Read gitonga 2 Dzipfhumu 16 Bible Online

2 Dzipfhumu 16 - gitonga bible

2 Dzipfhumu 16

¹Khu mwaga nya likhumi na livbandre na mivili nya gufume ga Peka, mwamana wa Remaliya, a di phela gufuma Akazi, mwamana wa Jotamo, mufumeli wa Judha.

²Akazi a diri ni tanga nya magumavili myaga, gikhati a nga phela gufuma; fumide Jerusalema gipimo nya likhumi na livbandre na moyo myaga; kha nga thuma mithumo nya gululame mahoni ga PFHUMU Nungungulu waye, kha nga babe waye Dhavhidhe.

³ Kholu a di landrisela dzindzila dza vafumeli va Israyeli; a di vbisa ni gyanana gyaye niloni, a landrela mavbanyelo ya va nya mayigo, ayo PFHUMU Nungungulu a nga ma lundrago mbeli ga sanana sa Israyeli.

⁴Uye gambe phasede ni gu vbisa libani malangani nya gukhugege, musigomwanani ni dzitshinani nya misimbo yatshavbo yi thelago mahagane.

⁵ Khavbo avbo, Rezimi, mufumeli wa Siriya ni Peka, mwamana wa Remaliya, mufumeli wa Israyeli, va di gwela Jerusalema gu ya mu dhumela; va randrela Akazi, aholu kha va nga mu pala.

⁶Khu gikhati gile gya gimwegyo, Rezimi, mufumeli wa Siriya, a di bweledza lidhoropa la Elati mandzani ga Siriya, a lundra Vajudha va duga vbavbandze nya lidhoropa la Elati, Vaasiriya vata Elati, vata vbaha ni gu khala umo, kala matshiguni ya muhuno.[12]

⁷Akazi a di rumela myango ga Tigalati-Pileseri, mufumeli wa Asiriya, a mu embela, khuye: “Eni nyi githumi gyago ni gyanana gyago, gwela u ta nyi vbulugisa mandzani ga mufumeli wa Siriya ni mandzani ga mufumeli wa Israyeli, va nyi wugedego va nyi dhumela.”

⁸Akazi a di dzega ndralama ni parata, si nga bani si romo Nyumbani ga PFHUMU Nungungulu ni nyumbani nya dzithomba dza ndrangani ga mufumeli, a gira sagwati, a rumela ga mufumeli wa Asiriya.

⁹Mufumeli wa Asiriya a di mu yingisa, a gwela aya dwana ni Dhamasiko, a li wandra, a mola vathu vakone a va gira dzikhumbi, a va yisa Khiri, a songa Rezimi.

¹⁰Khavbo avbo, mufumeli Akazi, a di hongola Dhamasiko, guya tshangana ni Tigalati-Pileseri, mufumeli wa Asiriya; avbo a nga wonago giluvelo gi nga bani giromo Dhamasiko; mufumeli Akazi a di rumela ga muphasi nya mhamba Uriya, gifananiso nya giluvelo, makhalelo ni mawumbelo yakone.

¹¹Muphasi nya mhamba Uriya, a di vbaha giluvelo a gira satshavbo kha nga idzo a nga leletedwago khidzo khu mufumeli Akazi nari Dhamasiko; muphasi nya mhamba Uriya, a di gira kharalo, mufumeli Akazi na si gu wuyi khu Dhamasiko.

¹²Na wide mufumeli khu Dhamasiko, a di ta wona giluvelo, a hidzimela khu vbafuvbi, a gira dzimhamba avbovbo.

¹³A di gira phaselo waye nya guvbiswe, ni ningelo waye nya dzimbewu, ni ningelo nya wadwa, a mitegedzela novba nya miphaso yaye nya gurule vbagiluvelotunu vbale.

¹⁴ Aholu giluvelo nya sugu gi nga bani giri mbeli nya Nyumba ya PFHUMU Nungungulu, a di gi dusa khu wulangani waye, a gi vega khu vbakari ni vbakari nya giluvelo ni Nyumba ya PFHUMU Nungungulu, a gi vega khu bambe nya giluvelo gyaye khu phuvbo ga Wuronga.

¹⁵Mufumeli Akazi a di rumela muphasi nya mhamba Uriya, khuye: “Umo nya giluvelo nya gikhongolo u na vbisa umo miphaso nya guvbiswe dzimindrudzile gumogo gambe ni miningelo nya dzimbewu ya vbawutshigutunu, ni phaselo nya guvbiswe wa mufumeli ni ningelo waye nya dzimbewu, ni phaselo nya guvbiswe wa vathu vatshavbo va tigoni ni miningelo yawe nya dzimbewu, ni miningelo yawe nya mawadwa; u na mitegedzela avbo novba watshavbo nya miningelo nya guvbiswe ni novba watshavbo nya miphaselo; u na wu mitegedzela avbovbo; aholu giluvelo nya sugu nyi nga na gu alakanyela khigyo.”

¹⁶Muphasi nya mhamba Uriya a di gira satshavbo kha nga idzo a nga leletedwago khidzo khu mufumeli Akazi.

¹⁷ Mufumeli Akazi a di sigulela siseketelo nya sugu, a dusela ni sinamelo si nga bani siri vbatshani nya siseketelo, a reledza gambe ginamelo nya gikhongolo nya mufananiso nya yiphwa nya sugu, gi nga bani giri khu vbatshani nya dzimombe nya sugu, a gi vega vbawuhandzatunu nya siwindri.

¹⁸Nyumbani ga PFHUMU Nungungulu, a di vbindrugedza nyangwa nya Sabhadho yi nga bani yi vbahidwe avbovbo ni nyangwa ya vbavbandze ya mufumeli, khu gufela gu tsakisa mufumeli wa Asiriya.

¹⁹Yimbe mithumo ya Akazi ni satshavbo a giridego, yi lovidwe umo nya Libhuku nya Matimo ya Vafumeli va Judha.

²⁰ Akazi lade gumogo ni vavelegi vaye, va mu dzingide gumogo ni vavelegi vaye dhoropani gwa Dhavhidhe; wulangani gwaye a di fuma mwanaye Ezekhiya.