Read gitonga 2 Dzipfhumu 19 Bible Online

2 Dzipfhumu 19 - gitonga bible

2 Dzipfhumu 19

¹Avbo mufumeli Ezekhiya a ngapwago satshavbo sesi, a di pferula dzingandzu dzaye, a ambala gilendra a bela Nyumbani ga PFHUMU Nungungulu.

²Khavbo avbo, a di rumela Eliyakimi, ndruna ya nyumbani ga mufumeli, ni mulovi Sebhina, ni madhota ya vaphasi nya mhamba na va ambade silendra, ga muprofeti Isaya, mwamana wa Amosi.

³Vaya mu embela kharati, khavo: “Ezekhiya a ngu ganela, khuye: Litshigu leli, litshigu nya wuvi, nya gukawukwe ni dzitshoni; kholu sanana si ngu vbweta gu duga khu ndrani, aholu tshivba nya guvelege yi mwalo.

⁴A gu dzina saye, PFHUMU Nungungulu wago, a yingiside magana ya Rabhisaki ayo a rumedwego khu mune waye, mufumeli wa Asiriya, guta vala Nungungulu a vbanyago, mwendro saye PFHUMU Nungungulu wago a na kawuka magana yaya a ma pwidego; gasi olu gira nombelo khu vathu vava vatshadego!”

⁵Sithumi sa mufumeli Ezekhiya si diya ga Isaya,

⁶khavbo avbo, Isaya a di va embela, khuye: “Mu naya embela mune wanu, khenu: PFHUMU Nungungulu a ngu ganela, kharati: U nga thavi khu kotani nya magana yoyo u ma pwidego, ayo nyi nga vadwa khayo khu sithumi sa mufumeli wa Asiriya.

⁷Eni nyi na mu thela limbe liphuvbo, gasi avbo a na gu pwago mahungu nya gukari, uye a na bwelela tigoni gwawe; Eni nyi na mu sasela khu litshari tigoni gwawe.”

⁸Khu guralo, avbo Rabhisaki, a nga bwelela, a diya mana mufumeli wa Asiriya, na gu dwana ni Libhina, kholu a di pwide gupwani khugide khu Lakisi.

⁹Avbo mufumeli a nga pwago gupwani: “Tiraka, mufumeli wa Etiyopiya, khu mu woni oyu atago guta gu dwanisa;” a di engedza gambe gu rumela myango ga Ezekhiya, khuye:

¹⁰“Mu naya ganela kharati ga Ezekhiya, mufumeli wa Judha, khenu: U nga pfhadzwi khu Nungungulu wago u mu tumbago, khuwe Jerusalema kha gu na ningedwa mandzani ga mufumeli wa Asiriya.

¹¹Uwe u pwide iso si giridwego ga mayigo yatshavbo khu vafumeli va Asiriya, idzo ma nga mbembiswago khidzo; ina uwe u na vbuluga, gani?

¹²Ina mayigo yoyo, ma mbembisidwego khu vababe vangu, ma vbulugisidwe khu vanungungulu vawe: Nya nga Gozani, Harani, Rezefi ni ga sanana sa Edheni, si nga bani siri tigoni ga Telasari, gani?

¹³Womo hayi mufumeli wa Hamati, wa Aripadhi ni mufumeli nya lidhoropa la Sefarivhayimi, la Hena ni la Avha?

¹⁴Avbo Ezekhiya a nga hakhago lidangalila khu mandzani ga sirumwa sile, a li hevbula, a di gwela aya bela Nyumbani ga Nungungulu, aya li tula mbeli ga PFHUMU Nungungulu.

¹⁵ A di ya lombelela mbeli ga PFHUMU Nungungulu waye, khuye: “PFHUMU Nungungulu wa Israyeli, u khalago vbatshani nya dzikerubhimi, uwe kamwe, khuwe u gu Nungungulu nya mifumo yatshavbo ya mafuni, uwe u giride ndzadzini ni mafuni.

¹⁶Olu PFHUMU Nungungulu, neredza ndzeve yago u nyi yingisa! Olu tula maho, Pfhumu ma wona! Yingisa Pfhumu magana ya Senakerebhi, a ma rumedego guta vala Nungungulu a vbanyago.

¹⁷Lisine, PFHUMU Nungungulu, vafumeli va Asiriya va mbembiside vathu nya gutale ni gu ghohetela mayigo yawe;

¹⁸va vbisa niloni vanungungulu vawe; kholu avo va di siri vanungungulu, aholu va diri sifananiso nya guvatwe khu mandza nya vathu, nya misimbo ni siwindri; khu guralo, va va mbembiside.

¹⁹Gasi olu, PFHUMU Nungungulu wathu, hi vbulugise, mandzani ga Senakerebhi, gasi mifumo yatshavbo ya mafuni yi dziti gu khiyo Uwe Pfhumu, khuwe basi, U gu Nungungulu.”

²⁰Khavbo avbo, Isaya, mwamana wa Amosi, a di rumela guya embela Ezekhiya, khuye: “PFHUMU Nungungulu wa Israyeli, a ngu ganela kharati, khuye: Eni nyi yingiside iso u si lombidego mayelano khu Senakerebhi, mufumeli wa Asiriya.

²¹PFHUMU Nungungulu a ngu ganela kharati avbo gwaye, khuye: Nyamahegyane nya likendzi wa Siyoni, a ngu gu hembulula a gu hega; nyamahegyane wa Jerusalema a ngu ninginingisa hungo khu hwane gwago.

²²Khu mani u mu vadego ni gu mu tsorodzela? Khu mani u mu khusedzedego lito? Khu mani u mu ronogedego? U vbweta gu dwana ni uye a Agidego wa Israyeli.

²³Khu magana nya myango yago u tsorodzede PFHUMU Nungungulu, u ganela, khuwe: Ni gutala nya dzikareta dzangu, nyi ngu gwela dzitshokhani nya sigomo, vbatshani nya dzitshokha nya sigomo sa Libhanoni, nyi ya pila misimbo yaye nya gulaphe nya sedhari, ni migure yaye nya wumburi, ni mahegiso nya malanga yaye, nyi bela kala mahegiso nya sihuru sa Thembweni gwaye nya wumburi.

²⁴Nyi kede milambo, nyi sela mati ya mambe mayigo, Nyi vbwiside mitsongo yatshavbo ya Egipito khu migondro yangu.

²⁵Olu wa gu hangwa khu gukhuwe esi nyi si giride khu gale, ni gu, nyi si wumbide khu matshigu ma vbindridego, gani? Gasi olu, nya gu si gira si tadzisega nyi gu giride gu u sasela madhoropa nya makhokhola ma khala marumbi.

²⁶Khu guralo, vavbanyi vaye va di vbela tshivba, va hambanega mapimo, va khala nga mwasi wa khabini, mitongwe nya gunyuge, ni mwasi nya gupfhulele nyumba, ni sivbila si bangago si si gu rumbugi

²⁷Aholu eni nyi ngu mati makhalelo yago, mabelelo yago ni madugelo yago, ni idzo u gu ni giviti ngudzu khidzo khu eni,

²⁸Khu kotani nya olu u gu ni likhulo ngudzu khu eni, kholu gu nyi wugela gwago, gu litide kala dzindzeveni gwangu khu guralo, nyi na gu thela khalo dzithonvuni gwago, ni matamo kanani gwago, nyi bwelo khavbo nyi gu bweledza khu ndzila u dzudego khiyo.”

²⁹Gikombiso gyago, gi na bani giri egi: Mwaga yoyu mu na hodza mipfhundre, khu mwaga wutago mu na hodza iso nya gu dzi bugele sabune, khu mwaga nya wuraru, mu na yala mu vbwera, mu na lima marembwe nya dziuvha mu hodza mihandro yaye.

³⁰Mitshaledwa ya nyumbani ga Judha, avo va na vbulugago, yi na engedza yi tsitsa mikhamba mafuni, yi thela mihandro matamoni.

³¹Kholu khu Jerusalema gu na duga mitshaledwa, gasi khu gigomoni gya Siyoni gu duga avo va vbulugidego; isoso si na girega khu kotani nya gukhathale nya idzo a khathalago khidzo PFHUMU Nungungulu.

³²Kharato, PFHUMU Nungungulu, a ngu ganela kharati khu kotani ya mufumeli wa Asiriya, khuye: “Gima kha na bela dhoropani momu ambari ni gu khwandra giholoma a gi rumela, mwendro gu hidzimela ni gitshangu ni gu li dembela naphwi.”

³³PFHUMU Nungungulu a ngu ganela, khuye: “Khu ndzila a natago khiyo, a na bwelela gambe khiyo; Gima kha na bela dhoropani momu.

³⁴Kholu nyi na vhikela lidhoropa leli, nyi li vbulugisa, khu guhaladza gwangu ni kotani nya lihaladzo nyi gu nalo ni githumi gyangu Dhavhidhe.”

³⁵Khu wutshigu wowo wa wumowo, Ngilozi ya PFHUMU Nungungulu, yi dita vbalizumbotunu la Vaasiriya, yita sasela lizana ni livbandre na mararu ni livbandre magumi mazana (185.000) vama; khu mindru gakone gu dita manega sirumbi basi.

³⁶Khavbo avbo, Senakerebhi, mufumeli wa Asiriya, a di khuga a phara ndzila nya gu bwelele tigoni gwaye, aya khala Ninivha.

³⁷Avbo a nga bani na gu khidzimide nyumbani ga nungungulu waye Nesiroki, sanana saye Adharameleki ni Sarezeri, va di mu songa khu gu mu paya khu litshari, va tutuma va hongola tigoni ga Ararati. Mwanaye Esari-Hadhomi, khuye a mu tshikedzidego vbagikhalotunu gwaye nya wufumu.