Read gitonga 2 Samuweli 24 Bible Online

2 Samuweli 24 - gitonga bible

2 Samuweli 24

¹Likhulo la PFHUMU Nungungulu li di engedza li wugela va na Israyeli; a di kutsedzela Dhavhidhe gu va wugela a ganela, khuye: “Gimbila u ya saya va na Israyeli ni va na Judha.”

²Khu guralo, mufumeli a di embela Jowabhi, muthangeli nya nyimbi, uye a nga bani ari naye vbafuvbi, khuye: “Olu gimbila ga mahundzu yatshavbo ya na Israyeli, gukhugela Dhani kala Bherisebha, lovela vathu vatshavbo; gasi nyi kodze gu wuti tengo nya vathu.”

³Khavbo avbo, Jowabhi a di embela mufumeli, khuye: “PFHUMU Nungungulu wago a na engedzele vathu, gu wuyedzela lizana guvbindra olu, gasi maho ya mune wangu ma kodze gu va wona; aholu khu ginani mune wangu u nga gu vbwetago gu gira silo nya nga esi?”

⁴Khu guralo, magana ya mufumeli ma di simama ga Jowabhi, gumogo ni vathangeli nya nyimbi; khavbo avbo, Jowabhi gumogo ni vathangeli nya nyimbi va di khuga mbeli ga mufumeli va ya gira gilovela ga va na Israyeli.

⁵Va di tsemakanya tsongo wa Joridhani, vaya zumba vbafuvbi ni Aroweri, khu phuvbo ga nyamudye nya lidhoropa li guromo vbakari nya kova wa Gadhi, vbafuvbi ni Jazeri.

⁶Khu hwane, va di hongola Gileyadhi, va vboha kala Kadesi tigoni nya Vahiti; va hongola kala Dhani-Jahani ni vbafuvbi ga Sidhoni.

⁷Khavbo avbo, va di vboha likhokholani la Tiro, ni madhoropani yatshavbo ya Vahevhi ni ya Vakhanani; avbo va nga ya khugago va hongola phuvbo ga Marandzi ga Judha, a gu Bherisebha.

⁸Kharati, va di gimbilagimbila tigoni gwatshavbo; khu hwane nya livbandre na mina migima ni magumavili matshigu, va di bwelela Jerusalema.

⁹Jowabhi a di ningela ga mufumeli tengo nya vathu va nga sayedwago; tigoni ga Israyeli gu diri ni livbandre na mararu magumi magumi mazana (800.000) vama va somidego guya dwana nyimbi; va na Judha va diri livbandre magumi magumi mazana (500.000) vama.

¹⁰Hwane nya gu bani na sayede vathu, Dhavhidhe a di vetwa khu livhalo a vbisega monyoni gwaye; Dhavhidhe a ganela ga PFHUMU Nungungulu, khuye: “Nyi ghohide ngudzu khesi nyi giridego, gasi olu uwe PFHUMU Nungungulu, nyi ngu gu lomba gukheni u duse guvivba ga githumi gyago, kholu nyi thumide silo nya wupumbu ngudzu.”

¹¹Khu litshigu li landrelago na gu ngari dzimindru, gu dita ga Dhavhidhe magana ya PFHUMU Nungungulu khu ga muprofeti Gadhi, mutuguli nya misihalo wa Dhavhidhe, a mu embela, khuye:

¹²“Indra u ya embela Dhavhidhe, khuwe: PFHUMU Nungungulu a ngu ganela kharati, khuye: Silo siraru nyi gu ningago, hatha gimwegyo nya iso gasi u gire.”

¹³Khu guralo, a dita Gadhi ga Dhavhidhe, ata mu pwadzela, a mu embela, khuye: “U ngu dzina gukhuwe gu manega ndzala livbandre na mivili myaga tigoni gwago; mwendro gu tutumiswa khu valala vago ndrani nya migima miraru na va gu lundra; mwendro ndrani nya matshigu mararu, gu manega tungu tigoni gwago, gani? Olu pimisa phindrulo muni nyi na gu bwelelago nayo nyi ya ninga wule a nyi rumidego.”

¹⁴Khavbo avbo, Dhavhidhe a di embela Gadhi, khuye: “Nyi womo vbakari nya wuvi nya wukhongolo, hi na thegeleni mandzani ga PFHUMU Nungungulu, kholu wuhindzi waye wungi ngudzu, gasi nyi si thegeli mandzani ga vathu.”

¹⁵Khavbo avbo, PFHUMU Nungungulu, a di rumela tungu nya gusonge tigoni ga Israyeli, wu di bela gukhugela vbadzimindrutunu kala gikhati gi emisedwego, gukhugela Dhani kala Bherisebha, gu difa livbandre na mavili magumi mazana (70.000) vama va tigoni.

¹⁶Avbo Ngilozi yi nga khusedzago mandza yaye vbatshani ga Jerusalema, gasi gu li mbembisa, PFHUMU Nungungulu a di dzi laya khu guvivba gule, a embela Ngilozi nya gumbembise vathu, khuye: “Basi, olu dusa mandza yago.” Ngilozi ya PFHUMU Nungungulu yi diri vbafuvbi ni githala gya Arawuna, mujebhuzi.

¹⁷Avbo Dhavhidhe a nga wona Ngilozi nya gumbembise vathu, a di ganela ga PFHUMU Nungungulu, khuye: “Wona, kheni nyi ghohidego, kheni nyi giridego guvivba gwatshavbo gogu; gasi dzinvuta dzedzi, ginani dzi ghohidego? Gyandza gyago, gi na vete eni gumogo ni ndranga ya babe wangu.”

¹⁸Khu litshigu lolo, a dita Gadhi, ga Dhavhidhe, ata mu embela, khuye: “Khuga u gwela u ya vbaha giluvelo gya PFHUMU Nungungulu, vbagithalatunu gya Arawuna, Mujebhuzi.”

¹⁹Dhavhidhe a di gwela mayelano ni gu ganela ga Gadhi, kha nga idzo a leletedego khidzo PFHUMU Nungungulu.

²⁰Arawuna a di khusa maho a wona mufumeli gumogo ni sithumi saye na guta avbo gwaye; Arawuna a di duga aya khidzima mbeli ga mufumeli, a tsitsa vbavbatshi khu khovbe.

²¹Arawuna a di ganela, khuye: “Ginani u gi tisago mufumeli ni mune wangu ndrangani ga githumi gyago?” Dhavhidhe a di mu hakha, khuye: “Nya gu tela guta renga githala gegi, gasi nyi emisa avbo giluvelo gya PFHUMU Nungungulu, gasi li kodze guvbindra libango leli ga vathu.”

²²Khavbo avbo, Arawuna a di embela Dhavhidhe, khuye: “Mufumeli ni mune wangu, dzega, u nyi ninga iso u si wonago na si gu fanela mahoni gwago; dzimombe nya miphaselo nya gugire khidzo miphaso nya guvbiswe; idzodzo, dzikareta ni kanga nya gugire khuye dzikhuni.”

²³Arawuna a di ningela satshavbo sesi ga mufumeli, a engedza a embela mufumeli, khuye: “PFHUMU Nungungulu wago a na gu hakhe!”

²⁴Aholu, mufumeli a di embela Arawuna, khuye: Ahihi, isoso khandri iso, nyi embele tengo u wu vbwetago nyi na renga khuwo, kholu kha nyi vbweti gu gira ningelo ga PFHUMU Nungungulu wangu, phaselo nya guvbiswe nyi ngamba livba khuwo gilo. Khavbo avbo, Dhavhidhe a di renga githala ni dzimombe khu livbandre magumi dzisikulu nya parata.

²⁵Dhavhidhe a di vbaha vbale, giluvelo gya PFHUMU Nungungulu, a ningela avbo miphaselo nya guvbiswe, ni miningelo nya gurule. Khavbo avbo, likhulo la PFHUMU Nungungulu li di bosa, tigoni gu vbela tungu wule a nga reselago va na Israyeli.