gu khala mubangaladzi wangu, khuye a nga nyi ninga handro nya simbo yoyo, eni nyi wu hodza.”

¹³PFHUMU Nungungulu a di wudzisa nyamayi, khuye: “Ginani u giridego?” Nyamayi a di hakha, khuye: “Nyoga khiyo yi nga nyi senga, eni nyi wu hodza.”

¹⁴Khavbo avbo, PFHUMU Nungungulu a di embela nyoga, khuye: “Kha nga u giridego silo nya nga esi, u vadwe vbakari nya sirengo satshavbo nya sifuyo ni sirengo satshavbo nya likhabi. U na khwirira khu lididi, u hodza kudzudzwane nya mafu, matshigu yatshavbo nya guvbanye gwago.

¹⁵Nyi na vega livengo ga uwe ni nyamayi, ga gitugulwana gyago ni gitugulwana gyaye. Igyo gi na gu pfara hungo, uwe u na zama gu gi hodza gitshinandro.”

¹⁶A di embela gambe nyamayi, khuye: “Nyi na gu gira u wona sigaradzo mimbani gwago, u na velega sanana khu wuvi nya wukhongolo, ambari ulo, u na khala lidora ngudzu nya mwama wago, aholu uye a na gu fumela.”

¹⁷Khavbo avbo, PFHUMU Nungungulu a di embela mwama, khuye: “Olu u nga yingisa mwangadzi wago u gu hodza handro nya simbo nyi nga gu himbedzelago gu wu hodza, mafu ma na vadwa khu kotani yago; matshigu yatshavbo nya guvbanye gwago, u na garadzega ngudzu gasi gu mana guhodza nya mihandro ya mafuni.

¹⁸Mafu ma na velega basi miba ni sirangalabwa, uwe u na vbanya khu mwasi wu bugago thembweni.

¹⁹U na lutuga ngudzu gasi gu mana iso u yelago gu hodza, kala litshigu u na gu bwelelago u gu khala gambe mafu. Kholu uwe u kudzudzwane, u na bwelela gambe u gu khala kudzudzwane.”

²⁰Mwama, Adhamu a di riya lina mwangadzi waye, nya gukhuye khu Evha, kholu khuye melegi wa vatshavbo va vbanyago.[1]

²¹PFHUMU Nungungulu a di gira guambala nya malowo nya sirengo a gu ninga mwama ni mwangadzi waye va ambala.

²²Khavbo avbo, PFHUMU Nungungulu a di ganela, khuye: “Muthu khu guti iso nya sadi niso nyamba sadi, khade idzosaye ni moyo nya Ethu. Olu kha gu vbwetegi gu mu dzumedzisa guya hava handro nya simbo nya womi a wu hodza, a mana guvbanya nya gupindruge!”

²³Khu magirelo yoyo, PFHUMU Nungungulu a di mu tutumisa thembweni ga Edheni. Muthu a di gurumedzwa guya lima mafu aya a nga wumbwago khayo.

²⁴Nungungulu, hwane nya gu bani na tutumiside muthu, a di vega dzingilozi dzaye ni dzikerubhimi phuvbo ga Khugadambo, dzinyangwani nya lithembwe la Edheni, na dzi pharide matshari nya nilo, gasi gu segela muthu ndzila nya guye mana simbo nya womi.