Read gitonga Genesi 8 Bible Online

Genesi 8 - gitonga bible

Genesi 8

¹Nungungulu a di alakanya Nowa ni sirengo satshavbo nya likhabi, ni sifuyo si nga bani siri ni Nowa taroni. A di wusa phuvbo yi gu furugedza mafuni, mati ma phela gubosa.

²Sifefe nya mati ya vbavbatshi ni dzinyangwa dza vbatshani dzi di segega. Ndzadzi yi di hegisa guwa, yi khamuga.

³Mati ma diya na ma gu vbunguga mafuni. Guvbelani nya lizana ni livbandre magumi (150) matshigu, mati ma di boside nya dzadi.

⁴Khu litshigu nya likhumi na livbandre na mavili nya ngima nya livbandre na mivili, litaro li diya tshegema gigomoni gya Ararati.

⁵Mati ma di simamisa gu vbwasama kala khu ngima nya likhumi. Khu litshigu nya guphele nya ngima yoyo, gu di phela gu wonega dzitshokha nya sigomo.

⁶Hwane nya magumana matshigu, Nowa a di tula gihogo a nga bani giride vbalitarotunu.

⁷A di dusa mahigonganye a wu diga wu vbuvba vbavbandze, aholu wu di bwelela nyamba hwela, kholu gu di lomba guvirela gambe mati mavbwa tigoni.

⁸Nowa a di dusa lituva gasi gu wona mwendro mati ma vbungugide mafuni.

⁹Aholu lituva kha la nga ya mana wulanga nya gumbake, kholu mati ma di nga langaladzide mafu yatshavbo; lituva li di bwelela ga Nowa. Uye a di dusa libogo vbavbandze a gu li hakha a li bedza taroni.

¹⁰A di virela gambe livbandre na mavili matshigu, a gu li dusa gambe li vbuvba vbavbandze nya litaro.

¹¹Lituva li di wuya gambe gwaye ni silambo, na li pharide khu rotho lihagane nya liphya nya simbo nya olivha. Khavbo avbo, Nowa a di dziti gukhuye mati ma vbwasamide mafuni.

¹²Khavbo avbo, a di lindrela gambe mambe livbandre na mavili matshigu a gu tshula lituva. Ilo kha la nga wuya gambe.

¹³Gukhugela litshigu nya guphele nya mwaga, nya ngima nya guhegule, avbo Nowa a nga bani a enedza livbandre na limwedo mazana ni mwaga moyo (601) nya guvelegwe gwaye, mati ma di vbwide mafuni. Nowa a di tula vbatshani nya litaro a gu holela vbavbandze, a wona gukhuye litigo latshavbo li bangide.

¹⁴Khu litshigu nya likhumi na livbandre na mavili, nya ngima nya wuvili, mafu yatshavbo ma di bangide gwadi.

¹⁵Khavbo avbo, Nungungulu a di embela Nowa, khuye:

¹⁶“Duga khu taroni, uwe ni mwangadzi wago ni sanana sago satshavbo ni vagadzamwane vago.

¹⁷Dusa niso sirengo satshavbo u gu naso litaroni, mafumbu yatshavbo nya sinyoni, sirengo nya sikhongolo ni esi nya sidugwana ni iso nya gukhwirire khu lididi mafuni, gasi si velegelana, si andra si tadza mafu.”

¹⁸Nowa a di duga khu taroni ni mwangadzi waye, ni sanana saye ni vagadzamwane vaye.

¹⁹Khu hwane gwaye gu di duga niso, khu mafumbu yawe, sirengo satshavbo si khwirirago khu lididi mafuni, ni sinyoni ni sirengwanana si vbanyago mafuni.

²⁰Nowa a di gira giluvelo a gi phasela ga PFHUMU Nungungulu. A di dzega gimwegyo ga lifumbu ni lifumbu nya sinyoni ni sirengo sile nyamba loledziswa gu hodzwa, a gu luva PFHUMU Nungungulu khu phaselo nya mhamba nya guvbiswe vbagiluvelotunu.

²¹PFHUMU Nungungulu a dipwa gunengela gwadi nya ningelo wule, a gu ganela, khuye: “Gima kha nyi na nga vala gambe litigo khu kotani nya gughohe ga muthu. Ambari olu muthu gukhugela wananani gwaye a alakanyelago guvivba monyoni gwaye. Aholu, Eni gima kha nyi na nga fuvisa gambe sirengo satshavbo si vbanyago, kha nga edzi nyi giridego.”

²²“Gikhati gyatshavbo mafu ma na simamago na ma romo, guyala ni guhavela, guvbisa ni girame matshiga ni maronga, mihani ni wutshigu, gima kha si na fuva.”