Read gitonga 2 Samuweli 16 Bible Online

2 Samuweli 16 - gitonga bible

2 Samuweli 16

¹ Avbo Dhavhidhe a nga vbindrago vbadugwana tshokha nya gigomo, a di khingwa khu Zibha, githumi gya Mefibhoseti, nari ni dziburu dzimbili na dzi rwegiside mazana mavili (200) sibaba, ni lizana sitsatsa nya dziuvha nya gubange, ni lizana (100) nya mihandro ya vbamarongatunu, ni gigasi nya wadwa nya vbinyu.

²Mufumeli a di wudzisa Zibha, khuye: “Khya ginani isoso?” Zibha a di hakha, khuye: “Dziburu, nya gu vbweta gu khiledza ngamo ya mufumeli, sibaba ni mihandro nya maronga, si na bani na siri guhodza nya sithumi, wadwa va na sela giwulani gikhati va na gu garalago.”

³ Mufumeli a di mu wudzisa, khuye: “Gasi womo hayi mwamana wa mune wago?” Zibha a di hakha mufumeli, khuye: “Tshade Jerusalema, kholu a di khuye: Muhuno va na Israyeli, va gu vbweta gu nyi bweledzela mufumo wa babe wangu.”

⁴Khavbo avbo, mufumeli a di hakha Zibha, khuye: “Khedza, satshavbo iso si nga bani siri sa Mefibhoseti, sa gu lumba uwe.” Zibha a di hakha, khuye: “Nyi na mane wuhigo mbeli gwago uwe mufumeli ni mune wangu.”

⁵Avbo Dhavhidhe a nga vbohago Bhawurimi, gu di duga khu mule mwama moyo nya lifumbu la nyumbani ga Sawule, a nga bani na gu ranwa khu lina la Simeyi; mwamana wa Gera; a dita na gu yuyutela.

⁶A rinyela siwindri Dhavhidhe ni vathu vaye vatshavbo, sithumi saye ni dzindrena dzaye a nga bani nari nadzo khu nyamudye ni nyambade gwaye.

⁷Simeyi a di hembulula Dhavhidhe, a ganela, khuye: “Duga omu, duga muthu wewe nya novba, muthu wa Bheliyali.

⁸Olu PFHUMU Nungungulu bweledzide vbatshani gwago novba watshavbo wa ndrangani ga Sawule, oyu u wandridego mufumo waye; olu PFHUMU Nungungulu, dzegide mufumo a wu ningela mandzani ga mwanago Abhisalamo; olu muhuno u womo muwusiwanani, kholu u muthu nya novba.”

⁹Khavbo avbo, Abhisayi, mwamana wa Zeruwa, a di embela mufumeli, khuye: “Khu ginani yimbwa yeyi nya gufe yi hembululago mufumeli wangu? Nyi digeni nyi vbindra nyi ya mu pila hungo.”

¹⁰Mufumeli a di khuye: “Ginani nyi gu nagyo nanu enu madzahanu ya Zeruwa? Mu digeni a hembulule, PFHUMU Nungungulu a gu bani a mu rumide gukhuye vala Dhavhidhe, khu mani a na mu embelago, khuye: Khu ginani u girago isoso?”

¹¹Dhavhidhe a di engedza a embela Abhisayi, ni vathu vaye, khuye: “Ambari gyanana gya mahembeni gwangu gi vbwetago gu nyi songa, a na tandrega kharini mubhejami yoyu? Mu digeni a nyi hembulula kha nga a rumidwego khu PFHUMU Nungungulu.

¹²A gu dzina saye PFHUMU Nungungulu a na wona gutshaniseka gwangu, a nyi ninga gurula khu kotani nya gu nyi vale gwaye.”

¹³Khu guralo, Dhavhidhe ni vathu vaye, va di dzi pharela ndzila yawe va hongola; Simaya nuye a di phara yaye ndzila a gimbila khu wubambe nya gigomo, na gu mu yuyutela ni gu mu rinyela siwindri ni gu mu pfuledzela mafu.[11]

¹⁴Mufumeli ni vatshavbo a nga bani nari navo, va diya vboha Joridhani na va garade ngudzu vaya hefemula iyoyo.

¹⁵Khavbo avbo, Abhisalamo ni vama vatshavbo va na Israyeli, va di bela Jerusalema na va gu bangaladzwa khu Ayitofeli.

¹⁶Husayi, Muaraki, pari ya Dhavhidhe a diya dzi wonegisa ga Abhisalamo, a mu embela, khuye: “Vbanya mufumeli, vbanya mufumeli!”

¹⁷Abhisalamo a di embela Husayi, khuye: “Ina khigyo githawo u gi ningago ga pari yago Dhavhidhe, gani? Khu ginani u ngamba longoloka naye?”

¹⁸Husayi a di hakha Abhisalamo, khuye: “Ahihi, eni nya gu vbweta gu ninga githawo ga wule a hathidwego khu PFHUMU Nungungulu ni vathu, ni Israyeli watshavbo nyi khala naye;

¹⁹ni gu gambe khu mani nyi yelago gu mu thumela, vbavbandze ga mwamana wa mufumeli, kha nga idzo nyi thumedego khidzo babe wago, nyi na gu thumela nuwe kharato.”

²⁰Khavbo avbo, Abhisalamo a di embela Ayitofeli, khuye: “Nga ningani wanu wusingalagadzi ga iso hi yelago gu gira!”

²¹Ayitofeli a di embela Abhisalamo, khuye: “Indra uya dzegana ni sibhayi sa babe wago, esi a si tshidego gu sayisa ndranga yaye, avbo va na Israyeli va na gu pwago gupwani u giride livengo ni babe wago, avo va gu landrelago va na tiya hwambo.”

²² Khavbo avbo, va di girela tshatsha Abhisalamo vbatshani nya nyumba; uye a diya landra sitshatha ni sibhayi sa babe waye mahoni ga vatshavbo va na Israyeli.

²³Matshiguni yale, magana nya nga aya ma nga ganedwa khu Ayitofeli, gu di khwatshi, magana ya Nungungulu, a diri nayo wa Ayitofeli a nga bani a gu ninga ga Dhavhidhe ambari ga Abhisalamo.