Read gitonga 2 Samuweli 22 Bible Online

2 Samuweli 22 - gitonga bible

2 Samuweli 22

¹Dhavhidhe a di embelela ga Pfhumu magana nya ndzimo yeyi, gikhati PFHUMU Nungungulu a nga mu vbulugisago mandzani ga valala vaye ni ga Sawule.

²Dhavhidhe a di ganela, khuye: “PFHUMU Nungungulu giwindri ni likhokhola langu, khuye muvbanyisi wangu;

³Nungungulu wangu, giwindri gyangu nyi thavelago avbo; khuye gitshangu gyangu, tshivba nya guvbanyiswe gwangu; ni likhokhola langu li khusegidego Ama muvbanyisi wangu, u nyi vbanyiside, vbakari nya pfilupfilu.

⁴Nyi ngu lila ga PFHUMU Nungungulu, a fanedego gu rungudzwa, nyi ngu vbanyiswa ga valala vangu.

⁵Kholu mavimbi nya lufu ma di nyi fenengedza, nyi langaladzwa khu mati nya tshivba.

⁶Makhetshe nya lufu ma di nyi randrela nyi modwa khu mazinga yaye.

⁷Wuvini gwangu nyi di rana PFHUMU Nungungulu, nyi di khusa lito nyi rana Nungungulu wangu; Uye khu nyumbani gwaye a di yingisa lito langu, huwa yangu yi pwade dzindzeveni gwaye.

⁸Khavbo avbo, litigo li di thuruga li ndrendremela, matshina nya sigomo ma di kutsungwa, khu kotani nya likhulo laye.

⁹Wu di duga wutshi khu dzithonvuni gwaye, khu kanani gwaye wu duga nilo nya guvbise. Gu duga magala nya gudzure.

¹⁰Uye a di tula ndzadzini a tshiga, na gandride lipfhi nya gusivbale migondroni gwaye,

¹¹a di khilela likirubhimi, a puruma, a vbuvba dzimbapini nya phuvbo.

¹²A di dzi randrela khu gidema a gira gifenengelo gyaye tshatsha waye wu di girwa khu mapfhi nya ndzadzi.

¹³Khu gungangamela nya khovbe yaye, mapfhi ma di phalalega, gu gira maralala ni magala nya nilo.

¹⁴PFHUMU Nungungulu a di pandra mabara khu ndzadzini, Oyu a Khusegidego ngudzu a di pwadza lito laye.

¹⁵A di rinya sighalala saye a phalalegisa valala vaye, a di va tutumisa khu gulasa gwaye.

¹⁶Khavbo avbo, gu di wonega litamo nya mati, gu fuguga matshina nya litigo khu kotani nya tsayiso wa PFHUMU Nungungulu, ni phuvbo yi nga furugedza khu dzithonvuni gwaye.

¹⁷Khu vbatshani a guromo iyo, a di thawuludza mandza a nyi phara, a nyi dusa matini nya mwedzi nya tshivba.

¹⁸A nyi vbulugiside ga nala nya tshivba ni ga ava va nyi vengago, kholu va diri ni tshivba gu vbindra eni.

¹⁹Va di nyi wugela litshigu nyi nga bani nyiri wuvini, aholu PFHUMU Nungungulu a di ta nyi tiyisa.

²⁰A di nyi dusa a nyi yisa hwindzo ni mhango, a nyi vbulugisa kholu a di gu nyi haladza.

²¹PFHUMU Nungungulu a gu nyi phara gukhedza khu gululama gwangu, a nyi tshatshazela kholu mandzani gwangu gu mwalo nandru,

²²kholu nyi landriside dzindzila dza PFHUMU Nungungulu, gima kha nya wugela Nungungulu wangu.

²³Milayo yaye yatshavbo yomo mbeli gwangu, gima kha nyi na hambana ni sileletelo saye;

²⁴nyi tumbegide mahoni gwaye nyi dzi vegisa nyamba ghoha.

²⁵PFHUMU Nungungulu a ngu nyi tshatshazela khu kotani nya gululame gwangu, khu maho yaye a ngu wona gukhuye nyi mwalo nandru.

²⁶Ga oyu a tumbegidego, Uwe u ngu tumbega gwaye, U lulamide ga oyu a lulamidego.

²⁷U ngu dzi yeyedza nu agide ga oyu a agidego aholu, ga uye nya guvivbe u ngu mu ninga tshatshazelo gukhedza khu wuvivbi waye.

²⁸Kholu uwe wa gu vbanyisa va nya gusolega u tshisa vbavbatshi va nya matshandza.

²⁹Uwe PFHUMU Nungungulu, khuwe kandriya yangu PFHUMU Nungungulu, u ngu wenengedza gidema.

³⁰Ina, gumogo ni uwe nyi ngu bela litungani ni Nungungulu wangu nyi na ndraga mabhiyo.

³¹Ndzila ya Nungungulu yi lulamide, magana ya PFHUMU Nungungulu ma tumbegide, khuye gitshangu ga vatshavbo va thavelago gwaye.

³²Kholu, khu mani a gu Nungungulu vbavbandze ga PFHUMU Nungungulu basi? Khu mani muvhikeli, vbavbandze ga Nungungulu wathu?

³³Uye khuye Nungungulu a nyi ambagisago tshivba khuye a lulamisago ndzila yangu.

³⁴ A ngu vbevbugisa mawundru yangu gu fanana ni aya nya yisya a nyi tiyisa vbatshani nya sigomo sangu.

³⁵A hevbudzide mandza yangu gu dwana nyimbi ni mawogo yangu gu khwandra wulaho nya sugu.

³⁶U nyi ningide gambe gitshangu gyago nya guvbanyise, giphaso gyago gi nyi khusedzide.

³⁷U ngu anamisa ndzila migondroni gwangu, mawundru yangu kha ma dhedhereka.

³⁸Nyi di lundra valala vangu nyi va mola, kha nya bwelela hwane na nyi si gu va mbembisi.

³⁹Eni nyi va sasede va si kodzi ni gu wuga, va thegela vbavbatshi nya migondro yangu.

⁴⁰U nyi ambagiside tshivba nya gudwane nyimbi u nogisa valala vangu va khoza gwangu

⁴¹U giride gu valala vangu va thava mbeli gwangu, nyi fuviside avo va nyi vengago.

⁴²Avo va gu lila, aholu mwalo nya gute va vbanyisa va gu lila ga PFHUMU Nungungulu, aholu Uye kha va hakhi.

⁴³Eni nyi di va tshigira kha nga kudzudzwane nyi va suga nyi va gandredzela kha nga maraga ya mu dzindzilani.

⁴⁴Uwe u di nyi vbulugisa mayungani nya gudwanele vathu vangu, u nyi gira muthangeli nya mayigo; lihundzu nyamba liti li ngu nyi thumela.

⁴⁵Va nya mayigo va ngu ta khoza gwangu, avo va gu nyipwa, va gu nyi yingela.

⁴⁶Vatshavbo va gu vbela tshivba; va duga khu makhokholani yawe na va gu ndrendremela.

⁴⁷A na vbanye PFHUMU Nungungulu, a na rungudzwe muvhikeli wangu a na khusedzwe Nungungulu, muvbanyisi wangu;

⁴⁸Nungungulu khuye a nyi ningago tshivba nya gu dzi phodzele; khuye a nyi ningago gu fumela mayigo

⁴⁹Uwe u ngu nyi vbulugisa ga valala vangu va tadego khu likhulo, u nyi khusedza ga vale va nyi wugelago u nyi tshudzisa ga vathu nya dzihanyi.

⁵⁰ Khu guralo, eni nyi na gu rungudza vbakari nya mayigo, PFHUMU Nungungulu nyi na emba rungudzo nya lina lago.

⁵¹Uye a ngu ninga gupala mufumeli waye, a ngu phara gihathwa gyaye khu lihaladzo, khu kotani ya Dhavhidhe ni sanana saye kala gupindruga.”