Read gitonga 1 Dzipfhumu 18 Bible Online

1 Dzipfhumu 18 - gitonga bible

1 Dzipfhumu 18

¹Hwane nya gu bani na ma vbindride matshigu nya gutale, khu mwaga nya wuraru, PFHUMU Nungungulu a di ganela kharati ga Eliya, khuye: “Indra dzi wonegisa ga Akabi; kholu nyi na wisa ndzadzi mafuni.”

²Eliya a diya dzi wonegisa ga Akabi. Ndzala yi di tshingide ngudzu tigoni ga Samariya khu matshigu yoyo.

³Akabi a di rana Obhadhiya, musayisi nya nyumba yaye nya wufumu, muthu a nga bani a ninga githawo PFHUMU Nungungulu.

⁴Kholu, gikhati Jezabheli a nga bani na sasela vaprofeti va PFHUMU Nungungulu, Obhadhiya a di dzega lizana (100) vaprofeti a va kabanisa khu mitsawa mivili nya livbandre magumi (50), a va siha mavbalani a va sayisa khu gu va ninga guhodza ni gu va ninga mati va sela.

⁵Akabi a di embela Obhadhiya, khuye: “Indra u dzundrulugela litigo latshavbo, ni milamboni gwatshavbo nya mati, ni mitsongo yatshavbo; mwendro saye u na mana mwasi nya guvbanyise khuwo dzikavalu ni dziburu dzathu, hi nga fedwa khu sifuyo sathu.”

⁶Khu guralo, va di kabanelana litigo khu sipandre gasi va fela gu gimbila va khedza; Akabi a di bela khu yaye ndzila, Obhadhiya nuye khu yimbe ndzila.

⁷Avbo Obhadhiya, a nga bani nari ndzilani, a di tshangana ni Eliya; na mutide, a di noga a thega khu khovbe yaye, a mu wudzisa, khuye: “Khuwe mune wangu Eliya, gani?”

⁸Uye a di mu hakha, khuye: “Kheni! Indra embela mune wago, khuwe: Eliya vbohide.”

⁹Aholu Obhadhiya a di hakha, khuye: “Gasi ginani nyi ghohidego eni, nya gukala u ningela githumi gyago mandzani ga Akabi gasi a nyi songe?

¹⁰Nyi ngu sambanya khu PFHUMU Nungungulu wago a vbanyago kheni, li mwalo litigo ambari mufumo omu mune wangu a ngamba rumela vathu gu gu vbweta, aholu va ta mu tivisa gukhavo kha va gu mana. Uye a di gurumedza mifumo ni mayigo, gu sambanya gukhavo uwe u mwalo iyo gwawe.

¹¹Ni olu u nyi embelago, khuwe: “Indra uya embela mune wago, khuwe: Eliya womo Avba.

¹²Gu ngu kodzega gu, na nyi hambanide nago, Liphuvbo la PFHUMU Nungungulu, li ta gu dzega li gu yisa umo nyi si gutigo, eni na nyi mu tiviside Akabi a wuya a si gu mani, uye a na nyi songa. Gasi eni githumi gyago, nyi ngu thava PFHUMU Nungungulu, gukhugela wudzahani wangu.

¹³Ina kha va gu tivisa uwe, mune wangu, iso nyi giridego, gikhati Jezabheli a nga saselago vaprofeti va PFHUMU Nungungulu, idzo nyi nga sihago khidzo lizana vaprofeti va PFHUMU Nungungulu, nyi va kabanisa khu mitsawa nya livbandre magumi, nyi va siha mavbalani nyi va vbanyisa khu guhodza ni mati nya gusele.

¹⁴Ni olu u gukhuwe indra embela mune wago, khuwe: Eliya oyu avba. A na nyi songa.”

¹⁵Eliya a di hakha, khuye: “Nyi ngu sambanya khu PFHUMU Nungungulu nya Tshivba Yatshavbo, oyu nyi mu thumelago, kheni: Muhuno nyi na dzi yeyedza khovbeni gwaye.”

¹⁶Khavbo avbo, Obhadhiya, a diya tivisa Akabi iso si nga dugelelago. Akabi a diya tshangana ni Eliya.

¹⁷Avbo Akabi a nga wonago Eliya, a di khuye: “Khuwe mu muvhilinganyisi wa va na Israyeli, gani?”

¹⁸Eliya a di mu hakha, khuye: “Khandri eni nyi vhilinganyisago va na Israyeli, aholu uwe ni nyumba ya babe wago, kholu mu digide milayo ya PFHUMU Nungungulu, mu landrela Vabhahali.

¹⁹Gasi olu, rumela guya ramba vatshavbo va na Israyeli, vaya tshangana gumogo ni vaprofeti gigomoni gya Karimelo gumogo gambe ni mazana mana ni livbandre magumi (450) vaprofeti Vabhahali, ni mazana mana (400) vaprofeti va Asitaroti, va hodzago vbamezatunu ga Jezabheli.”

²⁰Khavbo avbo, Akabi a di ramba va na Israyeli; vaya tshangana gumogo ni vaprofeti gigomoni gya Karimelo

²¹Eliya a di hidzimela a ema mbeli ga vathu vatshavbo, khuye: “Kala lini mu na ndzodolago khu mipimiso mivili? Pfhumu a gu bani ari uye, mu landreleni; aholu, a gu bani nari Bhahali, landrelani uye.” Aholu, vathu kha va nga mu hakha.

²²Khavbo avbo, Eliya a di engedza gu embela vathu, khuye: “Wonani, kheni nyenga nyi tshadego muprofeti wa PFHUMU Nungungulu, gasi vaprofeti Vabhahali mazana mana ni livbandre magumi vama.

²³Gasi olu, nyi reseleni dzikuzi dzimbili, avo va na hatha mweyo va yi pilela khu sipandre, va yi handzegela vbadzikhunitunu, aholu va nga khuti nilo, eni neni nyi na pilela yimbe nyi yi handzega vbadzikhunitunu nyi si khondrisi nilo.

²⁴Khavbo avbo, enu mu na ranani lina la nungungulu wanu, eni neni nyi na lombelela khu lina la PFHUMU Nungungulu; nungungulu a na gu ningago phindrulo khu nilo, uyoyo khuye a gu Nungungulu nya lisine.” Vathu vatshavbo va di hakha, khavo: “Ayoyo mahungu nya yadi.”

²⁵Eliya a di embela vaprofeti Vabhahali, khuye: “Enu mu gu vangi, phelani khenu mu hatha kuzi mu yi pilela, mu lombelela ga nungungulu wanu, aholu mu nga khondrisi nilo.”

²⁶Va di dzega kuzi yoyo va nga ningwago, va yi pilela; va phela gu lombelela khu lina la Bhahali gukhugela ni dzimindru kala ni vbakari nya mihani, khavo: “Bhahali hi ninge phindrulo!” Aholu, kha va ngapwa ni lito, ambari muthu nya gu va ninge phindrulo. Va di hana ni gu ndraga ndraga va dzuwulugela giluvelo va nga bani va giride.

²⁷Avbo Eliya a nga wona khuye vbakari nya mihani, a di phela gu va tsorodzela, khuye: “Khusedzani ngudzu malito mu laledza! A gu dzina saye nungungulu yoyo a gu hungatwa khu libhulo! Mwendro a gu thuma gilo nya gukari, mwendro gu endra! Mwendro saye a gu lala! Gu vbwetega mu mu wusa!”

²⁸Avo va di gulumela va wombedzelana dzihuwa, va dzi hendrelela khu migala ni sisingwana kha nga giolovedzo gyawe, kala novba wu goga sivilini gwawe.

²⁹Va di simama va gira kharato, khu tshivba ni tshivba kala ni silambo, gikhatini va olovelago gu gira miphaselo nya dzimbewu. Aholu kha va ngapwa lito, ambari phindrulo mwendro gu wona gilo.

³⁰Khavbo avbo, Eliya a di embela vathu vatshavbo, khuye: “Hidzimelani eno gwangu.” Vathu vatshavbo va di hidzimela gwaye. Uye a di vbahedza giluvelo gya PFHUMU Nungungulu gi nga bani gi khungumugide.

³¹Khu hwane a di dzega likhumi na sivili siwindri, mayelano ni tengo nya sanana sa Jakobe, a nga embedwago khu PFHUMU Nungungulu, khuye: “U na ranwa pwani khuwe Israyeli.”

³²Khu siwindri soso, a di vbaha giluvelo nya gurungudze avbo lina la PFHUMU Nungungulu. A di kemba sele wubambe nya giluvelo, gu dingana mipimo mivili nya dzimbewu.

³³Khu hwane a di vegedzela dzikhuni, vbatshani nya dzikhuni, a di handzega mombe na yi piledwe,

³⁴a va embela, khuye: “Tadzani misungwa mina khu mati, mu ma vbaladzani vbatshani nya phaselo nya guvbiswe ni vbadzikhunitunu.” Khavbo avbo, a di engedza a ganela, khuye: “Girani gambe kharato.” A engedza gambe, khuye: “Girani kharato khu gikhati nya wuraru.” Va di gira kharato gikhati nya wuraru.

³⁵Mati ma di goga khu dzibambe dzatshavbo nya giluvelo, ma tadza ni liphala lakone.

³⁶Avbo gu nga vbohago gikhati nya guningele miphaselo nya silambo, muprofeti Eliya a di hidzimela vbagiluvelotunu a ganela, khuye: “Uwe Nungungulu wa Abrahama, wa Isaki ni wa Jakobe, dzi wonegise muhuno gukhuwe, uwe khuwe, Nungungulu wa Israyeli, ni gukhuwe eni kheni githumi gyago. Wonegisa gukhuwe eni nyi giride satshavbo sesi khu guruma gwago.

³⁷Nyi phindrule Pfhumu, nyi phindrule! Vathu vava, va na dziti nya gukhavo, Uwe, Pfhumu, khuwe Nungungulu u vbindrugedzago myonyo yawe.”

³⁸Khavbo avbo, khu githugedza wu di thega nilo wa PFHUMU Nungungulu wu ta vbisa nyama yatshavbo wu tsagamisa phaso, dzikhuni, siwindri, bwelo khavbo wu minya ni mati ya umo nya sele.

³⁹Avbo vathu vatshavbo, va si wonego esi, va di thega va tsitsa khu dzikhovbe, va ganela, khavo: “Pfhumu basi khuye a gu Nungungulu! Pfhumu basi khuye a gu Nungungulu!”

⁴⁰Khavbo avbo, Eliya a di va embela, khuye: “Hungani vaprofeti vatshavbo Vabhahali, a nga tshali wa gu tshala!” Va di va mola Eliya a di relela navo gitsongwanani gya Khisoni, aya va songela iyoyo.

⁴¹Khavbo avbo, Eliya a di embela Akabi, khuye: “Khuga u gwele u ya hodza u sele, kholu gu ngu pwala gudzuma nya ndzadzi nya yingi.”

⁴²Akabi a di gwela aya hodza ni gu sela, aholu Eliya a di gwela tshokatunu nya gigomo gya Karimelo, aya noga vbavbatshi, khovbe yaye a yi thela mazoloni gwaye.

⁴³A di embela githumi gyaye, khuye: “Gwela olu u khedza phuvbo ga phwani.” Githumi gi di gwela gi ya khedza, gi mu embela, khigyo: “Kha nyi woni gilo!” Eliya a di gi embela, khuye: “Bwelela gambe livbandre na dzimbili dzinyondro.”

⁴⁴Avbo githumi gi nga bwelelago khu gikhati nya livbandre na guvili, gi dita, khigyo: “Gu ngu wonega lipfhinyana li dugwana nya nga mandza nya muthu, na li gu khuga khu matini.” Khavbo avbo, Eliya a di khuye: “Indra u ya embela Akabi, khuwe: Ambagisa kareta yago khu gu vbiredza gasi u siti manwa khu ndzadzi yi gu segela avba.”

⁴⁵Gikhati gyogyo, damboni gu di phuma khu mapfhi ni phuvbo, guta ndzadzi nya yingi ngudzu; Akabi a di khilela kareta a hongola Jezireyeli.

⁴⁶PFHUMU Nungungulu a diri gumogo ni Eliya, uye a dzi hunga giwunu a tutuma mbeli, a thangela Akabi gu vboha nyangwani ga Jezireyeli.