Read gitonga 2 Dzipfhumu 14 Bible Online

2 Dzipfhumu 14 - gitonga bible

2 Dzipfhumu 14

¹Khu mwaga nya wuvili nya gufume ga Jeyowasi, mwamana wa Jeyowakazi mufumeli wa Israyeli, a phede gufuma Amaziya, mwamana wa Jowasi, mufumeli wa Judha.

²A diri ni magumavili na livbandre myaga, gikhati a nga phela gufuma; fumide gipimo nya magumavili na livbandre na mina myaga Jerusalema. Lina la mayi waye a diri uye Jeyowadhani, wa Jerusalema.

³A di thuma mithumo nya gululame mahoni ga PFHUMU Nungungulu, ambari a nga bani a si vbohi ga babe waye Dhavhidhe, aholu a di thuma kha nga idzo a nga bani a gira babe waye Jowasi.

⁴Ambari khu kharato, malanga nya gukhugege kha ma nga khungumudwa, kholu vathu va di nga gu simama gu gira miphaselo ni gu vbisa mabani malangani nya gukhugege.

⁵Avbo mufumo waye wu nga tiyiswa mandzani gwaye, a di songa sithumi saye iso si nga songago mufumeli, babe waye.

⁶ Aholu sanana sawe kha si songa, kha nga idzo gu lovidwego khidzo libhukuni nya Nayo wa Mosi, avbo PFHUMU Nungungulu a leletedego gukhuye: “Vavelegi va nga tshuki va songwa khu kotani ya sanana, ni sanana si nga songwi khu kotani ya vavelegi; muthu ni muthu a na songwe khu kotani nya sighoho saye.”

⁷Uye a di songa likhumi magumi mazana (10.000), va na Edhomi kovani nya Munyu; a phanga litigo la Sela mulitungani; a li thangisa lina la Jokiteyeli kala na muhuno.

⁸Khavbo avbo, Amaziya a di rumela myango ga Jowasi, mwamana wa Jeyowakazi, mwamana wa Jewu, mufumeli wa Israyeli, khuye: “Delu hi ta wonana khovbe ni khovbe.”

⁹Aholu Jeyowasi, mufumeli wa Israyeli a di rumela mwango ga Amaziya, mufumeli wa Judha, khuye: “Muba wu guromo Libhanoni, wu rumede sedhari wu guromo Libhanoni, khuwo: Ningela nyamahegyane wago a khala mwangadzi wa gyanana gyangu; aholu sirengo si nga bani si romo khabini si di vbindra si gandra muba.

¹⁰Olu u sasedego va na Edhomi, monyo wago wu tade khu matshandza; dzi zundze, aholu khala gaya gwago. Khu ginani u dzi bedzago mhangoni u na gu thegelago umo uwe gumogo ni va na Judha?”

¹¹Aholu Amaziya kha nga yingisa gilo. Khu guralo, a di gwela ga Jeyowasi, mufumeli wa Israyeli, Amaziya, mufumeli wa Judha, va ya wonana khovbe ni khovbe dhoropani ga Bheti-Semesi, li guromo tigoni ga Judha.

¹²Judha a di sasedwa khu va na Israyeli, va thava va tutuma, muthu ni muthu aya tshatshani gwaye.

¹³Jeyowasi, mufumeli wa Israyeli, a di mola Amaziya, mufumeli wa Judha, mwamana wa Jowasi, mwamana wa Akazi, dhoropani ga Bheti-Semesi; a wuya Jerusalema ata khungumula ndzari nya likhokhola gukhugela nyangwani ya Efrayimi kala mwanya wa khonatunu, gipimo nya guningane mazana mana (400) dzindronga.

¹⁴A dzega ndralama yatshavbo, parata ni mikanvu yatshavbo va nga yi manago Nyumbani ga PFHUMU Nungungulu, ni nyumbani nya thomba ya ndrangani ga mufumeli, a mola gambe ni vambe vathu a wuya navo Samariya.

¹⁵Yimbe mithumo ya Jeyowasi, ni esi a si giridego ni tshivba yaye, idzo a nga dwanago khidzo ni Amaziya, mufumeli wa Judha, yi lovidwe umo nya Libhuku nya Matimo ya Vafumeli va Israyeli.

¹⁶Jeyowasi lade gumogo ni vavelegi vaye; va mu dzingide Samariya, vbafuvbi ni vafumeli va Israyeli, mwanaye Jerobhowamo khuye a fumidego wulanga waye.

¹⁷Amaziya, mwamana wa Jowasi, mufumeli wa Judha, vbanyide gambe likhumi na livbandre myaga, hwane nya gufe ga Jeyowasi, mwamana wa Jeyowakazi, mufumeli wa Israyeli.

¹⁸Yimbe mithumo ya Amaziya, yi lovidwe umo nya Libhuku nya Matimo ya Vafumeli va Judha.

¹⁹Va di mu lemba, va mu wugela Jerusalema, a tutuma a hongola Lakisi, va mu lundra va ya mu songela iyoyo.

²⁰Va di ya mu rwala khu dzikavalu, vata mu dzinga Jerusalema, Dhoropani ga Dhavhidhe vbafuvbi ni vavelegi vaye.

²¹Vatshavbo vathu va Jerusalema, va di emisa mwanaye Azariya, a nga bani nari ni tanga nya likhumi na livbandre na moyo myaga a khala mufumeli gu tshikedza wulanga wa babe waye Amaziya.[8]

²²Hwane nya gufe ga mufumeli; mufumeli Azariya, a di wusedza lidhoropa la Elati, a li bweledzela mandzani ga mufumo wa Judha.

²³Khu mwaga nya likhumi na livbandre nya gufume ga Amaziya, mwamana wa Jowasi, mufumeli wa Judha, di phela gu fuma Samariya, Jerobhowamo, mwamana wa Jeyowasi, mufumeli wa Israyeli, fumide magumana myaga.

²⁴A di thuma mithumo nya guvivbe mahoni ga PFHUMU Nungungulu, gima kha nga hambana gilo ni sighoho sa Jerobhowamo, mwamana wa Nebhati, a nga gira a ghohisa va na Israyeli.

²⁵ Uye nuye a di wusedza mivbingano ya Israyeli, gukhugela nyangwani nya ndzila nya guhongole dhoropani ga Hamati, kala phwani ga Arabha, kha nga idzo PFHUMU Nungungulu wa Israyeli a nga bani a ganede khidzo khu magana ya githumi gyaye Jona, mwamana wa muprofeti Amitayi, givelegwa gya Gati-Heteri.

²⁶Kholu PFHUMU Nungungulu a di wona tshanisa nya yikhongolo ya na Israyeli, kholu a diri mwalo nya gu tshale, nya tshivba nuye nya gusolege, gu diri mwalo ni moyo nya gu va phasedzele.

²⁷Aholu PFHUMU Nungungulu a di si gu ganeli gukhuye a na fuvisa lina la Israyeli mafuni, a di va tshudzisa khu gyandza gya Jerobhowamo, mwamana wa Jeyowasi.

²⁸Yimbe mithumo ya Jerobhowamo, ni satshavbo a giridego ni tshivba a dwanidego khiyo ni idzo a nga wusedza khidzo va na Israyeli, madhoropani ya Dhamasiko ni Hamati ma nga bani ma lumba va na Judha, yi lovidwe umo nya Libhuku nya Matimo ya Vafumeli va Israyeli.

²⁹Jerobhowamo lade gumogo ni vavelegi vaye gumogo ni vafumeli va Israyeli. Wulangani gwaye fumide mwanaye Zakariya.