Read gitonga Genesi 34 Bible Online

Genesi 34 - gitonga bible

Genesi 34

¹Dhina, nyamahegyane wa Jakobe nya guvelegwe khu Liya, a di khuga a endrela vambe vanyamahegyane vakwawe va tigoni mule.

²Avbo Sikemi, mwamana wa Hamori, Muhevhi a nga bani ari mwamangulu nya litigo lile, a nga wonago Dhina, a di mu pfinya a gu lala naye khu tshivba.

³Monyo wa Sikemi wu di dandramela ga Dhina nyamahegyane wa Jakobe, a di mu haladza ngudzu a gu ganela naye khu gwadi.

⁴Khavbo avbo, Sikemi a di embela babe waye Hamori, khuye: “Nyi ngu gu lomba u nyi dzegela nyamahegyane yoyu a khale mwangadzi wangu.”

⁵Gikhati Jakobe a tivisidwego gupwani nyamahegyane waye, Dhina, sagedwe khu Sikemi, sanana saye nya sikhwathana si di romo panini si havisa mitshambi. Khu guralo, Jakobe a di degula kala gu wuyani gwawe.

⁶Hamori, babe wa Sikemi, a diya ga Jakobe, guya ganela naye.

⁷Avbo sanana nya sikhwathana sa Jakobe si nga wuyago khu panini, si di goroga ngudzu khu kotani nya iso si nga dugelelago. Likhulo lawe li diri likhongolo ngudzu kholu Sikemi a di giride silo nya guvivbe khu gu lala ni gyanana gya Jakobe[24] esi si si yeligo gu girega.

⁸Aholu Hamori a di ganela navo, khuye: “Monyo wa gyanana gyangu Sikemi wu ngu haladza ngudzu nyamahegyane wanu; nyi ngu mi lombani mu mu ninge a khala mwangadzi waye.

⁹Hongoleni hi gire pwanano gasi sanana sathu si dzegana. Dzumedzisani vanyamahegyane vanu va dzegwe eno gwathu, gasi ethu nethu hi dzumedzisa vanyamahegyane vathu va dzegwe iyo gwanu.

¹⁰Vbahani omu vbakari gwathu, mu thuma gugola gwanu tigoni momu. Khalani omu mu vbaha, mu dzi girelani dzithomba.”

¹¹Sikemi a di ganela ga babe wa Dhina ni ga vandriyaye, khuye: “Nya gu lomba gukheni mu nyi hakhe, ni sevbini mu na nyi lombago eni nyi na mi ningani.

¹²Ganelani tengo mu wu vbwetago nya lowolo ni sombo, nyi na mi ningani gukhedza khidzo mu dzinago khidzo. Aholu egi nyi mi lombago basi khu gukheni dzumelani nyi dzega nyamahegyane wanu a khale mwangadzi wangu.”

¹³Sanana sa Jakobe si di hakha Sikemi ni babe waye Hamori, khu maganelelo nya guvapfhadze, kholu Sikemi a di nyenyeziside ndriyawe Dhina.

¹⁴Va di ganela, khavo: “Ethu kha hi giri isoso! Kha hi dzi kodzi gu dzega ndriyathu hi mu ningela ga mwama nyamba hana wugwera, silo nya nga isoso dzitshoni nya dzikhongolo ga ethu.

¹⁵Ethu hi na dzumela basi gupwanana nanu, mwa gu dzumela gu girani kha nga ethu, mu hanisa wugwera vama vatshavbo va guromo vbakari gwanu.

¹⁶Khu magirelo yoyo, hi na dzi kodza gu mi ninga sanana sathu nya sagadzyana, ethu nethu hi na hakha iso sanu, hi na vbanya gumogo nanu hi khala libandla limwedo.

¹⁷Aholu mwa gumba dzumela gu hana wugwera, ethu hi na dzega gyanana gyathu nya nyamahegyane hi gu hambana nanu.”

¹⁸Magana yaya ma di tsakisa Hamori gumogo ni mwanaye Sikemi.

¹⁹Lidzaha kha la na kanakana gu gira esi va nga lombago, kholu monyo waye wu di gu gola ngudzu nyamahegyane wa Jakobe; gu diga nya isoso, Sikemi a di gu ningwa ngudzu githawo vbakari nya gilongo gyatshavbo gya nyumbani ga babe waye.

²⁰Hamori a di duga ni mwanaye Sikemi, avbo va nga vboha nyangwani nya lidhoropa lawe, va di ganela ga vathu va dhoropani, khavo:

²¹“Ava vathu va ngu vbanya gwadi vbakari gwathu; hongoleni hi va hakhe va vbanya vbakari gwathu, va thuma ni gu dzi girela dzithomba tigoni gwathu, kholu litigo leli likhongolo li ngu enela gu hi va hakha. Hi na dzega sanana sawe nya vanyamahegyane, ethu nethu hi na va ninga esi sathu va dzega.

²²Vathu vava, va gu dzumela basi gu patana ni ethu hi vbanya dangamwedo, hi khala libandla limwedo, ha gu dzumela gukhethu vama vatshavbo va vbanyago vbakari gwathu va hane navo wugwera kha nga avo va hanago.

²³Ina mitshambi yawe yatshavbo, dzithomba dzawe ni sifuyo sawe satshavbo si na mba khala sathu, gani? Hongoleni hi dzumela gu lomba gwawe, avo va khala ni ethu.”

²⁴Vatshavbo va nga bani va gu duga khu mwanya nya lidhoropa, va di yingisa Hamori ni mwanaye Sikemi; vama vatshavbo va nga bani na va vbanya dhoropani va di hana wugwera.

²⁵Na guvbindride matshigu mararu, vama na vari gutshanisekani nya gukhongolo ngudzu, sanana sivili sa Jakobe, Simiyoni ni Levhi, vandruye va Dhina, muthu ni muthu a di phara litshari laye, va bela dhoropani na va tiyide va gu songetela vama vatshavbo.

²⁶Va di songa nuye Hamori ni gyanana gyaye Sikemi, va dzega Dhina ndrangani ga Sikemi va hongola naye.

²⁷Sanana sa Jakobe[25], si di wuya vbasirumbitunu, si ta hanga lidhoropa, khu kotani nya olu vathu vale va nga sagarelago ndriyawe.

²⁸Va di va wandrela mitshambi yawe nya sirengo nya dzinvuta, dzimombe ni dziburu dzawe, ni satshavbo iso si nga bani si manega dhoropani ambari ni vbavbandze nya lidhoropa.

²⁹Va di va dzegela dzithomba dzawe dzatshavbo, sanana ni vagadzi vawe ni satshavbo si nga bani na si guromo dzinyumbani gwawe

³⁰Khavbo avbo, Jakobe a di embela Simiyoni ni Levhi, khuye: “Mu nyi giride muthu nyamba tumbega, mu nyi sodzisa ga vathu va tigoni momu, Vakhanani ni Vaperezi, va na patana va nyi wugela, olu tengo nya vama nyi gu navo wu gu wudugwanana, va na nyi tshanisa va hegisa khu gu nyi mbembisa gumogo ni ngamo yangu yatshavbo.”

³¹Avo va di hakha, khavo: “Ina na, hi di hadza gu dzumela gukhethu va dzega ndriyathu va mu gira liphuphulu, gani?”