Read gitonga 1 Dzipfhumu 17 Bible Online

1 Dzipfhumu 17 - gitonga bible

1 Dzipfhumu 17

¹ Khavbo avbo, Eliya wa Tesibe, a nga bani a vbanyela Gileyadhi, a di embela Akabi, khuye: “Nyi ngu sambanya khu PFHUMU Nungungulu wa Israyeli a vbanyago, oyu nyi mu thumelago, kheni: Khu matshigu yaya, gima kha ya nawa ndzadzi, ambari gu thega thondrwane eni nya gumba ganela gilo.”

²Khu hwane, lito la PFHUMU Nungungulu li dita gwaye lita mu embela, khilo:

³“Khuga avba, u hongola Khugadambo, u ya dzi sihadza vbafuvbi ni gitsongwana gya Keriti, gi guromo khu tshatugo nya tsongo wa Joridhani.

⁴U na sela umo mati; eni nyi leletede va nyamahigonganye gasi vata gu ninga guhodza.”

⁵Khu kharato, uye a di hongola, kha nga guleletela ga PFHUMU Nungungulu, aya khala bambe nya gitsongwana gya Keriti, gi guromo vbafuvbi ni Joridhani.

⁶Vanyamahigonganye vadi mu resela guhodza ni nyama vbadzimindrutunu ni vbasilambotunu, a sela mati nya gitsongwana.

⁷Na ma vbindride matshigwana, tsongo wu divbwa; kholu kha ga ngawa ndzadzi tigoni.

⁸Khavbo avbo, lito la PFHUMU Nungungulu li dita avbo gwaye, khilo:

⁹ “Khuga, u hongole tigoni ga Sarepita wa Sidhoni, u ya khala iyoyo; nyi leletede nyamayi nya noni gasi a ta gu ninga guhodza.”

¹⁰Khavbo avbo, uye a di khuga a hongola tigoni ga Sarepita. Na vbohide nyangwani nya lidhoropa, nyamayi nya noni a di romo vbale a rola dzikhuni; a di mu rana a mu embela, khuye: “Nyi ngu gu lomba, nga nyi regela mati khumo nya kanvu nyi sela.”

¹¹Na nga gu hongola aya rega mati, muprofeti a di mu rana a mu embela, khuye: “Gira wuhindzi u nyi resela gambe ni gipandre nya gibaba khu mandzani gwago.”

¹²Aholu nyamayi a di mu embela, khuye: “Nyi ngu sambanya khu womi wa PFHUMU Nungungulu wago, kheni: Nyi mwalo gilo, ambari ni kati moyo basi, vbavbandze basi nya wuguvbyana wudugwana omu nya gifugwana, ni mafuranyana madugwana mu gigasini. Nyi di roledzela dzikhuninyana dzedzi gasi nyi bwelela gaya, nyi ya phula sidugwana sesi si tshadego, nyi hodza eni ni gyanana gyangu, khu hwane hi khedzisela gufa basi.”

¹³Eliya a di mu embela, khuye: “U nga thavi gilo, indra gaya uya gira kha nga idzo u ganedego. Aholu khu esi u gu naso, phela khu gu nyi girela katinyana wudugwana u nyi resela eno; khu hwane u na gira wago ni wa mwanago.

¹⁴Kholu PFHUMU Nungungulu wa Israyeli, a ngu ganela kharati, khuye: Gima kha gu na vbela wuguvbi gifugoni gwago, ni mafura kha ma na vbela mugigasini gwago, kala litshigu PFHUMU Nungungulu a na gu wisago ndzadzi mafuni.”

¹⁵Nyamayana a di hongola aya gira satshavbo a nga ganelago Eliya. Khu guralo, a di hodza uye, gumogo ni ndranga yaye ni Eliya, matshigu nya gutale.

¹⁶Wuguvbi kha wa nga vbela gifugoni, ni mafura kha ma nga vbela mu gigasini; kha nga guganela ga PFHUMU Nungungulu, a nga ganelago khu ga Eliya.

¹⁷Khu hwane nya silo sesi, gu di dwala gyanana gya nyamayi yoyu nya mune ndranga; madwali yaye ma di tshingisa ngudzu, avbo a nga bani na si kodzi ni gu hefemula.

¹⁸Nyamayi a di embela Eliya, khuye: “Gasi mahungu muni nyi gu navo eni ni uwe, muthu wa Nungungulu? U dzude avba gasi guta nyi alakanyisa sighoho sangu ni gu songa gyanana gyangu, gani?”

¹⁹Eliya a di mu embela, khuye: “Nga nyi ninga mwamana wago!” Uye a di mu dzega khu vbamarumbitunu ga mayi waye, a gwela naye vbatshani, nyumbani a nga bani na gu khala umo, aya mu ladzisa vbadawutunu gwaye;

²⁰a di lombelela ga PFHUMU Nungungulu, khuye: “Uwe PFHUMU Nungungulu wangu, ni ga noni yeyi yi nyi hakhidego, u na resa libango nya nga eli, khu gu mu songela gyanana gyaye, gani?”

²¹A di nama guraru vbatshani ga gyanana, a rana PFHUMU Nungungulu, khuye: “Uwe PFHUMU Nungungulu wangu, nyi ngu gu lomba gukheni u bweledzela gambe hefemulo wa gyanana gegi ndrani gwaye.”

²²Khavbo avbo, PFHUMU Nungungulu a di yingisa nombelo wa Eliya. Hefemulo wa gyanana wu di bwelela gambe avbo gwaye, gi vbanya nyaluphye.

²³Khavbo avbo, Eliya a di dzega gyanana a duga nagyo khu nyumbani, a tshiga a ta gi ningela ga mayi waye, khuye: “Wona, mwamana wago a ngu vbanya!”

²⁴Khavbo avbo, nyamayi a di ganela ga Eliya, khuye: “Olu nyi ngu dziti gukheni uwe u muthu wa Nungungulu, ni gukhuye; khya lisine magana ya PFHUMU Nungungulu ma dugelago khu kanani gwago.”