Read gitonga 2 Dzipfhumu 21 Bible Online

2 Dzipfhumu 21 - gitonga bible

2 Dzipfhumu 21

¹Manasi, a diri ni tanga nya likhumi na mivili myaga, gikhati a nga phelago gu fuma, fumide Jerusalema livbandre magumi na livbandre myaga; lina la mayi waye, a di ranwa gupwani khu Hefizibha.

² A di thuma mithumo nya guvivbe mahoni ga PFHUMU Nungungulu, a landrela mavbanyelo nya mayigo ma nga lundrwago khu PFHUMU Nungungulu mbeli ga va na Israyeli, gikhati va nga belago tigoni gwawe.

³A di vbahedza malanga nya gukhugege, ayo ma nga bani ma khungumudwe khu babe waye Ezekhiya, a emisa siluvelo sa Bhahali, a gira gifananiso nya lidingo, nya nga igyo gi nga girwa khu Akabi, mufumeli wa Israyeli; a di khidzimela sivangwa satshavbo sa ndzadzini, a si khozela.

⁴A di vbaha siluvelo Nyumbani ga PFHUMU Nungungulu, umo Pfhumu a nga ganelago, khuye: “Nyi na vega Lina langu Jerusalema.”

⁵A di vbahela gambe siluvelo nya sivangwa satshavbo sa ndzadzini ni umo nya makupakupa ya mavili ya PFHUMU Nungungulu.

⁶A di gira miphaselo khu gu vbisa gyanana gyaye niloni; a namarela umo nya wunyanga ni wuloyi; a di wumba dzinyanga nya gufembe ni vanyadzisolo, a simama gu gira guvivba mbeli ga PFHUMU Nungungulu, kala a mu gorogisa ngudzu.

⁷Emiside gambe gifananiso nya simbo gya Asitaroti, Nyumbani ga PFHUMU Nungungulu, a ganedego ga Dhavhidhe ni ga mwanaye Solomoni, khuye: “Nyumbani momu, ni dhoropani momu ga Jerusalema, nyi gu hathide vbakari nya mahundzu yatshavbo ya Israyeli, gukheni nyi na vega Lina langu kala gupindruga.

⁸ Va na Israyeli va gu sayisa sileletelo sangu, kha nga idzo wu lombago khidzo Nayo nyi leletedego ga githumi gyangu Mosi; gima kha nyi na dzumela gukheni migondro yawe yi duswe tigoni nyi ningidego vababe vawe.”

⁹Aholu avo kha va yingisa gilo, kholu Manasi a di va ghohisa gu kala va gira silo nya gunyenyeze guvbindra mayigo PFHUMU Nungungulu a ma mbembisidego mbeli ga va na Israyeli.

¹⁰PFHUMU Nungungulu a di ganela khu magana ya sithumi saye vaprofeti, khuye:

¹¹“Kha nga olu Manasi, mufumeli wa Judha a giridego manyala yaya, a ghoha guvbindra iso va giridego Vaamori, avo va thangidego mbeli gwaye, a ghohisa ni va na Judha khu sifananiso saye.

¹²Khu guralo, PFHUMU Nungungulu wa Israyeli a ngu ganela kharati, khuye: “Nyi na resa tshanisa Jerusalema ni Judha, tshanisa nya yikhongolo nya gu ni wule a na gu yipwago, dzindzeve dzaye dzina tshimega.

¹³Nyi na pima Jerusalema khu ngodzi nya lipimo nyi nga pimago khiyo Samariya, ni pimo nya nyumba ya Akazi; nyi na guha Jerusalema, kha nga idzo muthu a guhago mbiya a yi fenengedza.

¹⁴Nyi na dzudzuga mitshaledwa nya thomba yangu, nyi va ningela mandzani ga valala vawe, va na phangwa ni gu modwa khu valala vawe.

¹⁵Kholu va giride iso si vivbidego mahoni gwangu va nyi wugela va nyi gorosa, gukhugela litshigu vababe vawe va dugidego khu tigoni ga Egipito kala muhuno.”

¹⁶Gu diga nya esi, Manasi vbaladzide gambe novba nya wungi ngudzu nyambana nandru, kala a tadza Jerusalema gwatshavbo khuwo, gukhugela mahegiso kala mahegiso, vbavbandze nya gighoho gyaye a nga ghohisa khigyo va na Judha, giride silo nya guvivbe mahoni ga PFHUMU Nungungulu.

¹⁷Gasi yimbe mithumo ya Manasi, ni satshavbo iso a giridego, sighoho saye a ghohidego, si lovidwe umo nya Libhuku nya matimo ya Vafumeli va Judha.

¹⁸Manasi lade gumogo ni vavelegi vaye, a dzingidwe thembweni nya senge la ndrangani gwaye, thembweni ga Uza; fumide wulangani gwaye, mwanaye Amoni.

¹⁹Amoni, a diri ni magumavili na mivili myaga, gikhati a phedego gu fuma, fumide Jerusalema myaga mivili; lina la mayi waye a diri uye, Mesulemeti, nyamahegyane wa Haruzi, givelegwa gya Jotiba.

²⁰A di thuma mithumo nya guvivbe mahoni ga PFHUMU Nungungulu, kha nga idzo a nga girago babe waye Manasi.

²¹Kholu a di gimbila khu ndzila a gimbidego khiyo babe waye, a khozela sifananiso si nga khozedwago khu babe waye, a khidzima mbeli ga iso.

²²A di pfhurarela PFHUMU Nungungulu wa vababe vaye, a si gimbili khu dzindzila dza PFHUMU Nungungulu.

²³Sithumi sa Amoni si di gira gikungo, si songa mufumeli ndrangani gwaye.

²⁴Aholu vathu va tigoni gwaye, va di songa vatshavbo avo va nga gira gikungo nya gusonge mufumeli Amoni; vathu va tigoni gwaye, va di vega mwanaye Josiya gu khala mufumeli a tshikhedza wulangani gwaye.

²⁵Gasi yimbe mithumo ya Amoni a giridego, yi lovidwe umo nya Libhuku nya Matimo ya Vafumeli va na Judha.

²⁶Va mu dzingide thowoni gwaye, thembweni nya senge ga Uza; wulangani gwaye, fumide Mwanaye Josiya.