Read gitonga 2 Dzipfhumu 18 Bible Online

2 Dzipfhumu 18 - gitonga bible

2 Dzipfhumu 18

¹Khu mwaga nya wuraru nya gufume ga Ozeya, mwamana wa Ela, mufumeli wa Israyeli; a di phela gufuma Ezekhiya, mwamana wa Akazi, mufumeli wa Judha.

²A diri ni tanga nya magumavili na livbandre myaga, gikhati a phedego gufuma. Fumide Jerusalema gipimo nya magumavili na livbandre na mina myaga. Lina la mayi waye a di gu ranwa gupwani khu Abhi, nyamahegyane wa Zakariya.

³A di thuma mithumo nya gululame mahoni ga PFHUMU Nungungulu, kha nga satshavbo a nga girago babe waye Dhavhidhe.

⁴ Uye a di dusa malanga nya gukhugege, a khungumulela sifananiso, a thesa vbavbatshi lidingo nya gifananiso, a tsavingela nyoga nya gifananiso nya sugu yi nga bani yi giridwe khu Mosi; kholu kala litshigu lile va na Israyeli va di bani va nga gu yi vbisela libani, va di gu yi rana khu lina la Newusitani.

⁵Ezekhiya a di tumba PFHUMU Nungungulu wa Israyeli, vbakari ga vafumeli vatshavbo va na Judha gu diri mwalo uye a nga bani a fanana naye, ambari avo va fumidego hwane gwaye.

⁶Kholu uye a di namarela ga PFHUMU Nungungulu, gima kha nga hambana naye, a di sayisa milayo ya PFHUMU Nungungulu ni sileletelo a lovedego Mosi.

⁷PFHUMU Nungungulu a diri gumogo naye; a mu gira a dundruga satshavbo a nga girago; uye a di wugela mufumeli wa Asiriya, a si mu thumeli.

⁸Uye a di sasela Vafilistiya kala Gaza ni litigo lakone, gukhugela ga dzinyumba nya vawoneleli kala dhoropani nya likhokhola.

⁹Khu mwaga nya wu na nya gufume ga mufumeli Ezekhiya, a diri mwaga nya livbandre na wuvili nya gufume ga Ozeya, mwamana wa Ela, mufumeli wa Israyeli; Salimaneseri, mufumeli wa Asiriya a di ta randrela lidhoropa la Samariya a li dhumela.

¹⁰Khu hwane nya myaga miraru va di li wandra, khu mwaga nya livbandre na moyo nya gufume ga Ezekhiya, a nga bani ari mwaga nya livbandre na wu na nya gufume ga Ozeya, mufumeli wa Israyeli, khigyo gikhati va wandridego khigyo Samariya.

¹¹ Mufumeli wa Asiriya, a di vbagela va na Israyeli a va yisa Asiriya, aya va vega va vbaha Hala ni Habhori vbafuvbi ni tsongo wa Gozani ni madhoropani ya Vamedhi.

¹²Esi si giregide kholu va ngamba yingisa lito la PFHUMU Nungungulu wawe, aholu va di hambanisa gidzumeledzwano gyaye ni sileletelo satshavbo va nga leletedwago khu Mosi, githumi gya PFHUMU Nungungulu, gima kha va nga si yingisa ambari gu si gira.

¹³Khu mwaga nya likhumi na wu na nya gufume ga Ezekhiya, Senakerebhi, mufumeli wa Asiriya, a di gwela guta sasela madhoropa yatshavbo nya makhokhola ya Judha, a ma wandra.

¹⁴Khavbo avbo, Ezekhiya mufumeli wa Judha, a di rumela myango ga mufumeli wa Asiriya tigoni gwa Lakisi, khuye: “Nyi ghohide. Nyi dige. Ni gevbini u na gu gi vegago avbo gwangu, nyi na gi rwala.” Khavbo avbo, mufumeli wa Asiriya a di rwega Ezekhiya, mufumeli wa Judha, nandru nya gulivbe mazana mararu (300) nya dzitaleta nya parata ni magumararu dzitaleta nya ndralama.

¹⁵Khu kharati, Ezekhiya a di ningela parata yatshavbo yi nga bani yi romo Nyumbani ga PFHUMU Nungungulu, ni nyumbani nya guvegedzedwe thomba ya mufumeli.

¹⁶Ezekhiya a di namulela gambe ndralama yi nga bani yi londridwe malimbani nya Nyumba ya PFHUMU Nungungulu, ni ya uye mufumeli wa Judha a nga bani a londride umo nya madingo nya nyumba, a yi ningela ga mufumeli wa Asiriya.

¹⁷Mufumeli wa Asiriya a di rumela khu Lakisi, guya Jerusalema ga Ezekhiya, Taritani, Rabhi-Sarisi, Rabisake, na vari ni gikwata nya gikhongolo nya nyimbi, va gwela va vboha Jerusalema, na va vbohide va di ya ema vbafuvbi ni litsiva li kembidwego la vbatshani li guromo ndzilani nya lithembwe la muhandzi.

¹⁸Avbo va nga ranago mufumeli, a di duga Eliyakimi, mwamana wa Hilikiya, muthangeli nya nyimbi ya mufumeli, mulovi Sebhina ni Jowa, mwamana wa Asafi, musayisi nya mabhuku nya matimo.

¹⁹Rabisake a di va embela, khuye: “Indrani mu ya embela Ezekhiya, khenu: Mufumeli nya khongolo, mufumeli wa Asiriya, a ngu ganela, kharati: Gasi wa gu themba ginani?

²⁰Wa gu alakanya gukhuwe magana ma dugago khu kanani gwago, ma na ni giphaso ni wugengeli ni tshivba nya gudwane nyimbi, gani? Gasi wa gu tumba mani olu u tiyago gu nyi wugela.

²¹Nyi ngu gu wona gukheni wa gu tumba Egipito, ndronga nya tshava yi fanyegidego, yi payago mandza ya oyu a yi khighelago. Khidzo kharato ga Faro, mufumeli wa Egipito, ga vatshavbo vale va mu tumbago.

²²Aholu, wa gu nyi embela gukhuwe: Ha gu tumba PFHUMU Nungungulu wathu: Ina khandruye Nungungulu wule a nga khungumuledwa malanga yaye nya gukhugege ni siluvelo saye khu Ezekhiya, a embela Judha ni Jerusalema, khuye: Mu na khozela vbagiluvelotunu vbavba gya Jerusalema, gani?

²³Gasi olu gira gidzumeledzwano ni mune wangu, mufumeli wa Asiriya, eni nyi na gu ninga magumavili mazana (2.000) dzikavalu, wa gu mana vama va na gu dzi khilelago.

²⁴U na dzi kodza kharini gu tutumisa moyo nya dzindruna dza mufumeli wangu ambari nari moyo nya avo nya vadugwana, gani? Khu guralo, uwe wa gu tumba Egipito khu kotani nya dzikareta ni vakhileli vaye.

²⁵Ina eni nyi di gwela wulanga wowu nyamba embedwa khu PFHUMU Nungungulu guta nyi ta wu sasela, gani? PFHUMU Nungungulu a nyi embede, khuye: Gwela ga litigo leli u ya li sasela.”

²⁶Khavbo avbo, Eliyakimi, mwamana wa Hilikiya, ni Sebhina ni Jowa, va di embela Rabisake, khavo: “Hi ngu lomba gukhethu u ganela ga sithumi sago khu lidimi nya giasiriya; kholu ethu hi ngu li yingisa gwadi; u nga ganeli khu Gijudha ga vathu va khadego vbatshani nya ndzari.”

²⁷Aholu Rabisake a di va embela, khuye: “Ina mune wangu, a di nyi rumela basi ga mune wago, navbo gwago guta ganela magana yaya, gani? Nasiri ga vathu vava va khadego vbatshani nya ndzari, gasi va hodza gumogo nanu magimba ni gu sela marundro yanu, gani?”

²⁸Rabhisaki a di ema a laledza khu lito nya likhongolo khu Gijudha, a ganela, khuye: “Yingisani magana ya mufumeli nya khongolo, mufumeli wa Asiriya.

²⁹Wari, khuye: A nga mu pfhadzi Ezekhiya; kholu kha na mi vbulugisa mandzani gwangu;

³⁰ambari gu mi sengani khuye tumbaniPFHUMU Nungungulu, ni gukhuye khu lisine PFHUMU Nungungulu a na hi vbulugisa, ni lidhoropa leli kha la na ningedwa mandzani ga Asiriya.

³¹Mu nga mu yingisi Ezekhiya, kholu mufumeli wa Asiriya a ngu ganela, khuye: Girani gurula ni eni; mu dzi ningelani avbo gwangu; khavbo avbo, muthu ni muthu a na hodza mihandro ya thembweni gwaye, ni mihandro nya simbo waye, bwelo khavo a sela mati nya nambo waye.

³²Kala nyi ta mi dusani nyi mi yisa ga litigo nya gufanane neli lanu; litigo nya tirigu ni vbinyu; litigo nya sibaba ni marembwe; litigo nya miolivha ni mafura ni wulombe, gasi mu fela guvbanya mu sifi; mu nga yingiseni Ezekhiya, kholu a ngu mi pfhadza, khuye: PFHUMU Nungungulu a na hi vbanyisa.

³³Ina vanungungulu va mambe mayigo va dzi kodzide gu tshudzisa mayigo nya vathu va guromo mandzani ga mufumeli wa Asiriya, gani?

³⁴Vomo hayi vanungungulu va Hamati, ni va Aripadhe? Vomo hayi vanungungulu va Sefarivhayimi, va Hena ni va Ivha? Ina va tshudziside Samariya mandzani gwangu, gani?

³⁵Khu vamani avo vbakari ga vanungungulu vatshavbo va mafuni, va tshudzisidego litigo lawe mandzani gwangu, gasi PFHUMU Nungungulu a tshudzisa Jerusalema mandzani gwangu, na?

³⁶Khu guralo, vathu va di degula nyamba mu hakha gilo. Kholu mufumeli a di va rumide khuye, va nga mu hakhi gilo.

³⁷Khavbo avbo, Eliyakimi, mwamana wa Hilikiya, ndruna ya ndrangani ga mufumeli, ni mulovi Sebhina, ni Jowa, mwamana wa Asafi, musayisi nya mabhuku nya matimo, va dita ga Ezekhiya, na va pferude dzingandzu dzawe, vata mu embeledzela magana ya Rabhisaki.