Read gitonga 2 Samuweli 14 Bible Online

2 Samuweli 14 - gitonga bible

2 Samuweli 14

¹Avbo Jowabhi, mwamana wa Zeruwa, a nga wonago gukhuye monyo wa mufumeli wu ngu dilela gikhati gyatshavbo khu gu vbweta Abhisalamo,

²a di rumela va mu resela khu Tekowa, nyamayi moyo nya gugengele ni guti ata mu embela, khuye: “Gira gukhwatshi wa gu vbisega ngudzu, u ambala dzitshalu nya gililo, u nga toli mafura, dzi gire kha nga khwatshi u malile khu gale khu kotani nya gufedwe.

³U naya dzi wonegisa ga mufumeli, uya ganela magana nyi gu leletelago. Khu guralo, Jowabhi a di mu embela magana yakone.”

⁴Nyamayi yoyu wa Tekowa, a di ganela ni mufumeli, a thega vbavbatshi khu khovbe yaye a yeyedza githawo, khuye: “Ama mufumeli, nyi vbanyise.”

⁵Mufumeli a di mu wudzisa, khuye: “Gasi mahungu muni?” Uye a di hakha, khuye: “Eni nyi nyamayi nya noni, nyi fedwego khu mwama wangu.

⁶Githumi gyago nya nyamayana gi diri ni sanana sivili nya sikhwathana, iso si di wusa litunga vbavbandze si dwana khu gyawe, a si manegi ni muthu nya gu si avbule; khavbo avbo, moyo a di bayisa mumbe a mu songa.

⁷Olu, valongo vatshavbo va gu wugela eni githumi gyago, khavo: Hi ninge uye a nga songago ndriyaye hi mu songe, hi phodzela novba wa ndriyaye a mu songidego, hi vbedzisa kharati gihodza thomba gyogyo. Khu kharato, va gu vbweta gu tshima ligala langu li tshadego, va fuvisa mafuni lina la mwama wangu.”

⁸Mufumeli a di khuye: “Indra gaya gwago, nyi na tshala nyi wona mahungu yago.”

⁹Nyamayi wa Tekowa a di embela mufumeli, khuye: “Nandru watshavbo, uwe mufumeli wangu wu na thegele vbatshani gwangu ni nyumbani ga babe wangu; aholu, uwe mufumeli ni gikhalo gyago nya wufumu, mu nga mani nandru yoyu.”

¹⁰Mufumeli a di mu embela, khuye: “Uye a na gu garadzago khu mahungu yoyo mu rese avbo gwangu gasi a si engedzi gambe gu gu garadza.”

¹¹Nyamayi a di hakha, khuye: “Mufumeli, lomba khu lina la PFHUMU Nungungulu wago, gasi muphodzeli nya novba, a si nyi engedzeli libango, khu gu songa mwamana wangu.” Khu guralo, mufumeli a di hakha, khuye: “Nyi ngu sambanya khu PFHUMU Nungungulu a vbanyago, kheni, kha wu na thega vbavbatshi ambari ni ndzudzu moyo basi khu hungoni ga mwanago!”

¹²Khavbo avbo, nyamayi a di hakha, khuye: “Dzumela gukhuwe githumi gyago nya nyamayi gi ganela lito limwedo basi ga mufumeli wangu.” Uye a di mu hakha, khuye: “Ganela.”

¹³Nyamayi a di mu embela, khuye: “Khu ginani u alakanya silo nya nga isoso nya guwugele vathu va PFHUMU Nungungulu? Kholu mufumeli a gu ganela kharato, a na dzi rwega nandru khu gumba landra muthu a nga mu tutumisago.

¹⁴Kholu khu lisine hi nafa, hi na gira kha nga mati ma vbalagago mafuni, ma si roledwigo gambe. Kholu Nungungulu kha na mu songa, aholu a gu vbweta gukhuye, a si hambani naye.

¹⁵Gasi olu, eni nya gu bani nyi dzude nyita ganela magana yaya ga mufumeli ni mune wangu, vathu va nga bani va nyi thusedzela. Gasi olu, githumi gyago nya nyamayi, gi di ganela, khigyo: Nyi naya ganela ni mufumeli wangu, mwendro saye mufumeli wangu a na gira esi githumi gyago gi na gu lombago.

¹⁶Kholu mufumeli a na yingisa, a vbulugisa eni githumi gyago mandzani ga oyu a vbwetago gu nyi mbembisa gumogo ni mwamana wangu umo nya thomba ya Nungungulu.

¹⁷ Githumi gyago nya nyamayi gi engedzide gambe, khigyo: Lito la mufumeli ni mune wangu li na nyi ninga gurula, kholu, mufumeli wangu, a ngu fanana ni ngilozi ya Nungungulu, guti wuwadi ni wuvivbi; khu guralo PFHUMU Nungungulu wago, a na khale ni uwe!”

¹⁸Khu guralo, mufumeli a di hakha nyamayi a mu embela, khuye: “Nyi ngu gu lomba u si nyi siheli iso nyi vbwetago gu gu wudzisa.” Nyamayana a mu hakha, khuye: “Ganela mufumeli ni mune wangu.”

¹⁹Mufumeli a di mu embela, khuye: “Ina kamwe khandri Jowabhi a gu kutsedzelago gu ganela satshavbo sesi, gani?” Nyamayi a di hakha, khuye: “Nyi ngu sambanya khu womi wago uwe mufumeli ni mune wangu, gukheni lisine iso u ngari gu ganelago; khidzo kamwe lisine, khu githumi gyago Jowabhi a nyi rwegidego sileletelo satshavbo sesi ni gu vega kanani ga githumi gyago magana yatshavbo yaya nyi gu embedego.

²⁰Githumi gyago Jowabhi, gi giride esi gasi gu vbindrugedza giemo nya mahungu yaya. Aholu uwe, mufumeli ni mune wangu, u na ni wugengeli nya gukhwatshi u ngilozi ya Nungungulu, nya gu uti satshavbo si giregago mafuni.”

²¹Mufumeli a di embela Jowabhi, khuye: “Khidzo, nyi na gira kharato; Indra uya dzega Abhisalamo!”

²²Khavbo avbo, Jowabhi a di noga a thega vbavbatshi khu khovbe a yeyedza githawo, a bonga mufumeli, khuye: “Muhuno nyi ngu khodwa gukheni, nyi mane wuhigo mbeli gwago, uwe mufumeli ni mune wangu; kholu mufumeli dzumede gilombo gya githumi gyaye.”

²³Jowabhi a di khuga a hongola Gesuri, aya dzega Abhisalamo a wuya naye Jerusalema.

²⁴Mufumeli a di ganela, khuye: A na bwelele gaya gwaye, kha nyi vbweti gu wonana naye. Abhisalamo a di bwelela aya khala ndrangani gwaye, nyamba wona khovbe ya mufumeli.

²⁵Khu guralo, tigoni gwatshavbo gwa Israyeli, a diri mwalo muthu a nga bani nari ni wudhumo khu wumburi kha nga Abhisalamo; gukhugela migondroni kala hungoni gwaye, a di khalegide nyamba wegela.

²⁶Khu mwaga ni mwaga, a di gaya ndzudzu waye kholu wu di gu mu lemela ngudzu, gulemela nya ndzudzu waye gu di enedza mazana mavili dzisikulu, (kilu mbili) mayelano ni gikalo nya wufumu.

²⁷Abhisalamo a di velegide sanana siraru nya sikhwathana ni gyagadzyana gimwegyo gi nga bani gi ranwa khu lina la Tamari, a diri nyamayi nya mburi ngudzu.

²⁸Abhisalamo a di khala myaga mivili Jerusalema nyamba wona khovbe ya mufumeli.

²⁹A di ranisa Jowabhi, gasi a mu vbwelegedza ga mufumeli, aholu, Jowabhi kha nga dzumela. A di mu ranisa nya wuvili, aholu uye kha nga dzumela gambe.

³⁰Khavbo avbo, Abhisalamo a di embela sithumi saye, khuye: “Wonani, lithembwe la Jowabhi ilo li dinganidego ni langu li na ni sivbila, indrani mu ya li vbisa khu nilo.” Sithumi sa Abhisalamo si diya li vbisa.

³¹Khavbo avbo, Jowabhi a di khuga a hongola ndrangani ga Abhisalamo aya mu wudzisa, khuye: “Gasi sithumi sago si di vbisa lithembwe langu khu kotani nya ginani?”

³²Abhisalamo a di embela Jowabhi, khuye: “Eni nyi rumede guta gu rana, kheni: Nga delu eno nyita gu rumela ga mufumeli uya, khuwe: Gasi nyi wuyede ginani khu Gesuri? I tshukwana na nyi khade iyoyo. Gasi olu, nya gu vbweta guya wonana ni mufumeli; nya gu bani nyiri ni nandru, a na nyi songe.”

³³Khavbo avbo, Jowabhi a di hongola ga mufumeli aya mu embela. Mufumeli a di ranisa Abhisalamo, uye a diya dzi wonegisa ga mufumeli, a noga a thega khu khovbe vbavbatshi a yeyedza githawo mbeli gwaye. Mufumeli a di bhejari Abhisalamo.