Read gitonga 2 Samuweli 12 Bible Online

2 Samuweli 12 - gitonga bible

2 Samuweli 12

¹Khu guralo, PFHUMU Nungungulu a di rumela Natane aya embela Dhavhidhe, khuye: “Gu diri ni vathu vavili ga ndranga mweyo; moyo a diri gitetema, mumbe a diri gisiwana.

²Oyu nya gitetema a di fuyide dzimombe ni dzinvuta nya dzingi ngudzu;

³aholu oyu nya gisiwana ginvutana gimwegyo basi, a nga gi rengago a gi fuya, gi dandra ndrangani gwaye gumogo ni sanana saye; gi di hodza ni gu sela khu khokho ya mune waye ni gu lala nyumbani ga mune waye, gi gira gukhwatshi gyanana gyaye nya gyagadzyana.

⁴Khavbo avbo, gu di vboha pfhumba ndrangani ga oyu nya gitetema; si di mu lemela gu dzega gifuyo gyaye nya gidugwane mwendro nya gikhongolo a songela pfhumba a mu endredego. Khu guralo, a di ya dzega ginvutana gya gisiwana a songa igyo a ningela pfhumba a mu endredego.”

⁵Khavbo avbo, Dhavhidhe a di goroga ngudzu khu muthu yoyo, a embela Natani, khuye: “Nyi ngu sambanya khu PFHUMU Nungungulu a vbanyago, gukheni muthu yoyo a giridego isoso fanede gufa!

⁶Uye a na livba ginvutana khu nyondro dzina khu iso a giridego, kholu uye kha pwela gisiro.”

⁷Khavbo avbo, Natane a di embela Dhavhidhe, khuye: “Khuwe kamwe muthu yoyo!” PFHUMU Nungungulu wa Israyeli a ngu ganela kharati, khuye: Nyi gu todzide khu mafura, nyi gu emisa gu khala mufumeli wa Israyeli, nyi gu vbulugisa mandzani ga Sawule;

⁸nyi gu ningide ndranga ya mune wago, ni vagadzi va mune wago, mawogoni gwago, nyi gu ninga nyumba ya Israyeli ni ya Judha; nari pwani u di si wone nasiri sidugwana na nyi gu engedzede simbe siningwa.

⁹Khu ginani u nga yeyisago magana ya PFHUMU Nungungulu, u gira esi si vivbidego mahoni gwaye? U songide Uriya, Muhiti khu litshari, khu gufela gu dzega mwangadzi waye a khala wago, hwane nya gu bani u mu songide khu litshari la na Amoni.

¹⁰Khu guralo, litshari gima kha li na nga duga nyumbani gwago, kholu u nyi yeyiside, u dzega ngadza Uriya, nya Muhiti, a khala mwangadzi wago.

¹¹Khu guralo, PFHUMU Nungungulu a ngu ganela kharati, khuye: “Nyi na wusa libango nya likhongolo nyumbani gwago. Nyi na gu dzegela vagadzi vago nu gu va wona, nyi va ningela ga vambe vama va lala navo vbakari nya mihani.

¹² Kholu uwe u si giride gusihalani, gasi Eni nyi na si gira vbamihanitunu, na va gu si wona vatshavbo va na Israyeli.”

¹³Khavbo avbo, Dhavhidhe a di embela Natane, khuye: “Nyi ghohede PFHUMU Nungungulu.” Natane a di embela Dhavhidhe, khuye: “PFHUMU Nungungulu futide gighoho gyago, khu na ngafa.”

¹⁴Aholu kha nga u gorosidego Nungungulu khu iso u giridego, khu lisine mwamana a gu velegedego a nafa.

¹⁵Khavbo avbo, Natane a di hongola gaya gwaye; PFHUMU Nungungulu a di veta gyanana a nga velegedwago Dhavhidhe khu ngadza Uriya, gi dwala ngudzu.

¹⁶Dhavhidhe a di lombelela khu gyanana ga Nungungulu, a hala a si hodzi gilo, a bela nyumbani gwaye a lala vbavbatshi wutshigu watshavbo.

¹⁷Masingalagadzi ya ndrangani gwaye ma di hidzimela vbafuvbi gwaye gasi guta mu wusa mafuni, aholu uye a di bomba a si dzumeli ni gu hodza navo guhodza.

¹⁸Khu litshigu nya livbandre na mavili, gyanana gi difa; sithumi sa Dhavhidhe si di thava ni guya mu embela khiso gyanana gi fude, kholu va di gukhavo: “Gikhati gyanana gi nga bani gi gu vbanya, va di gu ganela naye, aholu a di si va yingisi; olu hi na mu embela kharini gukhethu gyanana gi fude? A nga dzi gira dzawalo.”

¹⁹Khavbo avbo, Dhavhidhe a di tugula gukhuye gyanana gi fude, kholu sithumi saye si di gu lembedzana khu gyawe, a di wudzisa ga sithumi saye, khuye: “Gyanana gi difa, gani?” Avo va di hakha, khavo: “Ina gi fude.”

²⁰Khavbo avbo, Dhavhidhe a di wuga khu vbavbatshi, a hamba, a tola mafura, a ambala dzimbe dzingandzu, a bela Nyumbani ga PFHUMU Nungungulu, aya khozela. A di wuya nyumbani gwaye ata lomba gukhuye va mu ninga guhodza a hodza.

²¹Sithumi saye si di khiso: “Gasi ginani esi u girago? Avbo gyanana gi nga bani gi gu vbanya, u di hala u si hodzi gilo u lila, gasi olu gi fudego wa gu hodza!”

²²Dhavhidhe a di va hakha, khuye: “Eni nyi di hala nyi lombelela khu gyanana na gi nga gu vbanya, kholu nyi di gukheni: A gu dzina saye PFHUMU Nungungulu, a na nyi pwela gisiro a nyi vbanyisela gyanana!

²³Gasi olu gi fudego nyi na halela gambe ginani? Ina nyi na kodza gu gi wusa gambe gi vbanya, gani? Eni kheni nyi na gi landrelago; igyo gima kha gi na wuya gambe avbo gwangu.”

²⁴Dhavhidhe a di tangadzisa mwangadzi waye Bheti-Sebha, a diya gwaye aya lala naye, a velega gyanana, va nga gi riyago lina la Solomoni; PFHUMU Nungungulu a di mu gola ngudzu.

²⁵Dhavhidhe a mu ningela mandzani ga muprofeti Natane, uye a mu riya lina la Jedhidhiya, gu tshamusago gupwani gigodwa gya PFHUMU Nungungulu.[10]

²⁶Khavbo avbo, Jowabhi, a diya dhumela Rabha wa Amoni, a wandra lidhoropa nya mufumo.

²⁷Jowabhi a di rumela myango ga Dhavhidhe, khuye: “Nyi pade Rabha, nyi wandra lidhoropa nya mati.”

²⁸Gasi olu, tombanisa vathu vatshadego u randrela lidhoropa u li dzega; kholu nya gu li dzega eni, li nga ranwa khu lina langu.

²⁹Khavbo avbo, Dhavhidhe a di tombanisa vathu vatshavbo a phara ndzila nya guye Rabha, aya li sasela, a li dzega.

³⁰Uye a di dzega gihugu nya wufumu hungoni ga mufumeli wakone; gulemela gwaye gi diri ni pimo nya taleta nya ndralama, na giri ni siwindri nya gukhedzige, va handzega hungoni ga Dhavhidhe; va phanga silo nya singi sa dhoropani.

³¹A di dzega vathu va nga bani vari umomo, a va vega thumoni nya gusahe mapulango, ni mithumo ya mapiki, ni sibhewula, ni umo nya gugire sitini; a di gira kharato ga yatshavbo madhoropa ya na Amoni. Khu hwane, Dhavhidhe a di wuya Jerusalema gumogo ni vathu vaye vatshavbo.