Read gitonga Genesi 40 Bible Online

Genesi 40 - gitonga bible

Genesi 40

¹Hwane nya gu na si dugelede satshavbo sesi, gu di manega gu muthangeli nya vatheledzeli nya wadwa vbamezatunu ni muthangeli nya vagiri nya mikati nyumbani ga Faro, mufumeli wa Egipito, va gu ghohela mune wawe, mufumeli wa Egipito.

²Faro a di goroga ngudzu khu kotani nya sithumi sesi sa sivili; mutheledzeli nya sikombe vbamezatunu ni mugiri nya mikati;

³a di rumela gukhuye va modwe va ya khothedwa nyumbani ga muthangeli nya dzighadhi, wulanga wa wumowo a nga bani a khothedwe avbo Josefa.

⁴Muthangeli nya dzighadhi a di va ningela mandzani ga Josefa gasi a va thumela, va di khala matshigu nya gulaphe na va khothedwe.

⁵Tshigu mwedo, muthangeli nya vatheledzeli nya sikombe vbamezatunu ni muthangeli nya vagiri nya mikati ya mufumeli wa Egipito, va vavili va di lora pasoni momo, ni wutshigu wa wumowo; moyo ni moyo a di lora ndroro yaye nya tshamuselo nya guhambane.

⁶Ni dzimindru, avbo Josefa a nga hidzimelago vbafuvbi gwawe, a di wona nya gukhuye va ngu garadzega,

⁷a di wudzisa vathangeli va Faro va nga bani va khothedwe gumogo naye nyumbani ga mune waye, khuye: “Khu ginani muhuno dzikhovbe dzanu dzi swihadego?”

⁸Avo va di hakha, khavo: “Hi di lora, aholu mwalo a dzi kodzago gu hi ninga tshamuselo nya dzindroro.” Josefa a di va embela, khuye: “Ina gutshamusela dzindroro khandri thumo wu lumbago Nungungulu, gani? Nyi ngu mi lomba mu nyi embelani ndroro yakone.”

⁹Muthangeli nya vatheledzeli nya sikombe vbamezatunu a di embela ndroro yaye Josefa, khuye: “Gulorani gwangu, nyi di wona simbo nya wuvha na wuri mbeli gwangu.

¹⁰Simbo wowu wu diri ni matamo mararu. Avbo wu nga thungago simbo wule, wu di dzegela guthela wenge, matamoni nya wuvha gu di velegwa dziuvha nya guvidzwe.

¹¹Eni na nyi pharide mandzani gikombe gya Faro, nyi di hava dziuvha nyi gamela gikombeni gya Faro nyi ningela gikombe mandzani ga mufumeli.”

¹²Josefa a di mu hakha, khuye: “Upwa tshamuselo, khowu: Matamo mararu gu tshamusela matshigu mararu.

¹³Hwane nya matshigu mararu, Faro a na gu tshula aya gu vega gambe wulanga wago thumoni gwago. U na ya ningela gambe gikombe gya Faro mandzani gwaye, kha nga idzo u nga bani u gira khidzo gale gwago.

¹⁴Gikhati u na bani u romo wulangani momo nya wadi, nyi dundruge neni u nyi girela wuhindzi, u embela Faro khu mahungu yangu, u nyi phasa nyi duga khu pasoni momu.

¹⁵Kholu nyi di bidwa tigoni nya Vahebheru, ni omu gambe, nyi dzude nyi ta rinywa pasoni momu nyamba wuti ni nandru nyi ghohidego.”

¹⁶Muthangeli nya vagiri nya mikati, na wone nya gukhuye Josefa ningide tshamuselo nya yadi, a di mu embela nuye, khuye: “Gasi eni ndroroni gwangu nyi di lora na nyiri ni situndru siraru nya mikati hungoni gwangu.

¹⁷Gitundru gya vbatshani gi diri ni guhodza gwa Faro, ogu gu talago gu dongisedwa khu mugiri nya mikati, aholu sinyoni si di ta rothela mugitundruni gi nga bani giri hungoni gwangu.”

¹⁸Josefa a di hakha a ganela, khuye: “Upwa tshamuselo nya ndroro yago: Situndru siraru gutshamusela matshigu mararu.

¹⁹Gu tshade matshigu mararu Faro a na rumela gu gu pila hungo, a gu vbayega vbasimbotunu, sinyoni si nata rothela nyama yago.”

²⁰Khu litshigu nya wuraru, a nga bani ari buzo nya matshigu nya guvelegwe ga Faro, uye a di gira buzo a ramba valandreli vatshavbo vaye, vbakari nya buzo a di ranisa nuye muthangeli nya vatheledzeli nya sikombe vbamezatunu ni muthangeli nya vagiri nya mikati khu pasoni a va resa mbeli ga valandreli vaye.

²¹A di wuyisa wulangani nya thumo waye, muthangeli nya vatheledzeli nya sikombe vbamezatunu, uye a di ta ningela gikombe mandzani ga Faro.

²²Gasi muthangeli nya vagiri nya mikati, Faro a di ruma gukhuye va mu hunge ngodzi va mu tshwedzisa, kha nga idzo a nga bani a ganede khidzo Josefa.

²³Muthangeli nya vatheledzeli nya sikombe vbamezatunu, gima kha nga mu dundruga gambe Josefa, a di mu divala.