Read gitonga Genesi 46 Bible Online

Genesi 46 - gitonga bible

Genesi 46

¹Israyeli a di donga silo saye satshavbo a gu khuga a hongola, a vboha Bherisebha, aya paya avbo sirengo nya guphasele Nungungulu wa babe waye Isaki.

²Nungungulu a di ganela ga Jakobe khu ndroroni ni vbakari nya wutshigu, khuye: “Jakobe! Jakobe!” Uye a di hakha, khuye: “Nyi womo avba.”

³Khavbo avbo, Nungungulu a di engedza, khuye: Eni kheni Nungungulu wa babe wago; u nga kanakani gu relela tigoni ga Egipito, kholu nyi na ya gu gira iyo litigo nya likhongolo.

⁴Eni furi wurumba wangu nyi na relela nago Egipito; gambe Eni nyi na gu gira u wuya khiyoyo; mandza ya Josefa ma na sega maho yago.

⁵Khavbo avbo, Jakobe a di khuga khu Bherisebha. Sanana sa Israyeli si di khiledza babe wawe Jakobe ni vagadzi vaye ni sanana sawe dzikaretani dzi nga rumedwago khu Faro gasi guta mu dzega.

⁶ Va di dzega Jakobe ni situgulwana saye satshavbo, sifuyo sawe ni dzithomba va nga girago tigoni ga Khanani, va gu hongola Egipito.

⁷Sanana saye nya vama ni situgulwana saye nya vama, sanana saye nya vanyamayi ni situgulwana saye nya vanyamayi ni livelego laye latshavbo va di hongola naye tigoni ga Egipito.

⁸Aya khu malina ya sanana sa Israyeli, Jakobe ni sanana saye si bedego tigoni ga Egipito: Rubheni, matiwula ya Jakobe;

⁹sanana sa Rubheni, khesi: Enoki, Palu, Hezironi ni Karimi;

¹⁰sanana sa Simiyoni, khesi: Jemuweli, Jabini, Owadhi, Jakimi, Zowari ni Sawule, gyanana gya nyamayi nya Mukhanani;

¹¹sanana sa Levhi, khesi: Gerisoni, Khowati ni Merari;

¹²sanana sa Judha, khesi: Eri, Onani, Sela, Peresi ni Zera. Eri ni Onani, avo va fude tigoni ga Khanani; sanana sa Peresi khesi: Hezironi ni Hamuli;

¹³sanana sa Isakari, khesi: Tola, Puwa, Joba ni Kimeroni;

¹⁴sanana sa Zebhuloni, khesi: Seredi, Eloni ni Jaleyeli.

¹⁵Esi khu sanana sa Liya a velegedego Jakobe tigoni ga Padhani-Arani, gu diga Dhina, gyanana gyaye nya nyamahegyane. Tengo watshavbo nya sanana saye nya vama ni vanyamayi wu di tshanganisa magumararu na vararu vathu.

¹⁶Sanana sa Gadhi, khesi: Zifiyoni, Hagi, Tshuni, Hesibhoni, Eri, Arodi ni Areli;

¹⁷sanana sa Aseri, khesi: Imina, Isivha, Isivi, Bheriya, ni ndriyawe nya nyamayana, Sera; sanana sa Bheriya, khesi: Hebheri ni Malikiyeli.

¹⁸Esi khu sanana sa Zilipa githumi gya Laboni a nga ningago mwanaye Liya; khuye a nga velegago ni Jakobe tengo nya gutshanganise likhumi na livbandre na moyo vathu.

¹⁹Sanana sa Rakeli ngadza Jakobe, khesi: Josefa ni Bhejami.

²⁰Asenati, gyanana nya nyamayi gya Potifera, muphasi nya mhamba wa Oni, velegide ni Josefa Manasi ni Efrayimi tigoni ga Egipito.

²¹Sanana sa Bhejami, khesi: Bhela, Bhekeri, Asibheli, Gera, Nahamani, Eyi, Rosi, Mupimi, Hupimi ni Aridhi.

²²Esi khu sanana a velegidego Rakeli ni Jakobe, vatshavbo va gu tshanganisa likhumi na vana vathu.

²³Gyanana gya Dhani khu Husimi.

²⁴Sanana sa Nafitali, khesi: Jazeyeli, Guni, Jazeri ni Silemi.

²⁵Esi khu sanana sa Bhila, githumi gya Laboni a nga ningago mwanaye Rakeli; khuye a nga velega ni Jakobe tengo nya gutshanganise livbandre na vavili vathu.

²⁶Tengo nya vathu vatshavbo nya ndranga ya Jakobe ni sanana sawe va bedego tigoni ga Egipito, gu diga vagadzi va sanana sa Jakobe, vatshavbo livbandre na limwedo magumi ni livbandre na moyo vathu.

²⁷ Gu landrela sanana sa Josefa, si velegidwego tigoni ga Egipito: Vathu vavili. Tengo watshavbo nya vathu va ndrangani ga Jakobe va hongodego Egipito: Livbandre na mavili magumi.

²⁸Jakobe a di rumela Judha gu thanga mbeli; gasi guya manana ni Josefa; gasi guti mabelelo muni Goseni; va di bela tigoni ga Goseni.

²⁹Na va vbohide, Josefa a di ruma gu dongisela kareta yaye, a khuga a hongola Goseni gu khinga babe waye. Na mu wonide a di mu wugarela thamoni a gu lila gikhati nya gulaphe mawogoni gwaye.

³⁰Israyeli a di embela Josefa, khuye: “Olu nyi ngu dzi kodza gufa, kholu nyi wonide khovbe yago, gukheni u nga gu vbanya!”

³¹Josefa a di embela vandriyaye ni ndranga yatshavbo ya babe waye, khuye: “Nyi ngu bwelela, gasi guya tivisa Faro. Nyi na mu embela, kheni: Vandriyangu ni ngamo yatshavbo ya babe wangu, va nga bani va vbanya tigoni ga Khanani, va dzude gasi guta vbanya vbafuvbi ni eni.

³²Nyi na ya ganela kheni vathu vovo, vahavisi nya mitshambi, va na ni sifuyo; va dzude ni mitshambi yawe nya sirengo nya sidugwana ni esi nya sikhongolo, ni silo sawe satshavbo va nga bani vari naso.

³³Gikhati Faro a na gu mi ranisago, a mi wudzisa gukhuye: Khu wevbini thumo wanu?

³⁴Mu na mu hakhani, khenu: Sithumi sago vahavisi nya mitshambi, gukhugela wananani kala litshigu la muhuno. Vababe vathu navo va di thuma kharato. Khu magirelo yoyo mu na dzi kodzani guya vbanya tigoni ga Goseni, kholu Vagipiti va ngu nyenya vahavisi nya sirengo nya sidugwana.”