Read gitonga 1 Dzipfhumu 22 Bible Online

1 Dzipfhumu 22 - gitonga bible

1 Dzipfhumu 22

¹Gu di vbela myaga miraru tigoni na gurude nyambana nyimbi vbakari ga Siriya ni va na Israyeli.

²Aholu, khu mwaga nya wuraru, Josafati, mufumeli wa Judha, a di ya holela Akabi, mufumeli wa Israyeli.

³Mufumeli wa Israyeli a di wudzisa dzindruna dzaye, khuye: “Kha mu dzitini nya gukhenu lidhoropa la Ramoti-Gileyadhi la gu lumba ethu, gani? Khu ginani hi si girigo gilo gasi hi li wandra ga mufumeli wa Siriya?”

⁴Khavbo avbo, uye a di wudzisa ga mufumeli Josafati, khuye: “U na hongola neni hi ya dhumela Ramoti-Gileyadhi, gani?” Josafati a di embela mufumeli wa Israyeli, khuye: “Eni nyi na gira nga esi u girago uwe; vathu vangu va na gira nga vago, ni dzikavalu dzangu dzi na gira nga dzago!”

⁵Josafati a di engedza gambe a embela mufumeli, khuye: “Guhegula wudzisa PFHUMU Nungungulu.”

⁶Khavbo avbo, mufumeli a di tombanisa Vaprofeti, va nga bani vari mazana mana (400) vama, a va wudzisa, khuye: “Nyi ngu yela gu hongola nyi ya dwanisa Ramoti-Gileyadhi, mwendro nyi nga hongoli, gani?” Avo va di hakha, khavo: “Indra! Kholu PFHUMU Nungungulu a na ningela lidhoropa mandzani ga mufumeli.”

⁷Aholu, Josafati, a di wudzisa, khuye: “Gu mwalo gambe mumbe muprofeti wa PFHUMU Nungungulu avba gasi hi hongola hi ya wudzisa gambe gwaye, gani?”

⁸Khavbo avbo, Akabi, mufumeli wa Israyeli, a di embela Josafati, khuye: “Womo mumbe mwama nya gupwani khu Mikeya, mwamana wa Inila, khavbo gwaye gu ngu kodzega gu wudzisa PFHUMU Nungungulu. Aholu eni nyi ngu mu nyenya, kholu uye gima a si nyi profeteli silo nya sadi, aholu a gu nyi embela iso nya guvivbe gikhati gyatshavbo.” Josafati, a di mu embela, khuye: “U nga ganeli kharato.”

⁹Khavbo avbo, Akabi, mufumeli wa Israyeli, a di rana thenwa moyo, a ta mu embela, khuye: “Nyi resele khu wivbiredza Mikeya, mwamana wa Inila.”

¹⁰Mufumeli wa Israyeli ni Josafati, mufumeli wa Judha, va di gu khade, muthu ni muthu vbagikhalotunu gwaye nya wufumu, na va ambade dzingandzu nya wufumu, tandralani wa nyangwani ga Samariya, vaprofeti vatshavbo na va gu profeta mbeli gwawe.

¹¹Zedhekiya, mwamana wa Khenahana, a di dzi girela dzikheho nya dzisimbi a ganela, khuye: “PFHUMU Nungungulu, a ngu ganela kharati, khuye: Khu dzikheho dzedzi, u na sasela khidzo Vaasiriya, kala u va mbembisa.”

¹²Vatshavbo vambe vaprofeti, va di profeta idzosaye, mahungu ya mamowo, khavo: “Gwela gigomo gya Gileyadhi, u naya va pala, kholu PFHUMU Nungungulu a na ningela lidhoropa mandzani ga mufumeli.”

¹³Mwango wu nga rumedwago guya rana Mikeya, wu di mu embela kharati, khuwo: “Wona nya gukhuwe vaprofeti vatshavbo va ganede lito limwedo, nya tshivba nya gupale ga mufumeli. Magana yago ma na khale kha nga aya yawe, u tivisa nuwe mahungu nya yadi.”

¹⁴Aholu Mikeya a di ganela, khuye: “Nyi ngu sambanya khu PFHUMU Nungungulu a vbanyago, eni nyi na ganela basi iso PFHUMU Nungungulu, a na nyi embelago.”

¹⁵Avbo uye a nga vbohago, mufumeli a di mu wudzisa, khuye: “Mikeya, ina hi ngu yela guya dwanisa lidhoropa la Ramoti-Gileyadhi, mwendro kha si kodzegi, gani?” Muprofeti a di mu embela, khuye: “Gwela, kholu PFHUMU Nungungulu a na li ningela mandzani ga mufumeli.”

¹⁶Mufumeli a di mu embela, khuye: “Kala lini na nyi gu gu sambanyisa gukheni, u nga ganeli simbe silo vbavbandze nya lisine khu lina la PFHUMU Nungungulu, na?”

¹⁷ Khavbo avbo, uye a di ganela, khuye: Nya gu wona vatshavbo va na Israyeli va legalegago musigomoni, kha nga dzinvuta nyambana muhavisi, PFHUMU Nungungulu a di nyi embela, khuye: Vathu va gu mwalo waye. Muthu ni muthu a na bwelele gaya gwaye khu gurula.”

¹⁸Khavbo avbo, mufumeli wa Israyeli a di embela Josafati, khuye: “Ina kha nya gu embela gukheni uye kha kodzi gu ganela avbo gwangu iso nya sadi, aholu gikhati gyatshavbo uye a gu nyi tivisa iso nyamba sadi, gani?”

¹⁹ Mikeya a di engedza a ganela, khuye: “Yingisa magana ya PFHUMU Nungungulu: Nyi wonide PFHUMU Nungungulu na khade vbagikhalotunu gwaye nya wufumu, na randredwe khu nyamudye ni nyambade khu sikwata nya sivangwa sa ndzadzini.

²⁰PFHUMU Nungungulu a di ganela, khuye: Khu mani a na kanganyisago Akabi, gu a gwele Ramoti wa Gileyadhi gasi aya fela iyoyo? Simbe sivangwa si di ganela egi, simbe si ganela gyaye.

²¹Khavbo avbo, gu di dugelela liphuvbo li ta dzi bikela mbeli ga PFHUMU Nungungulu, khilo: Eni nyi naya mu kanganyisa Akabi. PFHUMU Nungungulu a li wudzisa, khuye: Khu magirelo muni?

²²Ilo li di hakha, khilo: Eni nyi naya duga nyi khala liphuvbo nya vaprofeti nya malipha kanani ga vaprofeti vaye vatshavbo. Khavbo avbo, PFHUMU Nungungulu a di li ruma, khuye: Lisine, gimbila uya gira kharato kha nga idzo u ganedego; u naya mu kanganyisa.”

²³PFHUMU Nungungulu thede liphuvbo nya malipha kanani ga vaprofeti vago vatshavbo. Aholu PFHUMU Nungungulu tiviside libango li tago avbo gwago.

²⁴Khavbo avbo, Zedhekiya, mwamana wa Kanahana, a di vboha vbafuvbi ga Mikeya, a mu veta pama khovbeni, a mu wudzisa, khuye: “Li dugide khu hayi avbo gwangu liphuvbo la PFHUMU Nungungulu wangu, li ta ganela nago?”

²⁵Mikeya a di mu hakha, khuye: “U na li wona wabune, litshigu u na gu dugago khu makhuvini, gasi u ya sihala ga mambe makhuvi.”

²⁶Khavbo avbo, Mufumeli wa Israyeli a di ruma, khuye: “Molani Mikeya mu mu vbwelegedza ga Amoni, muthangeli nya lidhoropa, ni ga Jowasi mwamana wa mufumeli;

²⁷u naya va embela, khuwe: Mufumeli wari, khuye: Thelani mwama yoyu pasoni mu mu hodzisa guhodza ni gu mu sedza mati nya tshanisa, kala nyi wuya khu gurula.”

²⁸Aholu Mikeya di hakha, khuye: “Wa gu wuya khu gurula, gu yeyedza gupwani PFHUMU Nungungulu kha ganela khavbo gwangu. A engedza gambe, khuye: Mayigo yatshavbo guvbweta ma yingisa esi nyi ganelago!”

²⁹Khu kharati, mufumeli wa Israyeli ni Josafati, mufumeli wa Judha, va di gwela guya Ramoti wa Gileyadhi.

³⁰Mufumeli wa Israyeli a di embela Josafati, khuye: “Eni nyi ngu dzi vbindrugedza nyi bela mulitungani, aholu uwe, simama ni dzingandzu dzago nya wufumu.” Khu guralo, mufumeli wa Israyeli a di dzi vbindrugedza a bela litungani.

³¹Mufumeli wa Siriya a di leletela vathangeli vaye nya dzikareta, va nga bani vari magumararu na vavili, a va embela, khuye: “Mu nga dwani ni mumbe muthu, ambari nari khongolo mwendro nari dugwana, vbavbandze basi ga mufumeli wa Israyeli.

³²Avbo vathangeli nya dzikareta va nga wonago Josafati, va di ganela khu gyawe, khavo: “Khu lisine khuye kamwe mufumeli wa Israyeli,” va di mu hidzimelela gasi guya dwana naye. Khavbo avbo, Josafati a di womba huwa,

³³avbo vathangeli nya dzikareta va nga mu wonago nya gukhavo khandruye mufumeli wa Israyeli, va di mu diga va si mu lundri.

³⁴Khu githugedza, mwama moyo a di khwandra nya mukhwandre giholoma, gi penga gi ya hekha mufumeli wa Israyeli khu wutshanganeloni nya gikhweso gyaye nya dzisimbi. Mufumeli a di dzegela gu embela mugimbidzisi nya kareta yaye, khuye: “Dzega kareta u nyi dusa vbakari nya nyimbi, kholu nyi bayisidwe ngudzu.”

³⁵Litunga li di tshinga khu tshivba ngudzu litshigu latshavbo, mufumeli a di ema karetani mbeli ga Vaasiriya. Ni silambo a difa, novba nya gilondra wu di goga wu banga karetani.

³⁶Gupfolani nya lidambo, lito li di pwala lizumboni gwatshavbo ga sanana sa Israyeli, li laledza, khilo: “Muthu ni muthu a na bwelele dhoropani gwaye ni tigoni gwaye nya mavelego!”

³⁷Mufumeli a difa kharati. Girumbi gyaye gi di dzegwa gi yiswa Samariya, vaya mu dzinga iyoyo.

³⁸Gikhati va nga handza kareta yaye lidhamuni ga Samariya, umo gu hambago vanyamayi nya maphuphulu, dzimbwa dzi diya dandzela novba wa mufumeli. Gu di tadzisega kharati magana ya PFHUMU Nungungulu.

³⁹Gasi simbe si dugeledego ga mufumo wa Akabi, satshavbo a giridego, nyumba nya wufumu a vbahidego khu magwaha nya ndzofu, ni madhoropa yatshavbo a nga bani a ma vbahide, satshavbo si lovidwe umo nya Libhuku nya Matimo ya Vafumeli va Israyeli.

⁴⁰Akabi lade gumogo ni vavelegi vaye, wulangani gwaye fumide mwanaye, Akazi.

⁴¹Josafati, mwamana wa Asa, phede gu fumela Judha khu mwaga nya wu na nya gufume ga Akabi, mufumeli wa Israyeli.

⁴²Josafati a diri ni tanga nya magumararu na livbandre myaga avbo a nga emiswago gu khala mufumeli, fumide magumavili na livbandre myaga dhoropani ga Jerusalema. Lina la mayi waye a diri uye Azubha, nyamahegyane wa Sili.

⁴³Josafati a di landrisa khu lisine esi babe waye Asa, a nga bani na gu gira, gima kha nga hambana naso, a gira ugo gululamidego mahoni ga PFHUMU Nungungulu.

⁴⁴Aholu kha nga khungumula malanga ya musigomoni; kholu, vathu va di bani na va nga gu gira miphaso ni gu vbisa libani musigomoni.

⁴⁵Josafati a di vbanya khu gurula ni mufumeli wa Israyeli.

⁴⁶Yatshavbo mithumo ya Josafati, tshivba a yeyedzidego, nidzo a nga dwanago khidzo, si lovidwe umo nya Libhuku nya Matimo ya vafumeli va Judha.

⁴⁷Uye a di tutumisa tigoni vatshavbo vale va nga bani na va gu thumisa wuphuphulu, va nga bani va tshade gikhatini gya babe waye, Asa.

⁴⁸Khu matshigu yoyo, gu diri mwalo mufumeli tigoni ga Edhomi, aholu va di gu fumedwa khu mwamangulu.

⁴⁹Josafati a di gira mataro nya makhongolo tigoni ga Tarisisi, gasi guya dzega ndralama tigoni ga Ofiri; aholu kha va nga hongola, kholu mataro ma diya ghohekela tigoni ga Eziyoni-Gebheri

⁵⁰Khavbo avbo, Akazi, mwamana wa Akabi, a di embela Josafati, khuye: “Dzindruna dzangu, dzi na hongole gumogo ni dzindruna dzago mataroni. Aholu, Josafati kha nga dzumela.”

⁵¹Josafati lade gumogo ni vavelegi vaye, dzingidwe vbafuvbi ga vavelegi vaye, dhoropani ga babe waye Dhavhidhe. Wulangani gwaye, fumide mwanaye Jeyoramo.

⁵²Akazi, mwamana wa Akabi, phede gu fumela va na Israyeli, khu mwaga nya likhumi na livbandre na mivili nya gufume ga Josafati, mufumeli wa Judha; fumede myaga mivili dhoropani ga Samariya.

⁵³A di gira silo nya guvivbe mahoni ga PFHUMU Nungungulu; kholu a di gimbila khu dzindzila dza babe waye, gumogo ni dzindzila dza mayi waye, nidzo dza Jerobhowamo, mwamana wa Nebhati, a nga gira a ghohisa va na Israyeli.

⁵⁴A di thumela ni gu khozela nungungulu Bhahali, a gorogisa PFHUMU Nungungulu wa Israyeli, kha nga satshavbo iso a nga girago babe waye.