Read gitonga 1 Dzipfhumu 1 Bible Online

1 Dzipfhumu 1 - gitonga bible

1 Dzipfhumu 1

¹Avbo Dhavhidhe, a nga bani a gumbide ngudzu, nari ni matshigu nya gutale, va di mu fenengedza khu myendra, aholu uye a di si furumeli.

²Khavbo avbo, sithumi saye si di ganela, khiso: “Vbwetelani mufumeli, mune wathu, nyamahegyane nya likendzi, a ta khala vbafuvbi ga mufumeli, afela gu mu sayisa, a lala vbakhanatunu gwaye, gasi uye a mane gufurumela.”

³Va di vbweta nyamahegyane nya gumbure tigoni gwatshavbo gwa Israyeli, vaya mana Abhisagi, nya Musumani, va mu resa ga mufumeli.

⁴A diri mbiri nya wumburi ngudzu. A di sayisa mufumeli ni gu mu thumela; aholu mufumeli gima kha nga hengela naye malawu.

⁵Khavbo avbo, Adhoniya, mwamana wa Hagiti, a di khuga na tade khu matshandza a ganela, khuye: “Eni kheni nyi na fumago.” A di dongisela dzikareta ni vakhileli nya dzikavalu, ni livbandre magumi vama, gasi avo va tutuma mbeli gwaye.

⁶Babe waye gima kha nga mu kawuka, khuye: “Gasi ginani u girago isoso?” Uye nuye a di wonega na mburide ngudzu, a diri nandra wa Abhisalamo nya guvelegwe khu Hagiti.

⁷A di pwanana ni Jowabhi mwamana wa Zeruwa, gumogo ni muphasi nya mhamba Abhiyatari, va nga bani vari va tsawa waye.

⁸Aholu muphasi nya mhamba Sadhoki, ni Bhenaya mwamana wa Joyadha, ni muprofeti Natani, ni Simeyi, ni mufumeli, ni dzindrena dzi nga bani dziri ni Dhavhidhe, va diri mwalo gumogo ni Adhoniya.

⁹Adhoniya a di songa dzinvuta, dzimombe ni simombyana a gira miphaso vbafuvbi nya giwindri gya Zoweleti, gi guromo vbafuvbi ni nambo wa Rogeli; a ramba vandriyaye vatshavbo, sanana sa mufumeli, ni vathu vatshavbo va Judha, va nga bani vari sithumi sa mufumeli.

¹⁰Aholu, kha nga rana muprofeti Natani, Bhenaya, dzindrena ni ndriyaye Solomoni.

¹¹ Khavbo avbo, Natani a di embela Bhate-Sebha, mayi wa Solomoni, khuye: “Khwa dzipwa gilo nya gupwani Adhoniya, mwamana wa Hagiti, a ngu fuma, mufumeli wathu Dhavhidhe, na si dziti, gani?

¹²Olu, delu, nyita gu ninga wusingalagadzi, gasi u kodze gu vbanyisa womi wago, gumogo ni wa mwanago Solomoni.

¹³Indra u ya bela ga mufumeli Dhavhidhe, u mu embela, khuwe: Gasi uwe mufumeli, mune wangu, kha wa sambanya ga eni githumi gyago, khuwe: Khu lisine mwanangu Solomoni, khuye a na gu fumago hwane gwangu, uye a na khala vbagikhalotunu gwangu nya wufumu, gani? Khu ginani, olu, Adhoniya a fumago.

¹⁴Wona, nu nga guganela naye mufumeli, eni neni nyi na bela khu hwane gwago, nyita tadzisa magana yago.”

¹⁵Bhate-Sebha a di bela makhuvini ga mufumeli; mufumeli a di gumbide ngudzu; uye a di gu sayiswa khu Abhisagi, Musumani.

¹⁶Bhate-Sebha, a di noga a yeyedza githawo mbeli ga mufumeli; Uye a di mu wudzisa, khuye: “Wa guvbweta ginani?”

¹⁷Uye a di khuye: “Mune wangu, uwe u sambanyide ga eni githumi gyago, khu PFHUMU Nungungulu wago, khuwe: Mwanangu Solomoni, a na fuma hwane gwago, ni gu uye a na khala vbagikhalotunu gwago nya wufumu.

¹⁸Gasi olu, wona nya gukhuwe Adhoniya a ngu fuma, uwe pfhumu, mune wangu, nu si dziti.

¹⁹Uye duside miphaso a songa dzimombe, ni simombyana nya gunone, ni dzinvuta nya gutale, a ramba satshavbo sanana sa mufumeli, ni muphasi nya mhamba Abhiyatari, ni muthangeli nya nyimbi Jowabhi; aholu githumi gyago Solomoni, kha gi ramba.

²⁰Gasi olu uwe mufumeli wangu, maho yatshavbo ya Israyeli ma gu khevisela uwe, gasi u va embele khu mani a na khalago vbagikhalotunu gwago nya wufumu hwane gwago, uwe mufumeli, mune wangu.

²¹Kholu wa gumba ganela, gikhati uwe pfhumu ni mune wangu, u na guya lalago gumogo ni vavelegi vago, eni ni mwanago Solomoni, hi na sayedwa kha nga sighohi.”

²²Uye, na nga guganela ni mufumeli, a di vboha muprofeti Natani.

²³Va di tivisa mufumeli, va mu embela gukhavo: “Muprofeti Natani womo avba.” A di bela, aya ema mbeli ga mufumeli, a noga a yeyedza githawo a tsitsa vbavbatshi khu khovbe.

²⁴Natani a di ganela, khuye: “Uwe mufumeli, mune wangu, Ina u ganede uwe, khuwe: Adhoniya khuye a na gu khalago a fuma vbagikhalotunu gwago nya wufumu hwane gwago, gani?

²⁵Kholu uye muhuno relede aya ningela miphaso a paya dzimombe ni simombyana nya gunone, ni dzinvuta nya gutale. Rambide satshavbo sanana sa mufumeli, ni vathangeli nya masotshwa, ni muphasi nya mhamba Abhiyatari, olu va gu hodza, va sela gumogo naye na va gu ganela, khavo: A na vbanye mufumeli Adhoniya!

²⁶Aholu eni nyi gu githumi gyago, ni muphasi nya mhamba Sadhoki, ni Bhenaya mwamana wa Joyadha, ni githumi gyago Solomoni, kha hi rana.

²⁷Ina kamwe khuwe mufumeli, mune wangu, u giridego isoso nyamba pwadzela githumi gyago khuwe, khu mani a na gu khalago vbagikhalotunu nya wufumu wago, uwe mufumeli ni mune wangu, gani?”

²⁸Mufumeli Dhavhidhe a di hakha, khuye: “Nyi raneleni Bhate-Sebha.” Uye a di bela a ta ema mbeli ga mufumeli.

²⁹Khavbo avbo, mufumeli a di sambanya a ganela, khuye: “Nyi ngu sambanya khu PFHUMU Nungungulu a vbanyago, uye a nga dzegisa hefemulo wangu wuvini gwatshavbo,

³⁰gukheni, muhuno kamwe nyi na gira iso nyi gu sambanyedego mbeli ga PFHUMU Nungungulu wa Israyeli, kheni: Khu lisine mwanago Solomoni a na fuma hwane gwangu, khuye a na gu khalago vbagikhalotunu gwangu nya wufumu, a tshikhedza wulanga wangu, nyi na gira kharato litshigu la muhuno.”

³¹Khavbo avbo, Bhate-Sebha a di noga, a thega khu khovbe mafuni, a ninga githawo mufumeli, a ganela, khuye: “A na vbanye mufumeli Dhavhidhe, mune wangu, kala gupindruga.”

³²Mufumeli Dhavhidhe a di rumela gukhuye: “Nyi raneleni muphasi nya mhamba Sadhoki, muprofeti Natani ni Bhenaya, mwamana wa Joyadha.” Va di bela va ta ema mbeli ga mufumeli.

³³Mufumeli a di va embela, khuye: “Indrani mu ya dzega sithumi sa mune wanu mu ya naso gumogo, mu ya khiledza mwanangu Solomoni vbamulatunu gwangu, mu mu reledza Giyoni.

³⁴Iyoyo, muphasi nya mhamba Sadhoki, ni muprofeti Natani, va naya mu todza khu mafura a khala mufumeli wa na Israyeli. Khavbo avbo, mu na womba pundru mu ganela, khenu: A na vbanye mufumeli Solomoni!

³⁵Khu hwane, deluni naye, uye a na ta khala vbagikhalotunu gwangu nya wufumu, uye a na fuma wulangani gwangu. Eni nyi ngu mu emisa gu a fumela Israyeli ni Judha.”

³⁶Khavbo avbo, Bhenaya, mwamana wa Joyadha, a di hakha, khuye: “Si na girege kharato! PFHUMU Nungungulu wa mufumeli, mune wangu, a na si tiyise.

³⁷Kha nga olu PFHUMU Nungungulu a nga bani nari ni mufumeli, mune wangu, uye a na khale gambe ni Solomoni gasi uye a mane mufumo nya wudhumo, guvbindra mufumo wa mune wangu, Dhavhidhe.”

³⁸Khavbo avbo, muphasi nya mhamba Sadhoki, muprofeti Natani, Bhenaya, mwamana wa Joyadha, Vakereti ni Vapeleti va di relela vaya khiledza Solomoni vbamulatunu ya mufumeli Dhavhidhe, vaya naye Giyoni.

³⁹Muphasi nya mhamba, Sadhoki, a di bela tshatshani aya dzega kheho nya mafura a todza Solomoni. Khu hwane va di womba pundru, vathu vatshavbo va di ganela, khavo: “A na vbanye mufumeli Solomoni.”

⁴⁰Vathu vatshavbo va di mu landrela khu hwane, na va gu womba misengele va tsaka khu gunengela ngudzu, ni litigo li di nyenganyenga khu ligwaha lawe.

⁴¹Adhoniya ni vathu vaye vatshavbo a nga bani na va rambide, na va vbedzide guhodza, va dipwa ligwaha nya gunengele gogo. Jowabhi nuye na pwide ligwaha nya pundru, a di wudzisa, khuye: “Khya ginani ligwaha leli ni nyenganyenga yeyi dhoropani?”

⁴²Na nga guganela, wona a dita Jonatane, mwamana wa muphasi nya mhamba Abhiyatari, Adhoniya a di mu embela, khuye: “Bela, uwe u mwama nya ndrena u resago mahungu nya yadi!”

⁴³Jonatane a di hakha Adhoniya, khuye: Mufumeli ni mune wathu Dhavhidhe, emiside Solomoni gu khala mufumeli.

⁴⁴Mufumeli rumide muphasi nya mhamba Sadhoki, ni muprofeti Natani, ni Bhenaya mwamana wa Joyadha, Vakereti ni Vapeleti, va mu khiledza vbamulatunu ya mufumeli.

⁴⁵Muphasi nya mhamba Sadhoki, ni muprofeti Natani, va mu todzide hungoni khu mafura gifefeni gya Gidheyoni. Va khuga khiyoyo va gwela dhoropani na va tsakide, lidhoropa lomo khu nyenganyenga, khilo ligwaha u li pwidego.

⁴⁶Gu diga nya isoso, Solomoni khade vbagikhalotunu nya wufumu.

⁴⁷Ambari ni dzindruna dza mufumeli, dzi dzude dzi ta losa mune wathu, mufumeli Dhavhidhe, dzi mu embela, khidzo: “Nungungulu wago a na gire lina la Solomoni li pwala ndruma guvbindra lina lago, ni mufumo waye wu na andre guvbindra uwo wago. Khavbo avbo, mufumeli a di noga vbadawutunu gwaye.

⁴⁸Mufumeli a di ganela gambe, khuye: A na bongwe PFHUMU Nungungulu wa Israyeli, a dzinidego gukhuye maho yangu muhuno nyi wone uye a tshinyidzago vbagikhalotunu gwangu nya wufumu.”

⁴⁹Na va pwide isoso, vatshavbo va nga bani va rambidwe khu Adhoniya va di tala khu hwanga va phalalega.

⁵⁰Aholu Adhoniya, khu guthava Solomoni, a di hongola aya mola dzikheho nya giluvelo.

⁵¹Khavbo avbo, va di ya tivisa Solomoni, khavo: “Adhoniya a ngu thava Solomoni, hongode aya mola dzikheho nya giluvelo. Uye a gu ganela kharati, khuye: Solomoni a na sambanye gukhuye kha na songa githumi gyaye khu litshari.”

⁵²Solomoni a di hakha, khuye: “Uye a gu dzi yeyedza nari muthu nya gutumbege, ni ngodzi mweyo nya ndzudzu waye kha yi na thega; aholu, gwa gu tugulega avbo gwaye wuvivbi nya gukari, uye a nafa.”

⁵³Khavbo avbo, mufumeli a di rumela masotshwa nya gukari, avo va di ya mu tshigisa khu vbagiluvelotunu. Adhoniya a di ta noga khu githawo mbeli ga mufumeli Solomoni, khavbo avbo, Solomoni a di mu embela, khuye: “Indra gaya gwago.”