Read gitonga 1 Dzipfhumu 5 Bible Online

1 Dzipfhumu 5 - gitonga bible

1 Dzipfhumu 5

¹Hiramo mufumeli wa Tiro, a di rumela sithumi saye ga Solomoni, kholu a dipwa gupwani Solomoni todzidwe a wumbedwa gu khala mufumeli wulangani ga babe waye Dhavhidhe, kholu Hiramo gikhati gyatshavbo a di gu golana ni Dhavhidhe.

²Khavbo avbo, Solomoni a di rumela mahungu ga Hiramo, a mu embela, khuye:

³“Uwe u ngu dziti gwadi gukhuwe babe wangu Dhavhidhe, kha dzi kodza guvbaha nyumba yi lumbago lina la PFHUMU Nungungulu waye, khu mahungu nya nyimbi yi nga mu randrelago khu maphuvbo yatshavbo, kala PFHUMU Nungungulu a vega valala vaye vbavbatshi nya migondro yaye.

⁴Gasi olu, PFHUMU Nungungulu wangu, a nyi ningide gurula khu maphuvbo yatshavbo; nyi ngari mwalo nala mwendro mhango nya gukari.

⁵ Olu nyi ngu pimisa guvbaha nyumba yi lumbago lina la PFHUMU Nungungulu wangu, kha nga idzo PFHUMU Nungungulu a ganedego khidzo ga babe wangu Dhavhidhe, khuye: Mwanago nyi na gu mu vegago wulangani gwago, vbagikhalotunu gwago nya wufumu, khuye a na gu nyi vbahelago nyumba yi lumbago lina langu.

⁶Gasi olu leletisa sithumi sago si nyi pilela misimbo nya sedhari ya Libhanoni, sithumi sangu si na thuma gumogo niso sago, nyi na si livba tengo nya thumo wawe, gukhedza khidzo uwe u na gu lombago, kholu u ngu dziti gwadi gukhuwe eno gwathu mwalo na moyo a kodzago guvata mapulango nga Vasidhoni.”

⁷Avbo Hiramo, a nga pwago mahungu yaya ya Solomoni, a di tala khu gutsaka ngudzu, a ganela, khuye: “A na rungudzwe PFHUMU Nungungulu, a ningidego Dhavhidhe gyanana nya gutale khu mapimo gasi gu fumela vathu vava nya gutale ngudzu!”

⁸Hiramo a di rumela myango ga Solomoni, khuye: “Nyi ma pwide mahungu u rumedego guta nyi embela. Nyi na gira gu gola gwago gwatshavbo khu mahungu nya mapulango nya misedhari ni kipirisi.

⁹Sithumi sangu si na dzega mapulango si ma reledza gukhugela Libhanoni, si ma vbohisa phwani, khu iyoyo nyi na ma khiledza khu sitataru kala wulanga u na wu vbwetago, va naya ma tshisela iyoyo; u ma hakha avbovbo. Uwe nuwe u na tadzisa gugola gwangu khu guhodzisa ndranga yangu.”

¹⁰Khu guralo, Hiramo a di ninga Solomoni mapulango yatshavbo nya misedhari ni aya nya kipirisi a nga ma vbwetago.

¹¹Solomoni a di ninga Hiramo magumavili magumi mazana (20.000) mipimo nya tirigu gasi gu hodzisa ngamo yaye, ni magumavili magumi mazana (20.000) mipimo nya mafura nya guhutwe; Solomoni a di ningela esi ga Hiramo khu mwaga ni mwaga.

¹²PFHUMU Nungungulu a di ninga guti Solomoni kha nga a nga mu tumbisago. Gu di manega gurula ga Solomoni ni Hiramo, khu wuvili wawe va gira gidzumeledzwano.

¹³Mufumeli Solomoni a di rana tigoni gwatshavbo gwa Israyeli, magumararu magumi mazana (30.000) vama nya gibhalu.

¹⁴ A va rumela tigoni ga Libhanoni, khu ngima ni ngima a di rumela likhumi magumi mazana (10.000) vama khu mitsawa nya gudzegisane, ngima moyo va di thuma Libhanoni, migima mivili va wuya magaya gwawe. Ndruna ya va nya gibhalu a diri Adhoniramu.

¹⁵Gu diga nya ava, Solomoni a diri gambe ni livbandre na mavili magumi mazana (70.000) vama nya simbeza, ni livbandre na mararu magumi mazana (80.000) vama nya gupandre siwindri musigomoni.

¹⁶Vbavbandze nya magumararu mazana ni mazana mararu (3.300) vameseri, va nga bani na va gu gimbidzisa mithumo nya guhambanelane, gukhedza khu mithumo yakone.

¹⁷Mufumeli a di ninga nayo nya gupandre va resa siwindri nya sikhongolo nya gutiye gasi guta gira khiso khokhweni nya Nyumba ni siwindri nya guvatwe

¹⁸Khu guralo, vavbahi va Solomoni, ni vavbahi va Hiramo ni Vagebhali, va di dongisela mapulango ni siwindri gasi guvbaha Nyumba ya Nungungulu.