Read gitonga Genesi 6 Bible Online

Genesi 6 - gitonga bible

Genesi 6

¹Avbo vathu va nga phelago gu velegelana va tala, tigoni gu di velegwa ngudzu vanyamahegyane.

²Sivangwa sa ndzadzini si di wona gukhiso vanyamahegyane va mburide ngudzu. Gimwegyo ni gimwegyo gi di dzi hathela nyamahegyane gi nga mu gola gu khala mwangadzi waye.

³PFHUMU Nungungulu a di ganela, khuye: “Liphuvbo langu kha li na simama gu khala kala gupindruga ga vathu. Uye nyama, a na ni tumbunugo nya gufe, guvbanya gwaye kha gu na lapha guvbindra lizana ni magumavili myaga.”

⁴ Matshigu yoyo, ni matshigu ma landrelago, tigoni gu di romo vathu nya sidandrangulu ni tshivba, gikhati sivangwa sa ndzadzini si nga tshanganago ni vanyamahegyane va mafuni, va gu velega sanana, sanana sesi nya sidandrangulu, khu dzingwazi dzi nga pwala ndruma gu matshigu ya gale.

⁵PFHUMU Nungungulu a di wona gukhuye gughoha ga vathu gu diya na gu engedzelana tigoni khu tshivba ni tshivba; ni gu wona gukhuye maalakanyo yatshavbo ya monyoni nya muthu, ma vivbide.

⁶Nungungulu a di dzi laya kholu a nga girago muthu, a di swihala ngudzu.

⁷Khavbo avbo, PFHUMU Nungungulu a di khuye: “Nyi na fuvisa vathu nyi va vangidego mafuni, nyi na va mbembisa tigoni, nyi vbedza vathu, sirengo ni sinyoni sa damboni ni sirengwanana satshavbo si khwirirago khu lididi, kholu nyi ngu dzi laya khu olu nyi si giridego.”

⁸ Nowa a di mana wuhigo mbeli ga PFHUMU Nungungulu.

⁹ Aya khu matimo ya Nowa. Matshiguni gwaye, Nowa a diri uye basi muthu nya lisine nya gululame mafuni, a di gu landrisa gugola ga Nungungulu gikhati gyatshavbo.

¹⁰A velegide sanana siraru: Semi, Kami ni Jafeti.

¹¹Nungungulu a di wona gukhuye litigo latshavbo li ghohekide, gambe li tade khu wughevenga.

¹²Nungungulu a gu khedza mafuni a di wona guvivba basi, kholu vathu vatshavbo va di gimbila khu dzindzila nya gunyenyeze.

¹³Nungungulu a di embela Nowa, khuye: “Nyi fungide gu vbedza vathu vatshavbo, kholu litigo li tade khu guvivba khu kotani yawe. Nyi na va mbembisa gumogo ni mafu.”

¹⁴Gira litaro nya likhongolo khu mapulango nya sena u kabanisela makhuvi ndrani gakone, u londra khu nyedzi ndrani ni vbavbandze.

¹⁵Gu vbwetega u gira khu mipimo yeyi: Mazana mararu (300) mikono gulapha, magumavili, livbandre magumi mikono guanama, ni magumararu mikono gulapha guya vbatshani.

¹⁶Gukhugela mahegiso ga vbatshani nya litaro, u na reledza vbadugwanana gipimo nya kono, u gira gihogo gasi gubela wenengedzo; khu bambe u na vega mwanya nya litaro. Litaro li na bani liri ni nyumba ya vbavbatshi, ya vbakari ni ya vbatshani.

¹⁷Eni nyi na tshisa talo nya ndrambi mafuni, gasi guta langaladza sivangwa satshavbo si vbanyago vbavbatshi nya lidambo; satshavbo si guromo mafuni si nafa.

¹⁸Aholu, nyi na gira nago pwanano nya gidzumeledzwano. U na bela litaroni uwe ni sanana sago, mwangadzi wago ni vagadzi va sanana sago.

¹⁹Ga lifumbu ni lifumbu nya sivangwa nya guvbanye u na dzega patwa moyo, matune ni ngadzi u bela naso litaroni gasi si vbanyiswa gumogo nago.

²⁰Khu ga mafumbu yatshavbo nya sirengo nya guhambanelane, sinyoni, sirengo nya mawundru mana, ni simbe sirengo, si na bela nago sivili sivili, si kodza guvbanyiswa.

²¹Gu vbwetega u wungedzela guhodza gwatshavbo gu olovelago guhodzwa khu lifumbu ni lifumbu gasi gu vega mbuva yago ni ya sirengo satshavbo.

²² Nowa a di gira satshavbo kha nga idzo a nga rumwago khidzo khu Nungungulu.