Read gitonga Genesi 45 Bible Online

Genesi 45 - gitonga bible

Genesi 45

¹ Josefa kha nga kodza gu simama gu dzi phara mbeli ga avo va nga bani va mu randrede, a di ganela, khuye: “Embelani vathu vava vatshavbo va duga, avba!” Khu guralo, gu diri mwalo mumbe muthu vbafuvbi gikhati Josefa a dzi tugudzisidego ga vandriyaye.

²Aholu uye a di khusa lito a gu lila ngudzu khu tshivba na va gu mupwa Vagipiti, gu kala mahungu ma vboha nyumbani ga Faro.

³Josefa a di ganela ga vandriyaye, khuye: “Eni kheni Josefe. Babe wangu a nga gu vbanya, gani?” Aholu avo va di thuruga kha va dzi kodza gu mu hakha kholu va di si giti nigyo nya guganele mbeli gwaye.

⁴Josefa a di embela vandriyaye, khuye: “Nyi ngu mi lombani, hidzimelani avbo gwangu!” Avo va di hidzimela. Josefa a di engedza a ganela, khuye: Eni kheni Josefe, ndriyanu mu nga mu rengisani a reswa Egipito.

⁵Ambari ulo, mu nga swihali, gambe mu ngapwi dzitshoni khu olu mu nga nyi rengisani nyi reswa ga eli litigo; kholu Nungungulu a nyi thangiside mbeli gwanu gasi guta vbanyisa womi wathu.

⁶Kholu gu gira myaga mivili ndzala na yi gu tshanisa tigoni; gambe ndrani nya livbandre myaga yi nga gutago gu na bani guri mwalo gulima ni guhavela dzimbewu.

⁷Nungungulu a di nyi rumela mbeli gwanu gasi guta mi dongiselani wuthavelo tigoni momu, gasi gu vbanyisa womi wanu ni gu mi vbulugisa khu magirelo nya gusamadzise.

⁸Ahihi, khandri enu mu nga nyi rumelani nyita omu. Khu Nungungulu; khuye a nga nyi gira nyi khala kha nga babe ga Faro, a nyi gira mune wa ndranga yaye, ni mwamangulu nya litigo latshavbo la Egipito.

⁹Vbiredzani mu bwelela ga babe wangu mu ya mu embelani, khenu: Gyanana gyago Josefa gyari, khigyo: Nungungulu a nyi giride mune nya litigo latshavbo la Egipito, delu nyamba hwela u ta khala vbafuvbi gwangu!

¹⁰U na ta vbanya tigoni ga Goseni, vbafuvbi ni eni; uwe ni sanana sago, ni situgulwana sago, ni sifuyo sago esi nya sidugwana ni esi nya sikhongolo ni dzithomba dzago dzatshavbo.

¹¹ Nyi na ta gu hodzisa wulangani wowo, kholu ndzala yi nga na gu simama yi tshanisa ndrani nya livbandre myaga, gasi u si tshaniseki, uwe ni ngamo yago, ni satshavbo si gu lumbago.

¹²Wonani khu maho yanu, a na wone nuye ndriyangu Bhejami, gukhenu khu lisine kheni kamwe nyi ganelago nanu.

¹³Embeledzelani babe wangu, wuzundzo watshavbo va nyi ningago tigoni ga Egipito, satshavbo esi mu si wonego, vbiredzani mu ya resa babe wangu eno.”

¹⁴Khavbo avbo, a di wugarelana ni ndriyaye Bhejami, a lila, Bhejami nuye a di lila mawogoni gwaye.

¹⁵Josefa a di bhejari vandriyaye vatshavbo a gu lila na va wugarede. Khavbo vandriyaye va dzi kodzidego gu bhula naye.

¹⁶Mahungu ma di phalalega ni nyumba yatshavbo nya wufumu wa Faro, pwani: “Va vbohide vandruye va Josefa!” Ogu gu di nengedzisa Faro gumogo ni dzindruna dzaye.

¹⁷Faro a di embela Josefa, khuye: “Embela vandriyago, khuwe: Girani, kharati: Khiledzani dzisaku dzanu avbo nya sirengo sanu, mu bela ndzilani mu hongola Khanani.

¹⁸Mu na ya dzega babe wanu ni dzingamo dzanu, muta vbafuvbi gwangu; nyi na mi ningani gipandre gi nonidego ngudzu nya litigo la Egipito, mu na hodzani mihandro nya yadi ngudzu ya tigoni momu.

¹⁹Uwe va embele gambe, khuwe: Girani, kharati: Dzegani dzikareta tigoni ga Egipito nya guenele sanana sanu ni vagadzi vanu; khiledzani umo babe wanu, mu wuya.

²⁰“Mu nga garadzegi khu kotani nya sipeto sanu, kholu esi si guromo nya sadi tigoni ga Egipito si na lumba enu.”

²¹Sanana sa Israyeli si di gira kharato. Josefa a di si ninga dzikareta kha nga guruma ga Faro; a di si ninga gambe guhodza nya mbuva.

²²Vatshavbo a di va ninga moyo ni moyo dzingandzu nya buzo; aholu Bhejami a di mu ninga mazana mararu sikwangwangwa nya dzitsapawu nya parata ni livbandre dzingandzu nya buzo.

²³Ga babe waye gambe, a di rumela likhumi dziburu nya vamatune na dzi rwade mihandro nya lisima ngudzu ya tigoni ga Egipito, ni livbandre dziburu nya migadzi na dzi rwade sivbila ni guhodza ni dzimbuva nya gu mu phasedzele ndzilani.

²⁴Josefa a di vbangana vandriyaye, na va gu khuga; a di va embela, khuye: “Mu nga ganedzisani vbakari nya ndzila.”

²⁵Va di khuga khu Egipito, va gu vboha tigoni gwa Khanani, ndrangani ga babe wawe Jakobe.

²⁶Va di mu embela, khavo: “Josefa a ngu vbanya, gambe khuye mwamangulu a thangelago litigo latshavbo la Egipito, aholu monyo wa Jakobe wu di simama wu dzidzila kholu kha nga khodwa gwawe.

²⁷Va di mu embeledzela magana yatshavbo aya Josefa a nga ganelago, aholu gikhati a wonidego dzikareta dzi nga rumedwago khu Josefa gasi guta mu dzega, guvbanya gu di wuya gambe ga babe waye Jakobe.

²⁸Israyeli a di nengela a ganela, khuye: “Gyanana gyangu Josefa gi ngu vbanya! Basi, nyi eneledwe. Nyi na ya mu wona na nyi si gufi.”