Read gitonga 1 Dzipfhumu 13 Bible Online

1 Dzipfhumu 13 - gitonga bible

1 Dzipfhumu 13

¹Khu guruma ga PFHUMU Nungungulu, gu dita muthu wa Nungungulu khu Judha aya Bheteli, gikhati Jerobhowamo a nga bani nari vbagiluvelotunu gasi gu vbisa libani.

² A dita laledza vbagiluvelotunu khu magana ya PFHUMU Nungungulu, khuye: “Giluvelo, giluvelo! PFHUMU Nungungulu, a ngu ganela kharati, khuye: Khumo nya lihundzu la Dhavhidhe, gu na velegwa gyanana gi na ranwago pwani Josiya, uye a na songa vbatshani gwago, vaphasi nya mhamba va malangani nya sigomo va gu vbiselago libani, va na gu vbisela khu marambo nya vathu.”

³Khu litshigu lile kamwe, muthu wa Nungungulu a di gira giwonegiso, khuye: “Egi khu giwonegiso PFHUMU Nungungulu a ganedego, khuye: Giluvelo gi na pandrega, ni nguma wu guromo vbatshani nya igyo wu na vbiyedwa.”

⁴Avbo mufumeli Jerobhowamo, a nga yingisago magana ya muthu wa Nungungulu a nga bani na gu ma huwelela khu giluvelo gya Bheteli, a di thawuludza mandza vbagiluvelotunu a rumela, khuye: “Mu moleni!” Aholu libogo a nga li thawuludzago, li di khwanyela li banga nyamba petega gambe.

⁵Giluvelo gi di pandrega, nguma wu vbalaga, kha nga giyeyedzo gi nga girwago khu muthu wa Nungungulu, na gu rumedwa khu PFHUMU Nungungulu.

⁶Khavbo avbo, mufumeli a di embela muthu wa Nungungulu, khuye: “Lombelela mbeli ga PFHUMU Nungungulu wago, u lombelela khu eni, gasi libogo langu li tshulega.” Muthu wa Nungungulu a di mu lombelela ga PFHUMU Nungungulu, libogo la mufumeli li di hawuluga li khalega kha nga gale.

⁷Mufumeli a di embela muthu wa Nungungulu, khuye: “Hongole gaya gwangu u ya hodza gilogyo, nyi na gu ninga tshatshazelo,”

⁸Aholu muthu wa Nungungulu a di phindrula mufumeli, khuye: Ambari nari gupwani u di nyi ninga gipandre nya ndranga yago, gima nya sa dzumela gu hongola nago, ambari gu hodza guhodza ni gu sela mati wulanga wowu.

⁹Kholu PFHUMU Nungungulu a nyi leletede kharati khu magana yaye, khuye: “U nga hodzi guhodza, ni gu sela mati ni gu wuya khu ndzila u nga hongolago khiyo.”

¹⁰Khu guralo, a di bwelela khu yimbe ndzila nyamba bela khiyo a nga hongolago khiyo Bheteli.

¹¹A di guvbanya Bheteli muprofeti moyo nya gikhosane, sanana saye si dita mu embeledzela satshavbo si nga girwago khu muthu wa Nungungulu litshigu lile Bheteli gumogo ni magana a nga embelago mufumeli.

¹²Babe wawe a di va wudzisa, khuye: “Khu yevbini ndzila a bedego, khiyo?” Sanana saye si di mu yeyedza ndzila a bedego khiyo muthu wa Nungungulu a ngatago khu Judha.

¹³Khavbo avbo, a di embela sanana saye, khuye: “Nyi ghabhateseleni buru yangu.” Va di mu ghabhatesela, a yi khilela.

¹⁴A di landra muthu wa Nungungulu, aya mu mana na khade vbavbatshi nya nguhu, a mu embela, khuye: “Khuwe muthu wa Nungungulu u dzudego khu tigoni ga Judha, gani?” Uye a di hakha, khuye: “Kheni.”

¹⁵Khavbo avbo, muprofeti a di mu embela, khuye: “Hongole gaya gwangu u ya hodza gilogyo.”

¹⁶Muthu wa Nungungulu a di ganela, khuye: “Kha nyi dzi kodzi gu hongola nago, nyiya hodza, ambari gu sela mati wulangani wowu.”

¹⁷Magana ya PFHUMU Nungungulu ma nyi ningide sileletelo sesi, khayo: U nga hodzi ambari gu sela mati ga wulanga wowu, ambari ni gu wuya khu ndzila u nga hongolago khiyo.

¹⁸Aholu muprofeti nya gikhosane a di mu embela, khuye: Eni neni nyi muprofeti, ngilozi yi nyi embede khu magana ya PFHUMU Nungungulu, khiyo: Mu bweledze u wuya naye gaya gwago, gasi uye a ta hodza guhodza ni gu sela mati, aholu uye a di gu mu liphela.

¹⁹Muthu wa Nungungulu a di bwelela naye, aya hodza ni gusela mati ndrangani gwaye.

²⁰Na vari vbamezatunu, lito la PFHUMU Nungungulu li dita ga muprofeti a nga mu bweledzago,

²¹li laledza ga muthu wa Nungungulu a ngatago khu Judha, khilo: PFHUMU Nungungulu a ngu ganela kharati, khuye: “Kha nga olu u yeyisidego magana ya PFHUMU Nungungulu, u si sayisi sirumo esi PFHUMU Nungungulu wago, a gu rumidego;

²²u bwelela u ya hodza ni gu sela mati wulangani nyi nga gu embela, kheni: U nga hodzi guhodza ambari gu sela mati, girumbi gyago kha gi na dzingwa thowoni ga vavelegi vago.”

²³Khu hwane nya gu bani na hodzide guhodza ni gu sela mati, muprofeti a nga mu bweledzago a di ghabhata buru gasi gu mu bweledza khiyo.

²⁴A di hongola, nari ndzilani, a di dhumedwa khu nghala yi mu songa, girumbi gyaye higyo labalaba ndzilani, gasi buru yi di simama yi ema ndzilani vbafuvbi gwaye, nghala na yi khade vbafuvbi nya girumbi.

²⁵Gu di vbindra khu vbale vathu nya gukari, va di wona girumbi gyaye na gi de tshandzala ndzilani, gumogo ni nghala yi nga bani na yiri vbagirumbitunu, va dita ganela dhoropani umo a nga bani na guvbanya umo muprofeti nya gikhosane.

²⁶Muprofeti a nga mu bweledzago na pwide mahungu yaya a di ganela, khuye: “Uyoyo khu muthu wa Nungungulu a nga hambanisago magana ya PFHUMU Nungungulu! PFHUMU Nungungulu a di mu ningela a songwa khu nghala, kha nga idzo magana ya PFHUMU Nungungulu ma nga bani ma mu leletede khidzo.

²⁷Muprofeti a di embela sanana saye, khuye: “Nyi ghabhateseleni buru yangu.” Avo va di yi ghabhatisa.

²⁸Khavbo avbo, uye a di hongola aya mana girumbi na gi di tshandzala vbakari nya ndzila, buru ni nghala na si emide vbafuvbi ni girumbi; nghala kha ya nga hodza mili nya muthu, ambari buru gu vbadzuledwa khu nghala.

²⁹Muprofeti a di dzega girumbi gya muthu wa Nungungulu a gi vega vbatshani nya buru a bwelela nagyo dhoropani ga Bheteli gasi guya mu lila ni gu mu dzinga.

³⁰Uye a di vega girumbi phalani a nga bani a li dongisede gudzingwa umo, va mu lila, na gu ganela, khuye: “Oh! Ndriyangu!”

³¹Hwane nya gu bani na mu dzingide, a di embela sanana saye, khuye: “Nya gufa nyi dzingeni neni phalani a dzingidwego umo muthu wa Nungungulu, marambo yangu ma vegeni gumogo ni marambo yaye.

³²Kholu ma na tadzisega magana ya PFHUMU Nungungulu a nga huwelelago khu mahungu nya giluvelo gi guromo Bheteli, gumogo gambe ni dzinyumba dzatshavbo dzi guromo musigomoni sa madhoropani ga Samariya.”

³³Ambari khu hwane nya guwone silo sesi, Jerobhowamo kha nga diga ndzila yaye nya guvivbe, uye a di hatha vbakari nya vathu nya vanyalidede a va gira vaphasi nya mhamba va malangani nya sigomo, a hatha uye a mu golago gu khala muphasi nya mhamba wa malangani nya sigomo.

³⁴Egi khigyo givangelo nya gighoho nya ndranga ya Jerobhowamo, gu kala yi mbembiswa ni gu fuviswa mafuni.