Read gitonga Genesi 5 Bible Online

Genesi 5 - gitonga bible

Genesi 5

¹Eli khu libhuku nya longoloko nya situgulwana sa Adhamu. Gikhati Nungungulu a vangidego muthu, a mu vangide nya idzosaye ni uye mune Nungungulu.

² A di va gira mwama ni nyamayi, a va giride a va kategisa, litshigu a va giridego a di va riya lina nya gukhuye “Muthu.”

³Avbo Adhamu a nga tshanganisago lizana ni magumararu (130) myaga, a di velega gyanana nya mwama, nya mufananiso ni giyemo nya idzosaye ni uye, a gi riya lina nya gupwani khu Seta.

⁴Hwane nya gu na velegide Seta, Adhamu vbanyide livbandre na mararu mazana (800) myaga, a gu velega talo nya sanana nya vama ni vanyamayi.

⁵Adhamu fude nari ni livbandre na mana mazana ni magumararu (930) myaga nya guvelegwe gwaye.

⁶Seta nari ni lizana ni livbandre myaga nya guvelegwe gwaye, a di velega Enosi.

⁷Hwane nya gu na velegide Enosi, Seta vbanyide yimbe livbandre na mararu mazana ni livbandre na mivili (807) myaga, a gu velega talo nya sanana nya vama ni vanyamayi.

⁸Seta Fude na vbanyide livbandre na mana mazana ni likhumi na mivili (912) myaga.

⁹Nari ni livbandre na mana magumi (90) myaga nya guvelegwe gwaye, Enosi a di velega Kayinani.

¹⁰Hwane nya guvelege Kayinani, Enosi a di vbanya gambe yimbe livbandre na mararu mazana ni likhumi na livbandre (815) myaga, a gu velega talo nya sanana nya vama ni vanyamayi.

¹¹Gupata yatshavbo, Enosi vbanyide livbandre na mana mazana ni livbandre (905) myaga, afa.

¹²Kayinani a diri ni livbandre na mavili magumi (70) myaga nya guvelegwe gwaye, gikhati a velegidego Mahalaleli.

¹³Hwane nya guvelegwe ga Mahalaleli, Kayinani vbanyide gambe yimbe livbandre na mararu mazana ni magumana (840) myaga. A gu velega talo nya sanana nya vama ni vanyamayi.

¹⁴Kayinani vbanyide livbandre na mana mazana ni likhumi (910) myaga, afa.

¹⁵Mahalaleli nari ni livbandre na limwedo magumi ni livbandre (65) myaga, a di velega Jaredhi.

¹⁶Na velegide Jaredhi, vbanyide gambe yimbe livbandre na mararu mazana ni magumararu (830) myaga, a gu velega talo nya sanana nya vama ni vanyamayi.

¹⁷Mahalaleli fude na tshanganiside livbandre na mararu mazana ni livbandre na mana magumi ni livbandre (895) myaga.

¹⁸Jaredhi nari ni lizana ni livbandre na limwedo magumi ni myaga mivili (162), a di velega Enoki.

¹⁹Hwane nya gu velegwe Enoki, Jaredhi vbanyide gambe livbandre na mararu mazana (800) myaga, a gu velega talo nya sanana nya vama ni vanyamayi.

²⁰Jaredhi fude na vbanyide tanga nya livbandre na mana mazana ni livbandre na limwedo magumi ni myaga mivili (962).

²¹Enoki nari ni livbandre na limwedo magumi ni livbandre (65) myaga nya guvelegwe gwaye, a di velega Metusalema.

²²Hwane nya gu na velegide Metusalema, Enoki vbanyide gipimo nya mazana mararu (300) myaga na gu landrisa gugola gwa Nungungulu, a di velega talo nya sanana nya vama ni vanyamayi.

²³Matshigu yatshavbo nya guvbanye ga Enoki, mazana mararu ni livbandre na limwedo magumi ni livbandre (365) myaga.

²⁴Enoki a di landrisa gugola ga Nungungulu gikhati gyatshavbo, a di mwalalega nyamba wonwa gambe. Kholu Nungungulu a di mu dzega aya khala naye.

²⁵Nari ni lizana ni livbandre na mararu magumi ni livbandre na mivili (187) myaga nya guvelegwe gwaye, Metusalema a di velega Lameki.

²⁶Hwane nya gu na velegide Lameki, Metusalema a di vbanya gambe livbandre na mavili mazana ni livbandre na mararu magumi ni myaga mivili (782), a gu velega talo nya sanana nya vama ni vanyamayi.

²⁷Metusalema fude na vbanyide livbandre na mana mazana ni livbandre na limwedo magumi ni livbandre na mina (969) myaga.

²⁸Lameki na tshanganiside lizana ni livbandre na mararu magumi ni myaga mivili (182) nya guvelegwe gwaye, a di velega gyanana nya gikhwathana,

²⁹a gu gi riya lina nya gupwani khu Nowa, kholu a di khuye: “Egi gi na hi vbungulela sigaradzo ni gulemela nya mithumo ya mandza yathu, nya mafu yaya ma vadwego khu PFHUMU Nungungulu.”

³⁰Hwane nya guvelege Nowa, Lameki vbanyide gambe livbandre mazana ni livbandre na mana magumi ni livbandre (595) myaga, a gu velega talo nya sanana nya vama ni vanyamayi.

³¹Gu pata yatshavbo, Lameki vbanyide tanga nya livbandre na mavili mazana ni livbandre na mavili magumi ni livbandre na mivili (777) myaga, afa.

³²Nari ni tanga nya livbandre mazana (500) myaga, Nowa a di velega Semi, Kami ni Jafeti.