Read gitonga Genesi 49 Bible Online

Genesi 49 - gitonga bible

Genesi 49

¹Khu hwane, Jakobe a di ranisa sanana saye a si embela, khuye: Tshanganani kholu nya gu vbweta gu mi tivisani esi si na gu dugelelago khu matshigu ma ngu gutago.

²Tshanganani mu nyi yingise enu sanana sa Jakobe

³Rubheni, uwe khuwe gyanana nya matiwula yangu, uwe khuwe tshivba yangu, handro nya guphele nya tshivba nya wama wangu, khuwe nya guphele khu wuzundzo, nya guphele khu tshivba.

⁴U khugegide kha nga libimbi, khu na nga khala muthangeli, kholu u ghohede lidawu la babe wago. U nyenyeziside wuzundzo nya lidawu langu.

⁵Simiyoni ni Levhi va na ndruye ni ndruye! Matshari yawe ma gu wusa dzihanyi.

⁶Uwe hefemulo wangu, u nga beli makunguni gwawe! Ni uwe monyo wangu, hambana navo, kholu likhuloni gwawe va songide vathu, ni gu dzikhusedzani gwawe va theside dzikuzi.

⁷Yi na vadwe, khorodza yawe nya wughevenga; ni likhulo lawe nya gusonge! Nya gu vbweta gu va hambanisa ga Jakobe. Nyi na va phalalegisa tigoni ga Israyeli.

⁸Uwe Judha, vandriyago va na gu rungudza. Mandza yago ma na tshomborosa dzithamo dza valala vago. Sanana sa babe wago si na noga mbeli gwago!

⁹ Uwe u ginghalana, gikhati u wuyago, mwanangu ni pfimba wago! U khidzima u nama kha nga nghala nya matune ni eyi nya ngadzi. Khu mani nya gu mu wuse?

¹⁰Ndronga nya wufumu kha ya na duga ga Judha, guruma kha gu na duga ga situgulwana saye, kala a gu vboha uye a fanelago gu ruma; oyu mayigo yatshavbo ma na mu yingelago.

¹¹A na hunga giburwana gyaye tshinani nya uvha, gyanana gya buru yaye litamoni nya miuvha nya wumburi, guambala gwaye gu na handzwa khu vbinyu, ni libhadzi laye novbani nya dziuvha.

¹²Maho yaye ma na fuvila khu kotani nya vbinyu, magwaha yaye ma na aga khu mahwe.

¹³Zebhuloni a na vbanya bambe ni yiphwa; a na khala kha nga masiwo nya dzingalava. Bambe nya yiphwa yaye gu na vboha kala Sidhoni.

¹⁴Isakari khuye giburwana nya marambo nya tshivba, gi lalago vbakari nya mavbandro nya dzinvuta.

¹⁵Uye wonide gukhuye guhefemula gilo nya gyadi ni litigo a khalago umo li nonide, a di ningedzela magata a rwegwa kanga a gu khala githumi nya muluveli.

¹⁶Dhani a na lamula vathu vaye, kha nga limbe lihundzu la na Israyeli.

¹⁷Dhani a na khala kha nga nyoga ndzilani, kha nga mamba gindzilanani; yi hodzago litundru nya kavalu, yi thesa khu nyagihwane mukhileli waye.

¹⁸Nya gu khedzisela guvbanyisa gwago, Uwe PFHUMU Nungungulu!

¹⁹Gadhi a na phangwa khu vaphangi; aholu uye a na va phanga khu madzugani

²⁰Gasi Aseri, a na mana talo nya guhodze; Khuye a na ningago esi si nengedzisago vafumeli.

²¹Nafitali yisya yi tshulegidego; uye a gu ganela magana nya wumburi.

²²Josefa litamo nya mihandro, litamo nya mihandro vbafuvbi ni nambo, matamo yaye ma gu tutuma khu vbatshani nya libhiyo.

²³Va mu nyenyide va mu bayisa, va mu vengide va nya wulaho nya matshandza.

²⁴Aholu wulaho waye, wu simamide gu tiya ni misivba nya mawogo yaye yi simamide ni tshivba, khu kotani ya Muvhikeli wa Jakobe, Muhavisi ni Giwindri gya Israyeli.

²⁵Khu Tshivba ya Nungungulu wa babe wago, a na khalago muemeli wago; ni Nungungulu nya Tshivba Yatshavbo a na bani ari gikategiso gyago, khu sikategiso sa vbatshani ndzadzini; ni sikategiso sa guetani vbavbatshi nya mafu, khu sikategiso sa maveleni ni mahembeni!

²⁶Sikategiso sa babe wago, si vbindrago esi sa vababe vangu si vboha dzitshokhatunu nya gigomo nya gupindruge; si na tadzisega hungoni ga Josefa, giwomboni ga oyu a hambanisidwego ga vandriyaye!

²⁷Bhejami lisolwa nya guhavbe; dzimindrudzile a gu khura khu gu songetela, kala gupfolani nya lidambo a kabanisela phango.

²⁸Khayo aya likhumi na mavili mahundzu ya Israyeli; khidzo kharati babe wawe a nga ganelago gwawe a va kategisa, a ninga ga moyo ni moyo gikategiso gyaye.

²⁹A di va ninga sileletelo saye, khuye: Nyi ngu hongola ga valongo vangu; nyi dzingeni vbafuvbi ni valongo vangu, phalani li guromo thembweni la Efroni, Muhiti,

³⁰ phalani li guromo petoni ga Makipela vbafuvbi ni Mambre tigoni ga Khanani, gipandre Abrahama, a rengidego ga Efroni, Muhiti, gasi gu gira gipeto nya lithowo.

³¹ Khavbo vbale va dzingidwego Abrahama ni mwangadzi waye Sara; va dzingidwe gambe vbale Isaki ni mwangadzi waye Rebheka, vbale nyi dzingide avbo Liya.

³²Gipeto ni liphala si guromo avbo, si rengidwe ga Vahiti.

³³ Jakobe, na embeledzede sanana saye sileletelo saye nya guhegise, a di pata mawundru vbadawutunu gwaye; a sala afa aya patwa ni valongo vaye.