Read gitonga Genesi 30 Bible Online

Genesi 30 - gitonga bible

Genesi 30

¹Avbo Rakeli a nga wonago gukhuye kha ningi sanana Jakobe, a di khalela wufu ndriyaye, a embela Jakobe, khuye: “Nyi ninge sanana; kholu wa gu bomba nyi nafa.”

²Khavbo avbo, Jakobe a di vbenyela Rakeli a mu embela, khuye: “Wa gu alakanya gukhuwe nyi ngu dzi kodza gu tshikedza wulanga wa Nungungulu a ngamba gu ninga livelego, gani?”

³Rakeli a di hakha, khuye: “Egi githumi gyangu Bhila, indra u ya hengela nagyo malawu, gasi a velega wulangani gwangu. Khavbo gwaye, eni neni nyi na mana sanana.”[21]

⁴Khu guralo, a di mu ninga githumi gyaye Bhila gi khala mwangadzi waye. Jakobe a di tshangana naye.

⁵Bhila a di khura mimba a velega gyanana nya gikhwathana ga Jakobe.

⁶Khavbo avbo, Rakeli a di ganela, khuye: “Nungungulu a nyi lamude, pwide lito langu a nyi ningide gyanana.” A di gi riya lina nya gupwani khu Dhani.

⁷Bhila, githumi gya Rakeli, a di khura gambe mimba a velega gyanana nya wuvili nya gikhwathana ga Jakobe.

⁸Rakeli a di khuye: “Nyi dwanide ni ndriyangu, nyi mu pade!” Khu guralo, a di gi riya lina nya gupwani khigyo Nafitali.

⁹Liya khu gu wona gukhuye a hegiside guvelega, a di dzega githumi gyaye Zilipa a gi ningela ga Jakobe a gi gira mwangadzi waye.

¹⁰Zilipa githumi gya Liya, a di velega gyanana nya gikhwathana ga Jakobe.

¹¹Liya a di ganela, khuye: “Gomo gunengela nya gungi ngudzu!” A di gi riya lina nya gupwani khu Gadhi.

¹²Zilipa, githumi gya Liya, a di velega gyanana nya wuvili nya gikhwathana ga Jakobe.

¹³Liya a di ganela khuye “Edzi nyi nengelago khidzo! Sagadzyana si na nyi rana khiso nyi kategide;” a di khuye khigyo Aseri.

¹⁴Tshigu mwedo, khu nango nya gupile tirigu, Rubheni a di duga a hongola thembweni, aya mana mihandro nya lihaladzo.[22] A di hava a dzega aya ningela mayi waye Liya. Rakeli a di embela Liya, khuye: “Nyi girele wuhindzi u nyi bagela mihandro nya lihaladzo ya mwanago.”

¹⁵Liya a di hakha, khuye: “Khwa eneledwa khu gu nyi bela mwama wangu, wa gu vbweta gambe gu nyi bela mihandro nya lihaladzo ya gyanana gyangu, gani?” Rakeli a di hakha, khuye: “Ina ka, uwe nyi ninge mihandro nya lihaladzo ya mwanago, wutshigu wa muhuno, mwama a nata lala iyo gwago.”

¹⁶Gikhati Jakobe a nga bani na gu wuya khu thembweni ni silambo, Liya a di mu khinga, a mu embela, khuye: “Delu eno gwangu, kholu nyi livbide khu uwe tengo nya mihandro nya lihaladzo ya gyanana gyangu. A di lala naye wutshiguwule.”

¹⁷Nungungulu a di yingisa gu lomba ga Liya, uye a di khura mimba a velega gyanana nya gikhwathana nya livbandre ni Jakobe.

¹⁸Khavbo avbo, Liya a di ganela, khuye: “Nungungulu a nyi ningide tshatshazelo wangu, kholu nyi nga ningela githumi gyangu ga mwama wangu.” A di gi riya lina khuye khigyo Isakari.

¹⁹Liya a di khura gambe mimba a velega gyanana nya gikhwathana nya livbandre na gimwegyo ni Jakobe.

²⁰Liya a di tsaka a ganela, khuye: “Nungungulu a nyi girede makategwa nya makhongolo. Olu mwama wangu a na vbanya ni eni kholu nyi velegide naye livbandre na gimwegyo sanana.” A di gi riya lina nya gupwani khu Zebhuloni.

²¹Khu gu handzamedza a di velega gyanana nya gyagadzyana, a nga gi ranago gukhuye khu Dhina.

²²Nungungulu a di alakanya Rakeli, a mupwa a mu ninga livelego.

²³A di khura mimba a gu velega gyanana nya gikhwathana. Rakeli a di ganela, khuye: “Nungungulu a nyi tshude dzitshoni dzangu.”

²⁴A di gi riya lina nya gupwani khu Josefa, na gukhuye: “PFHUMU Nungungulu a na nyi engedzele gambe gimbe gyanana!”

²⁵Hwane nya gu Rakeli na velegide Josefa, Jakobe a di embela Laboni, khuye: “Nyi dige nyi hongola, nyi bwelela gaya gwathu, tigoni gwangu nya mavelego.

²⁶Nyi ninge vagadzi vangu ni sanana sangu, nyi gu thumedego khu gufela avo, nyi hongola; kholu uwe u ngu pima gwadi idzo nyi gu thumedego khidzo.”

²⁷Laboni a di khuye: “Nyi girele wuhindzi u khala! Kholu nyi ngu dziti gukheni PFHUMU Nungungulu a nyi kategiside khu kotani gwago.”

²⁸A di engedza gambe, khuye: “Vega tengo nya hakhelo wago nyi na gu livba.”

²⁹Jakobe a di hakha, khuye: “Uwe u ngu dziti edzi nyi gu thumedego khidzo, ni edzi nyi sayisidego khidzo tshambi wago.

³⁰Kholu esi u nga bani uri naso gale, nyi si gu vbohi, a diri sidugwanana, olu satshavbo si engedzelane ngudzu; PFHUMU Nungungulu a gu kategiside khavbo gwangu. Ahati eni, lini nyi na gu thumelago neni ngamo yangu?”

³¹Khavbo avbo, Laboni a di khuye: “Ginani nyi na gu ningago?” Jakobe a di hakha, khuye: “Khu na nyi ninga gilo. Aholu wa gu dzumela mawonelo yangu, nyi na engedza gu khala nyi havisa ni gu ghadha tshambi wago.

³²Muhuno nyi na vbindra vbakari nya tshambi wago watshavbo. Nyi kasa phuvbo dzinvuta dzago nya gusivbale nidzo nya mavalavala, avbo nya dziphongo, nyi kasa idzo nya mavalavala; owu wu na bani wuri uwo hakhelo wangu.

³³Gululama gwangu gu na nyi emela litshigu la mindru u natago u ta khedza hakhelo yangu. Dziphongo dzatshavbo nyi na bani nyiri nadzo nya mavalavala nya guage ni dzinvuta nyamba sivbala, dzi wone nga khwatshi nyi di gu bela.”

³⁴Laboni a di phindrula, khuye: “Ma tshambide. Gu na girege kharato, kha nga idzo u ganedego khidzo!”

³⁵Aholu, litshigu lolo furi, Laboni a di kasa phuvbo dziphongo dzatshavbo nya mavalavala, siphongwana nya maratarata ni dzinvuta dzatshavbo nya gusivbale, a ninga sanana saye si havisa.

³⁶A di hambanisa pfhuka nya guningane matshigu mararu nya gugimbile; Jakobe a di havisa iso si nga tshalago avbo nya tshambi wa Laboni.

³⁷Jakobe a di fanya matamo nya gunagane nya misimbo nya tshapandre ni ngene ni rumbinyoni, a vandza magwaru yakone, gu wonega guaga nya misimbo,

³⁸a ma vega mbeli nya dzinvuta, mitsongoni ni sighowoloni nya mati gu nga bani gu sela umo sirengo. Dzinvuta nya vanyamayi dzi di wugedwa khu wunyanyu gikhati dzi ya selago mati.

³⁹Avbo dzi litwago khu vamatune na dzi gu wona misimbo nya gugurudwe, dzi di khura dzimimba, dzi velega sinvutana nya mavalavala ni mikwenga.

⁴⁰Jakobe a di hambanisa a vega phuvbo edzi nya mavalavala ni mikwenga; tshambi wa Laboni wu di tala khu sirengo nya mavalavala ni gusivbala. Khu guralo, Jakobe a di engedzela tshambi waye nyamba pata ni tshambi wa Laboni.

⁴¹Gikhati gyatshavbo dzinvuta dzile nya guene gwadi, dzi nga bani dzi gu vbohedwa khu matshigu, Jakobe a di tsitsa matamo mbeli nya sighowolo nya mati, dzi fela gu khura dzimimba na dzi gu wona matamo.

⁴²Aholu a di si giri kharato ga edzi nya guwondre, khu magirelo yoyo, dzinvuta dzile nyambana tshivba a diri dza Laboni, gasi edzi nya tshivba dzi di lumba Jakobe.

⁴³Khu guralo, mwama yoyu a di ghanya a khala gitetema, a manega nari ni mitshambi nya yingi, dzikhumbi nya vama ni vanyamayi, dzingameriya ni dziburu.