Read gitonga Genesi 38 Bible Online

Genesi 38 - gitonga bible

Genesi 38

¹Gikhati gile, Judha a di khuga avbo va nga bani varomo vandriyaye, a hongola aya vbanya ga moyo wa tigoni ga Adhulamo, lina laye nya gupwani khu Hira

²Judha nari ndrangani mule, a di wona nyamahegyane moyo nya Mukhanani, lina laye nya gupwani khu Suwa. A di mu dzega a khala mwangadzi waye, a gu tshangana naye.

³Uye a di khura mimba a velega gyanana nya gikhwathana, a gi riya lina nya gupwani khigyo Eri.

⁴Mwangadzi waye a di engedza gambe gu khura mimba a velega gyanana nya gikhwathana a gi riya khuye khu Onani.

⁵A di khura gambe mimba a gu velega gyanana nya gikhwathana a nga gi riya khuye khu Sela. Uye a di gu vbanya Kezibhe gikhati a velegedwego Sela.

⁶Judha a di dzegela nyamayi Eri, mwanaye nya matiwula. Lina la nyamayi va di pwani khu Tamari.

⁷Aholu Eri, matiwula ya Judha, a diri ni mavbanyelo ma vivbidego mahoni ga PFHUMU Nungungulu. Khavbo avbo, Nungungulu a di mu bayisa afa.

⁸Judha a di embela Onani, khuye: “Bela nyumbani ga ndriyago u hambela mwangadzi waye, gasi gu wusa livelego la ndriyago.”

⁹Aholu Onani a di dziti nya gukhuye sanana sakone kha si na mu lumba. Khu guralo, gikhati a tshanganago ni mwangadzi wa ndriyaye a di vbaladzela vbavbandze mbewu yaye, khu gufela gumba velegela sanana ndriyaye.

¹⁰Magirelo yaya kha ma tsakisa PFHUMU Nungungulu. A di mu bayisa nuye a gufa.

¹¹Khu guralo, Judha a di embela ngadzamwane waye Tamari, khuye: “Dzi vegise kha nga noni ndrangani ga babe wago, kala gyanana gyangu sela gi dandra. Judha a di thava gukhuye Sela a ngafa nuye kha nga vandriyaye. Gukhugela avbovbo Tamari a di bwelela gaya gwawe aya khala iyo.”

¹²Na gu vbindride matshigu nya gulaphe, nyamahegyane wa Suwa, ngadza Judha a difa. Na gu enedzide matshigu nya gulile mwangadzi waye, Judha a di hongola tigoni gwa Timina gumogo ni pari yaye Hira wa Adhulamo, guya wona thumo wa vagayi nya mawoya nya dzinvuta.

¹³Vathu va diya embela Tamari, khavo: “Nasale wago womo ndzilani, a ngu gwela Timina, a ta gaya dzinvuta dzaye.”

¹⁴Tamari a di tshula guambala nya wumalile, a gu fenengela hungoni, a dzi fumbela nyamba tidwa khu muthu, aya khala nyangwani ga Enayimi, ndzilani nya guye Timina, kholu a di gu dziti nya gukhuye namu waye Sela dandride, aholu Judha a di si gu mu ningi a khala mwangadzi waye.

¹⁵Judha na mu wonide a di khuye mwendro nyamayi nya liphuphulu, kholu a nga bani a fenengede khovbeni.

¹⁶Judha a di hidzimela ga nyamayi aya mu embela, khuye: “Dzumela nyi ta lala nago!” “A di si dziti gukhuye khu ngadzamwane waye.” Nyamayi a di hakha, khuye: “Ginani u na nyi ningago khu gu lala ni eni?”

¹⁷Uye a di hakha, khuye: “Nyi na gu rumela phongo mweyo ya tshambini gwangu.” Tamari a di khuye: “Nyi ngu dzumela, wa gu nyi ninga gifungo nya gu bani nyi phara kala litshigu u na nyi rumelago giphongwana gyogyo.”

¹⁸Uye a di mu wudzisa, khuye: “Ginani nyi na gu pharisago?” Tamari a di hakha, khuye: “Nyi ninge gifungo gyago, ni karara wago ni ndronga u pharidego mandzani.” Judha a di mu ninga, a gu lala naye; a mu khurisa mimba.

¹⁹Na khugide a di hongola aya tshula gifenengelo hungoni, a gu ambala gambe dzingandzu dzaye nya wumalile.

²⁰Judha a di rumela phongo khu mandzani ga pari yaye Hira wa Adhulamo, gasi guya dzegisa sombo saye ga nyamayi wule. Aholu uye kha ya mu mana.

²¹A di wudzisa ga vathu va tigoni mule, khuye: “Nyamayi nya liphuphulu a talago gu manega nyangwani gwa Enayimi, bambe nya ndzila, womo evbini?” Vathu va di mu hakha, khavo: “Gima gu si gu manegi nyamayi nya liphuphulu avba.”

²²Na bwelede ga Judha a diya, khuye: “Kha nya mu mana, gudiga nya isoso, vathu va tigoni mule va di nyi embela khavo gima hi si gu woni nyamayi nya liphuphulu wulanga wule.”

²³Khu guralo, Judha a di hakha, khuye: “A na khale ni esi a gu naso, gasi hi si thegi dzitshoni eni nyi nga mu rumelago phongo ni uwe u ngamba ya mu mana.”

²⁴Gipimo nya migima miraru, va di ta embela Judha, khavo: “Ngadzamwane wago Tamari bhayide, olu khuride mimba.” Judha a di hakha, khuye: “Mu duseni vbavbandze aya vbiswa na nga gu vbanya!”

²⁵Na va gu mu dusa, nyamayi a di ruma guya embela nasale waye, khuye: “Khu lisine, mimba nyi gu nayo khya mwama a gu mune wa sombo sesi!” Tamari a di engedza a ganela, khuye: “Nyi ngu gu lomba u khedzisa gwadi gifungo gegi ni karara ni ndronga yakone, u wona gukhuwe sa gu lumba mani.”

²⁶Judha na wone gukhuye sombo saye, a di ganela, khuye: “Nyamayi yoyu a ngu nyi pala khu gululama. Kholu eni kha nya mu ninga gyanana gyangu Sela.” Gima kha nga engedza gambe gu lala naye.

²⁷Gikhati a nga bani a vbweta guhefemula va di tugula gukhavo gu diri ni mavbaha ndrani gwaye.

²⁸Nari vbakari nya guhefemule, gimbe gyanana gi di dusa libogo, singalagadzi a di dzega ngodzi nya gufuvile a hunga gibogwanani ga gyanana gegi, a ganela, khuye: “Oyu khuye a thangidego guduga.”

²⁹Aholu, avbo gyanana gi bweledzidego libogo, ndruye wakone a di duga. Khavbo avbo, singalagadzi a di ganela, khuye: “U gunyude kharini u duga?” Khavbo avbo, gi di riywa lina nya gupwani khu Peresi.

³⁰Khu gu hegisa a dita duga ndriyaye na hungidwe ngodzi nya gufuvile gibogwanani, igyo gi riywa lina nya gupwani khu Zera.