Read gitonga 2 Dzipfhumu 2 Bible Online

2 Dzipfhumu 2 - gitonga bible

2 Dzipfhumu 2

¹Avbo PFHUMU Nungungulu a nga vbweta gu dzega Eliya a mu yisa ndzadzini khu gipupwane, Eliya a di khuga khu Ghiligali nari ni Elizewu.

²Eliya a di embela Elizewu, khuye: “Uwe khala avba, kholu PFHUMU Nungungulu a nyi rumede gu hongola Bheteli.” Aholu Elizewu a di ganela, khuye: “Nyi ngu sambanya khu PFHUMU Nungungulu a vbanyago ni hefemulo wago kheni, gima kha nyi na nga gu diga. Khu guralo, va di hongola vatshavbo Bheteli.”

³Khavbo avbo, sanana sa vaprofeti si nga bani na siri Bheteli, si di duga si khinga Elizewu sita, khiso: “Ina u ngu dziti nya gukhuwe muhuno PFHUMU Nungungulu a na gu dzegela mune wago, gani?” Uye a di va embela, khuye: “Eni neni nyi ngu siti gwadi, aholu degulani.”

⁴Eliya a di embela Elizewu, khuye: “Khala avba, kholu PFHUMU Nungungulu a nyi rumede guya Jeriko.” Aholu uye a di khuye: “Nyi ngu sambanya khu PFHUMU Nungungulu a vbanyago, ni hefemulo wago gukheni, gima kha nyi na nga gu diga.” Khu guralo, va di hongola Jeriko.

⁵Khavbo avbo, sanana sa vaprofeti si nga bani siri Jeriko, si di hidzimela ga Elizewu si ta, khiso: “Ina u ngu dziti nya gukhuwe muhuno PFHUMU Nungungulu a na gu dzegela mune wago a mu khusedzela vbatshani, gani?” Uye a di hakha khuye eni neni nyi ngu dziti, degulani.

⁶Eliya a di embela Elizewu, khuye: “Khala avba, kholu PFHUMU Nungungulu a nyi rumede gu hongola Joridhani.” Aholu uye a di mu hakha, khuye: “Nyi ngu sambanya khu PFHUMU Nungungulu a vbanyago ni hefemulo wago gukheni, gima kha nyi na nga gu diga.” Khu guralo, va di hongola gumogo.

⁷Avo va nga hongola va diri livbandre magumi vama nya sanana sa vaprofeti, va ya ema khu hwindzo gwawe va khedzana navo, avo navo khu wuvili wawe va ema khu bambe ga Joridhani.

⁸Khavbo avbo, Eliya a di dzega libhadzi laye a li peta a veta khilo mati, ayo ma di kabanega khu vbakari ma khala eno ni eno, va vavili va di tshatuga khu mawundru, mati na ma bangide.

⁹Hwane nya gu bani va tshatugide, Eliya a di embela Elizewu, khuye: “Nyi lombe igyo u gi vbwetago, gasi nyi gu girela olu na nyi si gu duswi avbo gwago.” Elizewu a di mu embela, khuye: “Nya gu vbweta gukheni nyi mana giningwa nya liphuvbo lago gi wuyedzedwago khu guvili.”[2]

¹⁰Eliya a di mu hakha, khuye: “U lombide gilo nya gulemele; aholu wa gu nyi wona gikhati nyi dzegwago avbo gwago, si na girega kharalo; aholu wa gumba nyi wona na nyi gu dzegwa, kha si na nga girega.”

¹¹Gikhati va nga bani va longoloka gumogo ni gu bhula, gu di wonega kareta nya nilo ni dzikavalu nya nilo, dzi ta va hambanisa va vavili, Eliya a di khusedzedwa ndzadzini khumo nya gipupwane.

¹² Elizewu, na wonide esi, a di womba huwa, khuye: “Baba wangu, baba wangu! Dzikareta dza Israyeli ni vakhileli vawe nya dzikavalu!” Kha nga mu wona gambe. Khavbo avbo, Elizewu a di dzega dzingandzu dzaye a dzi pferula khu vbakari ni vbakari.

¹³A di dzega gambe ni libhadzi la Eliya, li nga mu thegelago; a bwelela ata ema bambe ga Joridhani.

¹⁴A dzega libhadzi la Eliya li nga mu thegelago, a veta khilo mati, a ganela, khuye: “U womo hayi Uwe PFHUMU Nungungulu wa Eliya?” Khavbo avbo, a di veta mati ma kabanega khu vbakari ma manega eno ni eno; Elizewu a vbindra khu vbakari.

¹⁵Vapizane va vaprofeti va nga bani va khade thonono ni Jeriko, na va mu wone, va di khavo: “Liphuvbo la Eliya li mbakide vbatshani ga Elizewu.” Va di mu khinga va ya mu khidzimela va thega khu dzikhovbe mbeli gwaye.

¹⁶Va ganela gwaye, khavo: “Wona, vbakari ga ethu sithumi sago, vomo livbandre magumi vama nya tshivba, va dige va hongola va ya vbweta mune wago, kholu a gu dzina saye liphuvbo la PFHUMU Nungungulu li di mu dzega li ya mu rinya gigomoni nya gukari, mwendro releloni nya gukari.” Aholu uye a di va embela, khuye: “Mu nga rumi muthu.”

¹⁷Aholu avo va di mu gurumedza ngudzu kala a va embela, khuye: “Va rumeleni.” Va di rumela livbandre magumi vama, va ya vbedza matshigu mararu na va gu mu vbweta, aholu kha va nga mu mana.

¹⁸Na va wide ga Elizewu, a nga bani na tshade Jeriko, a di va embela, khuye: “Kha nya mi embelani gukheni mu nga hongolini, gani?”

¹⁹Vathu nya gukari va dhoropani, va di embela Elizewu, khavo: “Makhalelo nya lidhoropa leli ma mburide, kha nga idzo uwe mune wangu u li wonago khidzo; aholu mati yakone khandri yadi ni mafu yakone gyumba.”

²⁰Uye a di va embela, khuye: “Nyi reseleni kanvwana nya wuphya, mu thela munyu ndrani gwaye.” Avo va di mu resela.

²¹Khavbo avbo, a di duga aya gifefetunu nya mati, aya gi thela munyu, a ganela, khuye: PFHUMU Nungungulu a ngu ganela kharati, khuye: Nyi thumide mati yaya, vbakari gwanu kha gu na manega gambe lufu ambari gumba bhindzula gilo.

²²Khu guralo, mati yale ma di thumwa ma khala mati nya yadi kala na muhuno, kha nga guganela ga Elizewu.

²³Khavbo avbo, a di khuga khu vbale a gwela Bheteli; nari ndzilani nya guhongole, gu di duga sikhwathana khu dhoropani si mu tsorodzela, khiso: “Gwela nya lihandlawe! Gwela nya lihandlawe!”

²⁴A di thendregedza a khedza hwane, a di si wona a si vala linani ga PFHUMU Nungungulu; khavbo avbo, gu di duga khu khabini sirengo sivili nya sikankanka si ta vbadzulela magumana na sivili nya sikhwathana sile.

²⁵Khu vbale, uye a di gwela gigomoni gya Karimelo; aya khuga khavbo a wuya Samariya.