Read gitonga 2 Samuweli 5 Bible Online

2 Samuweli 5 - gitonga bible

2 Samuweli 5

¹Mahundzu yatshavbo ya na Israyeli ma dita ga Dhavhidhe, dhoropani ga Hebroni, ma ta ganela naye, khayo: “Ethu hi marambo yago ni nyama yago.

²Gukhugela matshigu ya gale, na nga gu fuma Sawule, khuwe u nga bani nu thangela va na Israyeli gu ya dwana nyimbi, PFHUMU Nungungulu nuye a di gu embede, khuye: “Uwe u na havisa vathu vangu va na Israyeli, u na khala muthangeli wawe.

³Khu guralo, ma dita Hebroni ga mufumeli, madhota yatshavbo ya na Israyeli; Dhavhidhe a di gira navo gidzumeledzwano mbeli ga PFHUMU Nungungulu dhoropani ga Hebroni; va todza Dhavhidhe khu mafura, gu khala mufumeli wa Israyeli.

⁴Dhavhidhe gikhati a phedego gu fuma a diri ni magumararu myaga, fumide magumana myaga.

⁵ A fumede va na Judha dhoropani ga Hebroni livbandre na mivili myaga ni livbandre na moyo migima, a fumela Jerusalema magumararu na miraru myaga va na Judha ni Israyeli watshavbo.

⁶ Mufumeli Dhavhidhe ni vathu vaye, va diya Jerusalema va ya dwana ni Vajebhuzi va nga bani va vbahide tigoni mule. Aholu, avo va di embela Dhavhidhe, khavo: “Gima khu na nga bela avba, kholu ambari sikhumu ni silima, si na gu lundra.” Isoso va di ganela na va gu vbweta gukhavo Dhavhidhe kha na nga bela dhoropani.

⁷Aholu Dhavhidhe a di va pala a wandra likhokhola la Siyoni, a gu ilo Didhoropa la Dhavhidhe.

⁸Khu litshigu lolo Dhavhidhe a di ganela, khuye: “Gani khu mani a na saselago Vajebhusi, kala a vboha gifefetunu nya mati, ga sigoha ni sikhumu saye esi si vengwago khu Dhavhidhe!” Khavbo gu nga ganedwa, pwani: “Ambari gikhumu ni gilima kha gi na bela ndrangani momu.”

⁹Khu guralo, Dhavhidhe a di khala ndrani nya likhokhola a li rana khuye Didhoropa la Dhavhidhe; Dhavhidhe a di vbaha maphuvbo yatshavbo nya likhokhola, gukhugela Milo kala ndrani gakone.

¹⁰Khu magirelo yaya, Dhavhidhe a di ya na gu engedzelana gudandra, kholu PFHUMU Nungungulu nya Tshivba Yatshavbo, a diri ni uye.

¹¹Hiramo, mufumeli wa Tiro, a di rumela myango ga Dhavhidhe, ni mapulango nya sena, ni vameseri nya guvate ni vavbahi, va ta vbahela nyumba Dhavhidhe.

¹²Khavbo avbo, Dhavhidhe a di pima gukhuye PFHUMU Nungungulu a mu tiyiside gu khala mufumeli wa Israyeli, ni gu khusedza mufumo waye khu kotani nya lihaladzo ni vathu vaye.

¹³Dhavhidhe gikhati a nga wuyago khu Hebroni, a di dzega gambe simbe sibhayi ni vanyamayi va Jerusalema, va mu velegela gambe sanana nya sikhwathana ni sagadzyana.

¹⁴Malina nya sanana a velegidego Jerusalema khaya: “Samuwa, Sobhabhi, Natane, Solomoni,

¹⁵Ibhari, Elisuwa, Nefegi, Jafiya,”

¹⁶Elisama, Eliyadha ni Elifeleti.

¹⁷Avbo Vafilistiya va nga pwago gupwani Dhavhidhe wumbedwe gu khala mufumeli wa Israyeli, Vafilistiya vatshavbo va di gwela gu ya vbweta Dhavhidhe; avbo Dhavhidhe a si pwidego, a di relela mulikhokholani.[6]

¹⁸Vafilistiya, va di ta mbambamela kovani wa Refayimi.

¹⁹Khavbo avbo, Dhavhidhe a di wudzisa PFHUMU Nungungulu, khuye: “Ina nyi ngu yela gu dwana ni Vafilistiya, gani? U na va ningela mandzani gwangu, gani?” PFHUMU Nungungulu a di mu hakha, khuye: “Indra, khu lisine Eni nyi na va ningela mandzani gwago.”

²⁰Dhavhidhe a di ya Bhahali-Perazimi;[7] aya va sasela iyoyo a ganela, khuye: “PFHUMU Nungungulu phalalegiside valala vangu gu fanana ni mati ma gu phusuga ma goga.” Khu guralo, a di rana wulanga wule khuye Bhahali-Perazimi.

²¹Va di tshiya vbale sifananiso nya vanungungulu vawe; si dzegwa khu Dhavhidhe ni vathu vaye.

²²Vafilistiya va di engedza gambe va ta mbambamela kovani wa Refayimi.

²³Dhavhidhe a di wudzisa gambe ga PFHUMU Nungungulu; Pfhumu, khuye: U nga va khingi, aholu dzuwuluga khu hwane gwawe, u na ya tshangana navo misimboni nya mimorya.

²⁴Avbo u na pwago ligwaha nya gugimbile vbatshani nya misimbo nya mimorya; u na duga khu guvbiredza, kholu khu gikhati gyogyo, PFHUMU Nungungulu a na bani a thangide mbeli gwago gu ya sasela mabutho nya Vafilistiya.

²⁵Dhavhidhe a di gira idzo PFHUMU Nungungulu a nga mu leletelago khidzo, a sasela Vafilistiya gukhugela Gibheya kala gu vboha Gezeri.