Read gitonga 2 Samuweli 23 Bible Online

2 Samuweli 23 - gitonga bible

2 Samuweli 23

¹Magana nya guhegise ya Dhavhidhe, khaya: “Magana ya Dhavhidhe, mwamana wa Jese, magana ya muthu a khusegidego, a todzidwego wa Nungungulu wa Jakobe, muembeleli nya dzindzimo dza na Israyeli.

²Liphuvbo la PFHUMU Nungungulu li ganede khavbo gwangu, magana yaye momo lidimini gwangu.

³Nungungulu wa na Israyeli ganede, Giwindri gya Israyeli gi di nyi embela, khigyo: A na manega uye a na fumelago vathu khu gululama, mufumeli a ningago githawo Nungungulu,

⁴a na fanana ni wenengedzo gikhati li dugago lidambo, vbadzimindrutunu nya gumbana mapfhi, kha nga gungangamela hwane nya guwe ndzadzi, gu bugisago mwasi mafuni.

⁵Wufumu wangu wu khalegide gwadi mbeli ga Nungungulu. Kholu uye giride ni eni gidzumeledzwano nya gupindruge, gidzumeledzwano gi tumbegidego gi dongisedwego gwadi. Uye a na nyi gira nyi dugelela ga satshavbo a nyi ninga satshavbo nyi si vbwetago.

⁶Aholu, sanana sa Bheliyali satshavbo si na rinywa vbavbandze gu fanana ni miba, eyi yi si kodzwigo gu pharwa khu mandza;

⁷aholu uye a na gu yi kuhago fanede nari ni gikete mwendro simbo nya litshari, khu kharato miba yi na vbisedwa muphelo.”

⁸Aya khu malina nya dzindrena dzi nga bani dziri ni Dhavhidhe a gu aya: Josebi-Bhasebheti, mwamana wa Takemoni, khuye a nga bani ari muthangeli nya guphele nya dzindrena dzitharu; uye a diri uye Adhinu, Muezini a nga wugela livbandre na mararu mazana (800) vama, a va sasela khu gumogo.

⁹Khu hwane gwaye, a landrela Eliyazari, mwamana wa Dhodho, mwamana wa Awoyi, moyo nya dzindrena dzitharu dzi nga bani dziri ni Dhavhidhe, avbo va nga khozisa Vafilistiya va nga bani va tombanide gasi gu dwana, va na Israyeli na va gu bwelelela hwane,

¹⁰aholu, uye a di khuga a sasela Vafilistiya kala gyandza gyaye gi garala gi khala na gi namarede vbalitsharitunu; khu litshigu lile, PFHUMU Nungungulu a ningide va na Israyeli gupala nya gukhongolo ngudzu; khu hwane masotshwa ma di wuya ga Eliyazari, gutela guta phanga basi.

¹¹Khu hwane gwaye a di romo Sama, mwamana wa Age, Muarari, avbo Vafilistiya va nga tombana khu gidzemo dhoropani ga Leyi, avbo gu nga bani guri ni lithembwe nya dzinyemba, masotshwa ya Israyeli ma di thava mbeli ga Vafilistiya.

¹²Aholu uye a di ema vbakari nya lithembwe a li dwanela, a sasela Vafilistiya. PFHUMU Nungungulu a di mu ninga gupala nya gukhongolo ngudzu.

¹³Ga magumararu dzindruna, vararu nya avo va di vboha ga Dhavhidhe khu gikhati nya guvbwere, phagoni gwa Adhulamo; gidzemo nya Vafilistiya na gi zumbide kovani ga Refayimi.

¹⁴Dhavhidhe a di romo likhokholani; aholu vawoneleli nya Vafilistiya, va diromo Bhetlehema.

¹⁵Dhavhidhe a di dogorela, a ganela, khuye: “Khu mani a na nyi ningago mati nya nambo yoyu wu guromo nyangwani ga Bhetlehema nyi sela?”

¹⁶Khu guralo, dzindrena dza dzitharu dzi di tsemakanya khu vbakari nya libutho la Vafilistiya dzi hongola dzi ya rega mati namboni wa Bhetlehema, wu guromo vbafuvbi ni mwanya dzi ta ninga Dhavhidhe a sela; khu guralo a di bomba gu ma sela, a ma vbaladza mbeli ga PFHUMU Nungungulu.

¹⁷A ganela, khuye: “Ama PFHUMU Nungungulu, nyi ngu lomba gukheni si nga manegi vbafuvbi gwangu silo nya nga esi! Ina nyi ngu dzi kodza gu sela novba wa vama va ningedego womi wawe, gani?” Khavbo avbo, uye kha nga sela. Silo sesi, si di girwa khu dzindrena dza dzitharu.

¹⁸Abhisayi, ndruye wa Jowabhi, mwamana wa Zeruwa, a diri muthangeli wa ava nya vararu. A di khusa litshari laye a dwana ni mazana mararu (300) vama, a va songa; khu guralo, a di mana lina nya likhongolo vbakari ga ava nya vararu.

¹⁹Uye a di mana wuzundzo nya wukhongolo vbakari ga ava nya magumararu, gu kala a khala muthangeli wawe, aholu kha vboha umo nya gufanane ni avo nya vararu.

²⁰Bhenaya nuye, mwamana wa Joyadha, a diri mwama moyo nya ndrena ya Kabizeyeli, mwama a nga bani ari muthu khongolo khu mithumo yaye; uye a di songa dzindrena dzimbili dza Mowabhi, litshigu limwedo na guri ni hunguva a di relela phalani aya songa nghala.

²¹A di songa gambe Mugipiti moyo nya dandrangulu, mandzani gwaye nari ni litshari. Aholu Bhenaya, a di hidzimela gwaye nari ni ndronga mandzani basi, a di ya mu wandrela litshari mandzani gwaye, a mu songa khu litshari laye.

²²Silo sesi si giridwe khu Bhenaya, mwamana wa Joyadha, a manidego ndruma vbakari nya dzindrena dzitharu.

²³Vbakari nya ava nya magumararu, uye a diri ni wuzundzo nya wukhongolo; aholu, ga avo nya vararu nya guhegule kha vboha. Dhavhidhe a di mu emisa gu khala muthangeli nya hudzwe yaye.

²⁴Vbakari ga ava nya magumararu, a di romo Asayeli ndruye wa Jowabhi: Elanani, mwamana wa Dhodho, wa Bhetlehema,

²⁵Sama, Muarodhi, Elika, Muarodhi,

²⁶Helesi, Mupaliti, Ira, mwamana wa Ikesi, Mutekoyi,

²⁷Abhiyezeri, Muanatoti, Mebhunayi, Muhusati,

²⁸Salimoni, Muawoyi, Maharayi, Munetofati.

²⁹Helebi, mwamana wa Bhahana, Munetofati, Itayi, mwamana wa Ribhayi, wa Gibheya, wa sanana sa Bhejami,

³⁰Bhenaya, Mupiratoni, Hidhayi, wa gitsongwanani gya Gahasi,

³¹Abhi-Alibhoni, Muaribhati, Azimaveti, Mubharumi,

³²Eliyabha, Musahalibhoni, sanana sa Jaseni; Jonatane,

³³Sama, Muharati, Ayahamu, mwamana wa Sarari Muarati,

³⁴Elifeleti, mwamana wa Ahasibhayi, mwamana wa moyo nya Mumahakati, Eliyani, mwamana wa Ayitofeli, Mugiloni,

³⁵Hezirayi, Mukarimeli, Paharayi, Muaribhita,

³⁶Igali, mwamana wa Natane, wa Zobha, Bhani, Mugadhi,

³⁷Zeleki, Muamoni, Naharayi, Mubheyeroti, a nga bani ari muphari nya matshari ya Jowabhi, mwamana wa Zeruwa,

³⁸Ira, Mujetiri, Garebhi, Mujetiri,

³⁹Uriya, Muhetewu; vatshavbo magumararu na livbandre na vavili vama.