Read gitonga Genesi 32 Bible Online

Genesi 32 - gitonga bible

Genesi 32

¹Jakobe nuye a di simama ni ndzila yaye, a di tshangana ni dzingilozi dza Nungungulu.

²Avbo a nga dzi wonago, a di khuye: “Libutho la Nungungulu!” A di riya lina wulanga wule, khuye: Mahanayimi.

³Jakobe a di rumela myango mbeli gwaye ga ndriyaye Esawu, tigoni ga Seyiri, gipandrengulu nya litigo la Edhomi,

⁴a di ruma guya ganela, khuye: “Mu naya ganela kharati ga pfhumu yangu Esawu, khenu: Githumi gyago Jakobe wari, khuye: “Nyi vbanyide ndrangani ga Laboni, nyi khade iyo kala olu.

⁵Nyi fumide dzithomba ni dziburu, ni mitshambi, dzikhumbi nya vama ni vanyamayi; olu nya gu rumela mwango ga pfhumu yangu Esawu, nyita mu lomba gu a nyi hakhe khu wuwadi.”

⁶Myango yi di wuya ga Jakobe, yi ta, khiyo: “Hi hongode hi ya manana ni ndriyago Esawu, uye a ngu gu khinga ni mazana mana vama.”

⁷Jakobe a di tala khu hwanga a hambanega mapimo. A di kabanisa vathu a nga bani nari navo khu sikwata sivili. A gira gambe kharato ni sirengo nya sikhongolo ni esi nya sidugwana ni dzingameriya,

⁸khuye: “Esawu a gu dhumela tsawa moyo wumbe wu na kodza guvbuluga.”

⁹Khavbo avbo, Jakobe a di ganela, khuye: “Oh, Nungungulu wa babe wangu Abrahama, Nungungulu wa babe wangu Isaki, Uwe PFHUMU Nungungulu u nyi embedego gukhuwe: Bwelela tigoni gwago nya mavelego, eni nyi na gu vhikela;”

¹⁰eni nyi mwalo fanelo nya wuhigo wago watshavbo ni gutumbega gwatshavbo u gu wonegisidego ga eni githumi gyago, kholu guta gwangu nyi tsemakanyide tsongo yoyu wa Joridhani na nyiri ni ndronga basi mandzani, olu nyi mune nya mitsawa mivili.

¹¹Khu wuhindzi wago, nyi vbulugise mandzani ga ndriyangu Esawu, kholu nyi ngu thava gu dhumedwa khuye a nyi songa eni gumogo ni vanyamayi ni sanana.

¹² Khuwe u nga ganelago, khuwe: “Nyi na gu tadza khu makategwa, nyi na gira livelego lago li tala kha nga mafu nya fungu wa phwani, wu tandrwago gu saywa tengo wakone.”

¹³Jakobe a di lala vbale wutshigu wowo, a gu hatha vbakari nya silo saye, sagwati nya guninge ndriyaye Esawu, khuye:

¹⁴Mazana mavili dziphongo nya migadzi ni magumavili vamabhongwe; mazana mavili dzinvuta, ni magumavili dzihamba.

¹⁵Magumararu dzingameriya, dzi mamisago gumogo ni sanana sakone, magumana dzimombe nya migadzi ni likhumi nya vamatune, magumavili dziburu nya migadzi ni likhumi nya vamatune.

¹⁶A di ningela satshavbo sesi ga sithumi saye, a ninga gimwegyo ni gimwegyo, tshambi waye khu phuvbo, a si embela, khuye: “Thangani mbeli, mu tshiya wulanga vbakari nya tshambi ni tshambi.”

¹⁷A di laya oyu nya guphele, khuye: “Avbo ndriyangu Esawu a na gu manago, a gu wudzisa khuye khuwe mani uwe? Wa gu hongola hayi? Khu ginani u ghulago tshambi wowu mbeli gwago?”

¹⁸Uwe u na mu hakha, khuwe: “Eyi sagwati yi rumedwago khu githumi gyago Jakobe ga pfhumu yangu Esawu. Uye a nguta khu hwane gwathu.”

¹⁹A di ruma gu gira kharato oyu nya wuvili, uye nya wuraru ni vatshavbo va nga bani na va gu ghula mitshambi, khuye: “Khidzo kharato mu na gu ganelago khidzo ga Esawu avbo mu na gu mu manago.

²⁰Mu na mu embelani, khenu: Githumi gyago Jakobe a nguta nuye a hi landra khu hwane gwathu.” Kholu Jakobe a di gu alakanya khu monyoni gwaye, khuye: “Nya guvbweta gu tsakisa khovbe yaye khu ningelo wowu nyi wu thangisago mbeli, khu hwane nyi naya wonega mahoni gwaye; a gu dzina saye a na nyi hakha gwadi.”

²¹Khavbo avbo, miningelo yi di thanga mbeli gwaye; Jakobe a di pila wutshigu wowo wughoveloni gwaye.

²²A di wuga ni wutshigu wowo a dzega vagadzi vaye va vavili, sithumi saye sa sivili nya vanyamayi ni sanana saye nya likhumi na gimwegyo a gu khisa kova wa Jabhoki.

²³A di va phasa gu tshatuga nondrwa; a gu tshatugisa silo saye satshavbo.

²⁴Avbo a nga tshalago enga basi, a di vboha muthu a ngata dwana ni Jakobe, va pilegisana wutshigu watshavbo kala gu khuga Wuronga.

²⁵Khu gu wona gukhuye a ngu tandrega gu mu pala, muthu wule a di bayisa Jakobe vbanyongatunu; yi di khuyuga kharalo nyonga ya Jakobe na gu dwana naye.

²⁶Muthu wule a di embela Jakobe, khuye: “Nyi dige nyi hongole kholu wu ngu khuga Wuronga.” Jakobe a di mu hakha, khuye: “Gima kha nya na nga gu diga u hongola nyamba phela khu gu nyi kategisa.”

²⁷Muthu wule a di wudzisa Jakobe, khuye: “Khuwe mani lina lago?” Uye a di mu hakha, khuye: “Kheni Jakobe.”

²⁸ Khavbo avbo, a di mu embela, khuye: “Khu na ranwa gambe Jakobe; aholu u na ranwa gupwani khuwe Israyeli; kholu u dwanide ni Nungungulu ni vathu, u pade.”

²⁹Jakobe a engedza, khuye: “Nyi ngu gu lomba u nyi embela lina lago.” Uye a di mu hakha, khuye: “Khu ginani u wudzisago lina langu?” Khavbo avbo, a di mu kategisa.

³⁰Jakobe a di rana wulanga wule khuye Penuweli, kholu a di khuye: “Nyi wonide Nungungulu khovbe ni khovbe, aholu nyi ngu simama nyi vbanya.”

³¹Li di gu khuga lidambo gikhati Jakobe a dugidego khu Penuweli, na gu ndzodola khu kotani nya nyonga yaye yi nga khuyuswago.

³²Khigyo gighelo gi girago gu sanana sa na Israyeli si si hodzi sivba wa vbanyongatunu kala na muhuno, kholu Jakobe bayisidwe vbasivbatunu nya nyonga.