Read gitonga 1 Dzipfhumu 20 Bible Online

1 Dzipfhumu 20 - gitonga bible

1 Dzipfhumu 20

¹Bheni-Hadhadhi, mufumeli wa Siriya, a di tombanisa dzitshivba dzaye dzatshavbo; a diri ni magumararu na vavili vafumeli, ni dzikavalu, ni dzikareta nya nyimbi. A di gwela a ta randrela ni gu dhumela lidhoropa la Samariya.

²A di rumela myango dhoropani ga Akabi, mufumeli wa Israyeli,

³vaya mu embela, khavo: “Bheni-Hadhadhi a ngu ganela kharati, khuye: Parata ni ndralama yago, sa gu lumba eni; vagadzi vago ni sanana sago sile nya sadi, sa gu lumba eni.”

⁴Mufumeli wa Israyeli a di hakha, khuye: “Kha nga idzo u ganedego khidzo, uwe mufumeli ni mune wangu, eni nyi wago ni satshavbo nyi gu naso.”

⁵Myango yile yi di wuya yita mu embela gambe, khiyo: “Bheni-Hadhadhi, a ngu ganela kharati, khuye: Nyi gu rumede myango nya gu nyi ninge parata, ndralama, ni vagadzi vago, ni sanana sago.

⁶Mindru, khu gikhati nya nga egi, nyi na rumela sithumi sangu avbo gwago, sita setsha nyumbani gwago ni nyumbani ga vathumegeli vago; va nata phanga khu mandza yawe satshavbo u si wonago na siri ni lisima.”

⁷Khavbo avbo, mufumeli wa Israyeli a di ramba madhota yatshavbo ya tigoni ga Israyeli a va embela, khuye: “Nga wonani gwadi guvivba gu vbwetago gu girwa khu mwama yoyu vbakari gwathu. Gikhati a nyi lombidego parata ni ndralama, vagadzi vangu gumogo ni sanana sangu, eni gima kha nya mu bombela.”

⁸Madhota ni vathu vatshavbo va di mu embela, khavo: “U nga mu yingisi, ambari gu mu ninga gilo.”

⁹Khavbo avbo, Akabi a di embela myango yile ya Bheni-Hadhadhi, khuye: Indrani muya embelani mufumeli ni mune wangu, khenu: Nyi dzi emisede gu gira iso u nyi embedego guhegulani; aholu iso u nyi embelago olu, gima kha nyi na dzi kodza gu gira.” Myango yi di wuya yi ta ninga phindrulo ga mufumeli.

¹⁰Bheni-Hadhadhi a di engedza a rumela myango guya embela Akabi, khuye: “Vanungungulu va na nyi vete khu tshivba nya yikhongolo, kudzudzwane wa Samariya wa gu enedza gu tadza mandza ya vadwani nya nyimbi va nyi landrelago.”

¹¹Aholu mufumeli wa Israyeli a di va ninga phindrulo, khuye: “Mu embeleni, khenu: Oyu a vbagarago matshari a nga dzi zundzi kha nga musotshwa a rulago matshari hwane nya na pade.”

¹²Bheni-Hadhadhi na hakhide phindrulo yeyi ya Akabi, nari ni vambe vafumeli va nga bani na va gu sela wadwa mitshatshani gwawe, a di embela sithumi saye, khuye: “Dzi dongiseleni guya dhumela lidhoropa, ayo ma di dzi vegisela guya dwana litunga.”

¹³Khu gikhati gyogyo, muprofeti moyo a di vboha ga Akabi, mufumeli wa Israyeli, a mu tivisa, khuye: PFHUMU Nungungulu a ngu ganela kharati, khuye: “U gi wone gidzemo gegi nya gingi ngudzu, gani? Muhuno eni nyi na gi ningela mandzani gwago, u va pala gasi u dziti nya gukhuwe eni kheni PFHUMU Nungungulu.”

¹⁴Khavbo avbo, Akabi a di wudzisa, khuye: “Khu tshivba ya mani u na gu girago isoso?” Muprofeti a di phindrula, khuye: “PFHUMU Nungungulu a ngu hakha, khuye: Khu tshivba ya vathangeli nya sipandrengulu, khavo va yelago gu gira isoso.” Akabi, a di wudzisa, khuye: “Khu mani a na phelago khuye gu dwana?” Uye a di phindrula, khuye: “Khuwe!”

¹⁵Khavbo avbo, Akabi a di sayela madzaha ya vathangeli nya sipandrengulu, a mana mazana mavili ni magumararu na vavili (232) vama. Khu hwane nya ava, a di sayela satshavbo sanana sa Israyeli, a mana na siri livbandre na mavili magumi mazana (7000) vama.

¹⁶Nyimbi yi di phela ni mihani, gikhati Bheni-Hadhadhi ni vafumeli vaye nya magumararu na vavili va nga bani na va gu sela mawadwa ni gu leva mitshatshani gwawe.

¹⁷Avo va phedego khavo gu duga khu madzaha ya vathangeli nya sipandrengulu. Bheni-Hadhadhi, a di rumela vathu guya wona esi si dugelelago. Va diya mu tivisa, khavo: “Gu dugide tsawa nya masotshwa khu Samariya.”

¹⁸Uye a di ninga nayo nya gukhuye: “Masotshwa yoyo, gani ma gu tela guta dwana, gani ma gu tela guta lomba gurula, ma moleni ma nga gu vbanya.”

¹⁹Madzaha ya vathangeli nya sipandrengulu, ma di duga khu dhoropani, na ma gu landredwa khu libutho la na Israyeli.

²⁰Moyo ni moyo a di songa uye a nga mu mana mbeli gwaye; Vaasiriya va di thava, na va gu lundrwa khu hwane khu va na Israyeli. Bheni-Hadhadhi, mufumeli wa Siriya, a thava khu kavalu ni vambe vakhileli nya gukari nya dzikavalu.

²¹Mufumeli wa Israyeli, a di duga aya songa dzikavalu ni gukhungumulela dzikareta nya nyimbi; a padzisa guralo muphelo Vaasiriya.

²²Khu hwane nya ugo, muprofeti a di hongola aya ganela ni mufumeli wa Israyeli a mu embela, khuye: “Bwelela u ya wusedza tshivba yago, u pimisa gwadi esi u yelago gu gira, kholu khu mwaga wutago mufumeli wa Siriya a nata gu dhumela nyaluphye.”

²³Dzindruna dza mufumeli wa Siriya dzi di mu embela, khidzo: Vanungungulu vawe, vanungungulu va musigomoni; khidzo va nga hi palago khidzo; aholu ha gu va dhumela panini, ethu khethu hi na va pala.

²⁴Khu guralo, uwe gira, kharati: Dusa vafumeli vatshavbo, u vega vathangeli nya nyimbi wulangani gwawe.

²⁵Khu hwane dongisela libutho nya likhongolo ngudzu nya gufanane ni lile u li luzidego, ni tengo nya gufanane nya dzikavalu gumogo ni dzikareta. Ethu hi naya dwana ni va na Israyeli panini. Khu lisine hi naya va pala. Mufumeli a di va yingisa, a dzumela mawonelo yawe.

²⁶Na gu vbindride mwaga moyo, Bheni-Hadhadhi a di tombanisa masotshwa yaye a hongola nawo dhoropani ga Afeka, gasi guya dwana ni va na Israyeli.

²⁷Va na Israyeli va di tombaniswa navo, va ningwa matshari ni dzimbuva, va hongola gasi guya dwana ni Vaasiriya. Va diya zumba va khedzisana navo. Va na Israyeli va di wonega kha nga mitshambi mivili nya yidugwana nya dziphongo, gasi Vaasiriya va di fenengedza mafu yatshavbo.

²⁸Muthu wa Nungungulu, a di hongola ga mufumeli wa Israyeli, aya mu embela, khuye: “PFHUMU Nungungulu a ngu ganela kharati, khuye: Olu Vaasiriya va ganelago, khavo: PFHUMU Nungungulu khwa sigomoni, nasiri Nungungulu wa panini, eni nyi na ningela mandzani gwago, gyatshavbo gidzemo gegi nya gikhongolo, khavbo mu na dzitigo nya gukhenu, Eni kheni PFHUMU Nungungulu.”

²⁹Mabutho ma zumbide na ma gu khedzana gipimo nya livbandre na mavili matshigu. Khu litshigu nya livbandre na mavili, yi di phela nyimbi. Khu litshigu limwedo basi va na Israyeli va di songa lizana magumi mazana masotshwa nya Vaasiriya (100.000).

³⁰Avo va nga vbulugago va di tutumela dhoropani ga Afeka, aholu libhiyo li di thega vbatshani nya ava nya magumavili na livbandre na mavili magumi mazana (27.000) Vaasiriya, li va pfara vafa. Khavbo avbo, Bheni-Hadhadhi a di thava aya dhoropani aya sihala makhuvini nya dzinyumba.

³¹Khavbo avbo, dzindruna dzaye dzi di mu embela, khidzo: “Ethu hi pwide gupwani vafumeli va na Israyeli va na ni wuhindzi. Khu guralo, hongoleni hi ambala dzisaku giwununi ni dzingodzi thamoni, hi hongola hi ya ganela ni mufumeli wa Israyeli, a gu dzina saye a na gu diga u vbanya.”

³²Khavbo avbo, va di ambala dzisaku giwununi, va hunga dzingodzi thamoni, va hongola ga mufumeli wa Israyeli, vaya, khavo: “Githumi gyago Bheni-Hadhadhi, a nguta ata gu lomba, khuye: Nyi dige nyi vbanya.” Mufumeli a di wudzisa, khuye: “A nga gu vbanya uye, gani? Uye i ndriyangu!”

³³Vama vale va di hakha mahungu yaya kha nga magana nya gutsakise. Avbo Akabi a ganedego khuye i ndriyangu, va di dzegela gulondrola magana yoyo, va ganela, khavo: “Ina pfhumu, Bheni-Hadhadhi i ndriyago!” Akabi a di khuye: “Mu reseni avba gwangu Bheni-Hadhadhi!” Gikhati Bheni-Hadhadhi a vbohidego, mufumeli a di mu embela a bele karetani gwaye.

³⁴Bheni-Hadhadhi a di mu embela, khuye: “Nyi na bweledza gwago madhoropa ma wandridwego ga babe wago khu babe wangu, gu diga isoso, u na vega wulanga nya wugwewo wago dhoropani ga Dhamasiko, kha nga babe wangu a nga bani nari nawo dhoropani ga Samariya.” Akabi a di phindrula, khuye: “Ha gu gira gidzumeledzwano gyogyo, eni nyi na gu diga u hongola.” Akabi a di gira gidzumeledzwano naye a mu diga a hongola.

³⁵Moyo nya sanana sa vaprofeti, khu guruma ga PFHUMU Nungungulu, a di embela moyo nya vabangaladzi vaye, khuye: “Nyi vete gibhakela; aholu mwama wule a di bomba gu mu veta.

³⁶ Khavbo avbo, muprofeti a di mu embela, khuye: “Olu u ngamba yingisa magana ya PFHUMU Nungungulu, gikhati u nga ndreyago hwindzo ni eni, u na vbadzuledwa khu nghala!” Me ni gu hambana, a di hodzwa khu nghala.

³⁷Khavbo avbo, muprofeti wa moyo a di ya ganela ni mumbe mwama a mu embela, khuye: “Nyi vete gibhakela khu wuhindzi wago.” Uye a di mu veta gibhakela a mu bayisa.

³⁸Khavbo avbo, muprofeti a di fenengedza khovbe khu myendra gasi gumba tugudwa, aya khala bambe nya ndzila, na gu lindrela gukhuye mufumeli wa Israyeli a vbindre khu vbale.

³⁹Avbo a nga bani na guvbindra mufumeli, muprofeti a di laledza khu tshivba, khuye: “Githumi gyago gi diri litungatunu, musotshwa moyo a di nyi resela mwama nya gibotshwa a ta, khuye: Ghadha mwama yoyu. A gu tutuma khuwe u na livbago khu womi wago, mwendro gulivba khu taleta nya parata wulangani gwaye.

⁴⁰Avbo githumi gyago gi nga bani gi hungatedwa khu simbe silo, gibotshwa gi di tutuma.” Khavbo avbo, mufumeli wa Israyeli a di khuye: “Owu khuwo nandru wago, u dzi konide wabune.”

⁴¹Khavbo avbo, muprofeti a di dzegela gu funungula mwendra khovbeni gwaye; ni mufumeli wa Israyeli, a di dzegela gu tugula gukhuye moyo nya muprofeti.

⁴²Uye a di embela mufumeli, khuye: “PFHUMU Nungungulu a ngu ganela kharati, khuye: Kha nga olu uwe u digidego mwama yoyu nyi nga bani nyi layide gukheni a songwe, uwe u na mu livba khu womi wago, ni vathu vago, va na mbembiswa wulangani ga vathu vaye.”

⁴³Khavbo avbo, mufumeli wa Israyeli a di bwelela gaya gwaye Samariya, na swihade gumogo ni guvbisega ngudzu.