Read gitonga 2 Samuweli 9 Bible Online

2 Samuweli 9 - gitonga bible

2 Samuweli 9

¹ Dhavhidhe a di ganela, khuye: “Ina mwalo a tshadego wa nyumbani ga Sawule gasi nyi mu girela wuhindzi khu kotani nya lihaladzo nyi nga giredwago khu Jonatane, gani?”

²Gu diromo moyo nya githumi gya nyumbani ga Sawule a nga bani a ranwa gupwani Zibha; va di ya mu rana ata ga Dhavhidhe. Mufumeli a di mu wudzisa, khuye: “Ina khuwe Zibha, gani?” Uye a di hakha, khuye: “Eni kamwe kheni githumi gyago.”

³ Mufumeli a di mu embela, khuye: “Ina kha tshala muthu wa nyumbani ga Sawule gasi eni nyi fela gu yeyedza gwaye wuhindzi wa Nungungulu, gani? Zibha a di hakha, khuye: “Gu tshade mwamana moyo wa Jonatane, nya gigoha a hasidego mawundru.”

⁴Mufumeli a di mu wudzisa, khuye: “Womo hayi?” Zibha a hakha, khuye: “Womo ndrangani ga Makiri, mwamana wa Amiyeli, tigoni ga Lo-Dhebhari.”

⁵Khavbo avbo, mufumeli Dhavhidhe a di rumela vathu gu ya mu dzega ndrangani ga Makiri, mwamana wa Amiyeli tigoni ga Lo-Dhebhari.

⁶Mefibhoseti, mwamana wa Jonatane, wa Sawule, a dita ga Dhavhidhe, ata khidzima a thega khu khovbe mafuni a yeyedza githawo. Dhavhidhe a di mu rana, khuye: “Mefibhoseti.” Uye a di hakha, khuye: “Nyi womo avba, eni githumi gyago!”

⁷Khavbo avbo, Dhavhidhe a di mu embela, khuye: “U nga thavi, nya gu vbweta gu gu girela wuhindzi, khu kotani ya babe wago Jonatane, nyi na gu bweledzela wulime watshavbo wa kokwe wago Sawule, gasi uwe nyi na hodza nago mbiyani gwangu gikhati gyatshavbo.”

⁸Khavbo avbo, a di noga, khuye: “Kheni mani eni githumi gyago, nya gukala u khedza yimbwa nya gufe nya nga eni?”

⁹Dhavhidhe a di rana Zibha, githumi gya Sawule, a mu embela, khuye: “Satshavbo si nga bani si lumba Sawule, ni ndranga yaye yatshavbo, nyi si ningede ga mwamana wa mune wago.

¹⁰U na mu limela marembwe, uwe ni sanana sago, ni sithumi sago, u vbwera mihandro yakone, gasi ndranga ya mune wago yi si hamugi guhodza; aholu Mefibhoseti, mwamana wa mune wago, uye nyi na hodza naye vbamezatunu gwangu. Zibha a diri ni likhumi na livbandre sanana ni magumavili sithumi.

¹¹Zibha a di embela mufumeli, khuye: “Kha nga idzo mufumeli ni mune wangu a rumago khidzo, githumi gyago gi na gira kharato.” Khavbo avbo, Mefibhoseti a di hodza vbamezatunu ga Dhavhidhe, kha nga moyo nya sanana sa mufumeli.

¹²Mefibhoseti a diri ni gyanana nya gidugwane, gi nga bani gi ranwa khu lina la Mika. Vatshavbo va nga bani vari ndrangani ga Zibha, va diri sithumi sa Mefibhoseti.

¹³Mefibhoseti a di khala Jerusalema, a hodza vbamezatunu ga mufumeli gikhati gyatshavbo. Uye a diri gigoha nya guhase mawundru.