Read gitonga 2 Dzipfhumu 3 Bible Online

2 Dzipfhumu 3 - gitonga bible

2 Dzipfhumu 3

¹Joramo, mwamana wa Akabi, phede gu fumela va na Israyeli, dhoropani ga Samariya, khu mwaga nya likhumi na livbandre na miraru nya gufume ga Josafani, mufumeli wa Judha; fumide likhumi na mivili myaga.

²A di thuma mithumo nya guvivbe mahoni ga PFHUMU Nungungulu; aholu kha nga gira kha nga babe waye, ambari kha nga mayi waye; kholu a di khungumula gifananiso gya Bhahali, gi nga girwago khu babe waye.

³Khu guralo, a di namarela ga sighoho sa Jerobhowamo mwamana wa Nebhati, a nga ghohisa Israyeli watshavbo; a si hambani naso.

⁴Khavbo avbo, Mesa, mufumeli wa na Mowabhi, a diri mufuyi nya mitshambi, uye khu mwaga ni mwaga, a di gu livba gikhaba ga mufumeli wa Israyeli, khu lizana magumi mazana (100.000) dzinvuta, ni mawoya nya lizana magumi mazana (100.000) dzihamba.

⁵Avbo a ngafago Akabi, mufumeli wa Mowabhi a di wugela mufumeli wa Israyeli.

⁶Khu guralo, Joramo a di dzegela gu khuga khu Samariya, aya somisa va na Israyeli vatshavbo.

⁷A di rumela myango guya embela Josafati mufumeli wa Judha, khuye: “Mufumeli wa Mowabhi a ngu nyi dhumela, u na hongola uya nyi phasedza gu dwana naye, gani?” Uye a di hakha, khuye: “Nyi na hongola; eni nyi na khala kha nga uwe, vathu vangu va na khala kha nga vago ni dzikavalu dzangu, dzi na khala kha nga dzago.”

⁸Khavbo avbo, Joramo a di mu wudzisa, khuye: “Khu yevbini ndzila hi na gu gwelago khiyo?” Uye a di mu hakha, khuye: “Khu ndzila ya giwulani gya Edhomi.”

⁹Khu guralo, va di khuga vafumeli va vavili, wa na Israyeli ni wa na Judha gumogo ni mufumeli wa Edhomi; va di gimbila pfhuka nya livbandre na mavili matshigu, gu di hamugega mati nya gusele masotshwa ni sifuyo va nga bani na vari naso.

¹⁰Khavbo avbo, mufumeli wa Israyeli a di ganela, khuye: “Mayi wangu! PFHUMU Nungungulu a di rana vafumeli vava nya vararu, gasi guta va ningela mandzani ga mufumeli wa Mowabhi.”

¹¹Aholu Josafati a di mu wudzisa, khuye: “Mwalo avba muprofeti moyo wa PFHUMU Nungungulu gasi hi wudzisa ga Pfhumu khavbo gwaye, gani?” Moyo nya sithumi sa mufumeli wa Israyeli a di hakha, khuye: “Womo avba Elizewu, mwamana wa Safati, a nga bani na gu thela mati mandzani ga Eliya.”

¹²Josafati, khuye: “Magana ya PFHUMU Nungungulu momo avbo gwaye.” Khavbo avbo, vafumeli va vararu va di relela ga Elizewu.

¹³Aholu muprofeti Elizewu, a di embela mufumeli wa Israyeli, khuye: “Gasi mahungu muni nyi gu nawo nago uwe, na? Indra ga vaprofeti vababe wago ni ga vaprofeti vamayi wago.” Aholu mufumeli wa Israyeli a di mu hakha, khuye: Ahihi, kholu PFHUMU Nungungulu, khuye a residego vafumeli vava va vararu gasi guta va ningela mandzani gwa va na Mowabhi.

¹⁴Elizewu a di ganela, khuye: “Nyi ngu sambanya khu PFHUMU Nungungulu nya Tshivba Yatshavbo, Uye nyi mu thumelago, kholu nari gupwani khandri olu nyi ningago githawo Josafati, mufumeli wa Judha, gima nyi si gu yingisi, ambari gu gu thela kota.

¹⁵Ambari khu guralo nyi reseleni muthu a kodzago gu womba gitendre.” Avbo mu wombi nya gitendre a nga womba, tshivba ya PFHUMU Nungungulu yi dita avbo ga Elizewu.

¹⁶Uye a di ganela, khuye: “PFHUMU Nungungulu a ngu ganela, kharati: Kembani kovani momo milambo nya yingi!

¹⁷Kholu PFHUMU Nungungulu a ngu ganela, khuye: Kha mu napwa phuvbo ambari gu wedwa khu ndzadzi; aholu kova yoyu wu na tala khu mati mu na selago enu, mitshambi yanu gumogo ni sifuyo sanu.

¹⁸Aholu khandri iso basi mahoni ga PFHUMU Nungungulu, a na mi ningani gambe mandzani gwanu Mowabhi.

¹⁹Mu na saselani madhoropa yawe yatshavbo nya makhokhola, ni madhoropa yatshavbo nya tshivba, mu kokelela misimbo yatshavbo yi ningago mihandro, mu futela milambo yatshavbo nya mati, mu ghohetela khu siwindri marembwe yatshavbo nya yadi.”

²⁰Khu litshigu li landrelago, avbo va nga bani va gu ningela miningelo nya guhodza, gu dita mati khu ndzila ya Edhomi, litigo latshavbo li di tala khu mati.

²¹Avbo va na Mowabhi vatshavbo va ngapwago gupwani vafumeli vava va gwede gasi guta dwana navo, va di tombanisa vatshavbo, gukhugela avo nya vadugwana kala nya vakhongolo vata ema khu mivbinganoni va dwana.

²²Va di wuga ni dzimindru dzile avbo lidambo li nga bani li vbyuga matini, va na Mowabhi va di wona mbeli gwawe, mati nya gufuvile nya nga novba.

²³Va ganela, khavo: “Owu kamwe novba; khu lisine, vafumeli vale va dzi mbembiside, va songana khu gyawe. Khu guralo, enu va na Mowabhi, hongoleni hiya va phanga.”

²⁴Avbo va nga vbohago lizumboni ga va na Israyeli, va na Israyeli va di khuga va dwana ni va na Mowabhi, va na Mowabhi va di tutuma mbeli ga va na Israyeli. Va na Israyeli va di bela tigoni gwawe va sasela va na Mowabhi.

²⁵Va di khungumulela madhoropa; khavbo avbo, mwama ni mwama a di rinya giwindri marembweni nya dzimbewu, va futela milambo, va kokelela misimbo yatshavbo yi ningago mihandro, gu di tshala basi lidhoropa la Kiri-Hareseti; aholu avo va nga bani na va rinya siwindri, va di li randrela va li sasela, gu tshala basi siwindri.

²⁶Avbo mufumeli wa Mowabhi a nga wona nya gukhuye a ngu padwa, a di dzega livbandre na mavili mazana (700) vama nya gu bani va somide matshari va duga va tutuma vaya ga mufumeli wa Edhomi, aholu avo va di tandrega.

²⁷Khavbo avbo, a di dzega mwanaye nya matiwula uye a nga bani a vbweta gu mu tshikhedza vbagikhalotunu gwaye nya wufumu, a mu ningela gu khala phaselo nya guvbiswe vbandzaritunu; avbo gu nga wugago likhulo nya likhongolo ga va na Israyeli; va diga mufumeli wa Mowabhi, va khuga khu vbale va bwelela tigoni gwawe.[3]