Read gitonga 2 Samuweli 2 Bible Online

2 Samuweli 2 - gitonga bible

2 Samuweli 2

¹Khu hwane nya esi, Dhavhidhe a di wudzisa ga PFHUMU Nungungulu, khuye: “Ina nyi na gwela ga lidhoropa nya gukari la Judha, gani?” PFHUMU Nungungulu a di mu hakha, khuye: “Indra.” Dhavhidhe, khuye: “Nyiya hayi?” A di phindrudwa gupwani: “Hebroni.”

² Dhavhidhe a di phara ndzila a hongola Hebroni, gumogo ni vagadzi vaye va vavili, Ayinowami wa Jezereyeli, ni Abhigayili, noni ya Nabhali, wa Karimelo.

³Dhavhidhe a di dzega gambe vama vaye nya masotshwa, gumogo ni mapango yawe, ma ya vbaha madhoropani ya Hebroni.

⁴ Khavbo avbo, vama va na Judha, va di hongola iyoyo vaya todza Dhavhidhe, gu khala mufumeli wa Judha. Khu guralo, va di embela Dhavhidhe gukhavo vathu va Jabhesi-Gileyadhi khavo va nga dzingago Sawule.

⁵Khavbo avbo, Dhavhidhe a di rumela myango ga vathu va Jabhesi-Gileyadhi, a va embela, khuye: “PFHUMU Nungungulu, a na mi kategise kholu mu giridego wuwadi ga mune wanu Sawule, kholu mu mu dzingidego!

⁶Khu guralo, PFHUMU Nungungulu, a na tumbege ni gu mi girelani wuhindzi; eni neni nyi na mi girelani wuwadi wowo, kholu mu giride silo nya sadi.

⁷Gasi olu mandza yanu ma na mane tshivba, mu khale vama nya dzindrena, kholu, Sawule mune wanu, songidwe, aholu va nyumbani ga Judha, va nyi todzide gu khala mufumeli vbatshani gwawe.”

⁸Aholu Abhineri, mwamana wa Neri, muthangeli nya nyimbi ya Sawule, a di dzega Isobhoseti, mwamana wa Sawule, a mu yisa Mahanayimi,

⁹a mu wumbela gu khala mufumeli wa Gileyadhi, ni Asuri, ni Jezereyeli, ni Efrayimi, ni Bhejami ni Israyeli gwatshavbo.

¹⁰Isobhoseti, mwamana wa Sawule, a diri ni tanga nya magumana myaga gikhati a phedego gu fumela Israyeli, fumide myaga mivili; aholu vathu nya linyumba la Judha va di landrela Dhavhidhe.

¹¹Matshigu Dhavhidhe a fumidego, a nga fumago linyumba la Judha dhoropani ga Hebroni, ma diri livbandre na mivili myaga ni livbandre na moyo migima.

¹²Abhineri, mwamana wa Neri, ni valandreli va Isobhoseti, mwamana wa Sawule, va di khuga khu Mahanayimi va hongola Gibheyoni.

¹³Jowabhi, mwamana wa Zeruwa, ni valandreli va Dhavhidhe, va di duga va va khinga vaya tshangana navo vbafuvbi ni lidhamo la Gibheyoni, ava kheno, vambe khisikheyi nya lidhamo la Gibheyoni.

¹⁴Abhineri a di embela Jowabhi, khuye: “Ma na khuge madzaha ma dwana mbeli gwathu.” Jowabhi a di hakha, khuye: “Ma na khuge.”

¹⁵Khavbo avbo, ma di khuga ma hidzimelelana khu tengo nya guningane likhumi na vavili, nari va na Bhejami a gu gipandre gya Isobhoseti, mwamana wa Sawule, ni likhumi na vavili, khu ga valandreli va Dhavhidhe.

¹⁶Muthu ni muthu a di phara khu hungo nala waye, va payana dzimbambo khu matshari yawe, va thega gumogo vbavbatshi; va di rana wulanga wule khavo Helikati-Azurumi,[4] wu khadego vbafuvbi ni Gibheyoni.

¹⁷Khu litshigu lolo gu di manega nyimbi nya guthise ngudzu; aholu Abhineri, ni vathu vaye, va di sasedwa khu vathu va Dhavhidhe.

¹⁸Vbale gu diromo sanana siraru sa Zeruwa, a gu Abhisayi, Jowabhi ni Asayeli; Asayeli a diri ni migondro nya guvbevbuge kha nga yisya ya khabini.

¹⁹Asayeli a di lundra Abhineri, huye ghwe khu hwane gwaye nyamba khedza nyamudye ambari nyambade.

²⁰Abhineri na khedzide hwane, a di khuye: “Khuwe Asayeli, gani?” Asayeli a hakha, khuye: “Ina kheni.”

²¹Khavbo avbo, Abhineri a di mu embela, khuye: “Ndreya uya phuvbo ga nyamudye mwendro ga nyambade u mola moyo nya madzaha u wandra matshari yawe.” Aholu Asayeli kha nga dzumela gu hambana naye.

²²Khavbo avbo, Abhineri a di engedza a embela Asayeli, khuye: “Ndreya khu hwane gwangu; wa gu vbweta gukhuwe, nyi gu paya u thega vbavbatshi, gani? Nyi na hapfhula kharini maho yangu nyi khedzana ni ndriyago Jowabhi?”

²³Ambari khu guralo, Asayeli a di bomba gu ndreya; khavbo avbo, Abhineri a di mu paya khu tshokha nya litshari khu vbambambotunu, litshari li di vbondza khu hwane gwaye a thega afela avbovbo. Vatshavbo avo va nga bani va gu vbindra khu wulanga wule a nga thegela avbo Asayeli afa, va diya ema.

²⁴Aholu Jowabhi ni Abhisayi, va di simama gu lundra Abhineri; avbo li nga pfolago lidambo, va di vboha gigomoni gya Ama, gi nga khedzana ni Giya, khu ndzila nya giwula gya Gibheyoni.

²⁵Va na Bhejami va di tombana va landra Abhineri, vaya wumba tsawa moyo, vaya ema khu gigomotunu.

²⁶Khavbo avbo, a di laledza a embela Jowabhi, khuye: “Ina matshari ma na simama ma vbedza vathu, gani? Uwe khu dziti gukhuwe, guhegisani gu na manega tshanisa, gani? Kala lini u na digago gu embela vathu va landrelela vandriyawe?”

²⁷Jowabhi a di hakha, khuye: “Nyi ngu sambanya khu PFHUMU Nungungulu a vbanyago, kheni! Naripwani khwa nga ganela isoso, vathu vava va sa diga gu lundra vandriyawe kala dzimindru dza mindru.”

²⁸Khavbo avbo, Jowabhi a di womba pundru, vathu vatshavbo va ema, va si lundri gambe va na Israyeli; gima kha va nga dwanisana gambe.

²⁹Abhineri ni vathu vaye va di gimbila wutshiguwule watshavbo panini; va tshatuga tsongo wa Joridhani, va tsemakanya litigo latshavbo la Bhitoroni, va vboha Mahanayimi.

³⁰Jowabhi nuye a di bwelela khiyo nya gulundre Abhineri, aya tombanisa vathu vaye vatshavbo, gu kenegela likhumi na livbandre na vana vama va Dhavhidhe, nyamba saywa Asayeli.

³¹Gani olu, vathu va Dhavhidhe, va di songide mazana mararu ni livbandre na limwedo magumi (360) va na Bhejami ni va na Abhineri.

³²Va di dzega Asayeli, vaya mu dzinga thowoni ga babe waye li nga bani liri Bhetlehema; Jowabhi ni vathu vaye vatshavbo va di gimbila wutshigu watshavbo wule, gu yagya na vari Hebroni.