Read gitonga 2 Samuweli 18 Bible Online

2 Samuweli 18 - gitonga bible

2 Samuweli 18

¹Dhavhidhe a di saya vathu vaye, a emisa mbeli gwawe vathangeli nya sikwata nya likhumi mazana (1.000) niso nya lizana (100).

²Khu hwane Dhavhidhe a di rumela vathu khu sikwata siraru, gipandre gimwegyo nya wuraru gi thangedwa khu Jowabhi, gimbe gipandre nya wuraru gi thangedwa khu Abhisayi, ndruye wa Jowabhi, mwamana wa Zeruwa, gimbe gipandre nya wuraru gi thangedwa khu Itayi, Mugeti. Mufumeli a di ganela ga vathu, khuye: “Eni neni nyi na duga nanu.”

³Vathu va di hakha, khavo: “Kha si yeli gu hi duga nago, kholu sa gu lombega gu ethu hi tutuma, avo kha va na khathala ngudzu khu ethu, ambari nari gipandre nya ethu hi fudego, kholu uwe wenga u ngu dingana likhumi magumi mazana (10.000) nya ethu. Gasi olu i tshukwana u hi phasedzela nuri khu eno dhoropani.”

⁴Mufumeli a di va hakha, khuye: “Nyi na gira iso mu si wonago na si gu mi tsakisa.” Khu guralo, mufumeli a di ema khu wubambe nya nyangwa; khavbo avbo, vathu vatshavbo va di duga khu sikwata nya lizana (100), niso nya likhumi mazana (1.000).

⁵Mufumeli a di leletela Jowabhi, Abhisayi ni Itayi, khuye: “Mu nga girini guvivba ga lidzaha Abhisalamo.” Vathu vatshavbo va pwide avbo mufumeli a nga ningago sileletelo ga vathangeli vaye vatshavbo khu mahungu ya Abhisalamo.

⁶Khavbo avbo, vathu va di duga vbavbandze, gu ya dwana ni va na Israyeli, nyimbi yi di dwanedwa khabini ga Efrayimi.

⁷Va na Israyeli va diya padwa vbale khu vathu va Dhavhidhe; gu di songwa vathu nya gutale ngudzu ga litshigu lolo, nya tengo nya magumavili magumi mazana (20.000) vama.

⁸Kholu nyimbi yi di fenengedza gipandre gile gyatshavbo, vathu va fudego khabini vangi ngudzu gu vbindra avo va nga songwago khu matshari.

⁹Abhisalamo a di tshangana ni vathu va Dhavhidhe, na khilede vbaburutunu gwaye, buru yi di bela khu vbavbatshi nya matamo nya gukhwetele nya nguhu, Abhisalamo a di ya khwetela khu hungo vbamatamotunu a dengeleta avbovbo, buru a nga bani a yi khilede yi di vbindra yi ya mbeli.

¹⁰Mwama moyo a di mu wona aya tivisa Jowabhi, khuye: “Nyi wonide Abhisalamo na tsikede vbatshani nya nguhu.”

¹¹Jowabhi a di embela mwama a nga mu tivisa mahungu yoyo, khuye: “U mu wonide kamwe, gani? Khu ginani u ngamba dzegela gu mu songa a thega vbavbatshi? Na nyi gu ningide likhumi singerengere nya parata ni libhandri.”

¹²Mwama wule a di mu hakha, khuye: “Ambari nari pwani u di vega mandzani gwangu likhumi mazana (1.000) singerengere nya parata, eni gima nya sa khusa mandza yangu nyi handzega vbatshani ga mwamana wa mufumeli, kholu ethu hi pwide gikhati mufumeli a nga leletelago uwe, Abhisayi ni Itayi, khuye: Vegedzani gwadi mwamana wangu Abhisalamo.”

¹³Nari pwani nyi di mu songide khu giviti esi na sa sa sihalega dzindzeveni ga mufumeli, ambari uwe nuwe na wa sa nyi vhikela.”

¹⁴Khavbo avbo, Jowabhi a di mu hakha, khuye: “Kha nyi vbweti gu luza gikhati khu mahungu yago avba.” Khu guralo, a di dzega matshari mararu aya paya khayo monyo wa Abhisalamo, na nga gu vbanya vbatshani nya nguhu.

¹⁵Abhisalamo a di randredwa khu likhumi madzaha nya vaphari nya matshari ya Jowabhi, va mu paya afa.

¹⁶Khavbo avbo, Jowabhi a di womba pundru, vatshavbo va wuya khiyo nya gulundre va na Israyeli; kholu Jowabhi a di gu tsetsa vathu.

¹⁷Va di dzega Abhisalamo va ya mu rinya umo nya liphala nya likhongolo vbakari nya likhabi, va di wungedzela siwindri nya singi vbatshani gwaye; va na Israyeli vatshavbo va di tutuma va thava, moyo ni moyo a hongola gaya gwaye.

¹⁸Abhisalamo na nga gu vbanya, a di emiside giwindri nya gialakanyiso, gi guromo kovani wa mufumeli, kholu uye a di gu ganela, khuye: “Eni nyi mwalo gyanana gasi guaalakanya lina langu; giwindri gegi a di gi thangisa lina laye; kala na muhuno ga gu ranwa pwani gialakanyiso gya Abhisalamo.”

¹⁹Khavbo avbo, Ayimahasi, mwamana wa Sadhoki, a di ganela, khuye: “Nyi nga gu tutuma nyi ya tivisa mahungu yaya ga mufumeli gukheni, PFHUMU Nungungulu a gu phodzede mandzani ga valala vago.”

²⁰Aholu Jowabhi a di khuye: “Uwe muhuno khandri uwe u na khalago mwango nya guye tivisa mahungu, aholu u na ma tivisa khu limbe litshigu; muhuno u nga yi ma tivisa, kholu gu songidwe mwamana wa mufumeli.”

²¹Jowabhi a di embela Muetiyopi, khuye: “Indra uwe u ya embela mufumeli iso u si wonidego.” Uye a di noga a yeyedza githawo ga Jowabhi, khu hwane a hongola khu gututuma.

²²Ayimahasi, mwamana wa Sadhoki a di engedza a embela Jowabhi, khuye: “Gani ginani gi na dugelelago, eni neni nyi dige nyi landra Muetiyopi. Jowabhi a di khuye: “Mwanangu, u na tutuma u fela ginani, kholu tshatshazelo muni u na yi manago ga mahungu yaya?”

²³Ayimahasi a di khuye: “Ambari nari kharato eni neni nyi na tutuma.” Khavbo avbo, Jowabhi a di mu embela, khuye: “Indrayi!” Ayimahasi a di tutuma khu mazambo khu ndzila ya panini, a hegudza Muetiyopi.

²⁴Dhavhidhe a di khade khu vbakari nya myanya mivili ya vbanyangwatunu; muemeledzi wa vbanyangwatunu a di lita vbatshani nya langwe khu vbandzaritunu, a di khusa maho a wona mwama na gu tutuma nari uye ekha.

²⁵Muemeledzi wa vbanyangwatunu a di laledza a embela mufumeli; khavbo avbo, mufumeli a di khuye: “A gu bani nari uye ekha, mahungu nya yadi a ma resago.” Aholu a di simamisa a tutuma kala a vboha vbafuvbi.

²⁶Muemeledzi a di wona gambe mumbe mwama na guta khu gu tutuma, uye a di huweta khu vbanyangwatunu a ganela, khuye: “Nya gu wona gukheni a nguta gambe mumbe mwama na gu tutuma ekha.” Khavbo avbo, mufumeli a di ganela, khuye: “Uye nuye a gu resa mahungu nya yadi.”

²⁷Muemeledzi a di engedza gambe, khuye: “Matutumelo ya uye nya guphele, kha nga matutumelo ya Ayimahasi, mwamana wa Sadhoki.” Khavbo avbo, mufumeli a di khuye: “Muthu yoyo a guta khu wuwadi; a gu resa mahungu nya yadi.”

²⁸Ayimahasi a di laledza a embela mufumeli, khuye: “Gurula!” A di noga mbeli ga mufumeli, a tsitsa khu khovbe mafuni a yeyedza githawo, a ganela, khuye: “A na dhumiswe PFHUMU Nungungulu wago, a hi ningidego mandzani gwathu vathu va nga khusedzago mandza va wugela mufumeli, mune wangu.”

²⁹Mufumeli a di hakha, khuye: “Lidzaha Abhisalamo li ngari ladi, gani?” Ayimahasi a di hakha, khuye: “Gikhati Jowabhi a nga nyi ruma, eni githumi gyago, nyi wonide pfilupfilu nya yikhongolo ngudzu, aholu kha nyi giti ginani gi nga bani gi girega, mufumeli.”

³⁰Mufumeli a di mu embela, khuye: “Ema avba bambe u lirela.” Khavbo avbo, uye a di ema a lirela.

³¹Muetiyopi a di vboha ata mu embela, khuye: “Nya guta tivisa mahungu nya yadi ga mufumeli, mune wangu. Muhuno PFHUMU Nungungulu, a gu phodzede tshivbani ga vale va nga gu wugelago.”

³²Khavbo avbo, mufumeli, a di wudzisa Muetiyopi, khuye: “Lidzaha Abhisalamo li ngari ladi, gani?” Muetiyopi a di hakha, khuye: “Valala va mufumeli, mune wangu, ni vatshavbo vale va gu wugelago, va na godze lidzaha lolo.”

³³Khavbo avbo, mufumeli, a di vbisega ngudzu monyoni gwaye, a gwela aya nyumbani ga vbatshani nya nyangwa na gu lila; a di gimbila na gukhuye: “Mwanangu Abhisalamo, mwanangu, mwanangu Abhisalamo! Gu diri tshukwana na nyi fude eni wulangani gwago, mwanangu Abhisalamo, mwanangu!”