Read gitonga 2 Dzipfhumu 4 Bible Online

2 Dzipfhumu 4 - gitonga bible

2 Dzipfhumu 4

¹Nyamayi moyo, wa vbakari ga vagadzi va vapizane va vaprofeti, a di lila ga Elizewu a mu embela, khuye: “Githumi gyago, mwama wangu, fude; uwe u ngu dziti gwadi gukhuwe githumi gyago gi di gu thava PFHUMU Nungungulu, olu vbohide uye a nga bani nari ni mangava naye guta dzega sanana sangu sa sivili gasi guya si gira dzikhumbi.”

²Elizewu a di mu wudzisa, khuye: “Olu wa gu vbweta gukhuwe nyi gu phasa khu ginani? Nyi embele ginani u gu nagyo gaya gwago.” Uye a di mu embela, khuye: “Githumi gyago gi mwalo gilo nyumbani gwaye, gifugwana nya mafura basi.”

³Khavbo avbo, Elizewu a di mu embela, khuye: “Indra ga vaakelane vago vatshavbo uya lomba sifugo nya singi nya maphanga.

⁴Khavbo avbo, u na bela nyumbani uwe gumogo ni sanana sago, u sega lidimba, u guhula mafura musifugoni mule gwatshavbo, iso si talago vega phuvbo.”

⁵Khavbo avbo, a di khuga aya dzi segela nyumbani uye gumogo ni sanana saye; avo va mu resela sifugo, uye a si tadza khu mafura.

⁶Avbo gi talago gifugo, a di embela mwanaye, khuye: Nyi resele gambe gimbe gifugo. Aholu uye a di mu hakha, khuye: “Gimwalo gambe gimbe.” Khu guralo, mafura ma di hegisa.

⁷Khavbo avbo, nyamayi a diya embela muthu wa Nungungulu; uye a di mu embela, khuye: “Indra ma rengisa, u livba khayo mangava yago; gasi mambe ayo ma na gu tshalago, u na vbanya khayo uwe gumogo ni sanana sago.”

⁸Tshigu mwedo, Elizewu a di vbindra khu Sunemi, iyo gu nga bani na gu khala nyamayi moyo nya gitetema, a nga bani a mu guruvedza guya hodza guhodza gwaye; gikhati gyatshavbo a nga bani na gu vbindra khu vbale, a diya hodza guhodza gwaye.

⁹Nyamayi a di embela mwama waye, khuye: “Eni nyi ngu wona nya gukheni, muthu yoyu a vbindrago gikhati gyatshavbo khavba, muthu nya gukatege wa Nungungulu.

¹⁰Hongole hi mu girele ginyumbana nya gitezi vbandzaritunu, hi vega umomo lidawu, meza, gikhalo ni kandriya; avbo a hi endrelago, a nata lala momo.”

¹¹Tshigu mwedo, a nga endrela vbale, Elizewu a diya lala nyumbani mule.

¹²A di embela githumi gyaye Geyazi, khuye: “Nga nyi ranela Musunami yoyo.” Avbo a nga mu ranago, nyamayi a dita ema mbeli ga muprofeti.

¹³Kholu uye a di embede githumi gyaye Geyazi, khuye: “Ginani hi yelago gu gu girela gasi gu gu bonga khu giphaso u hi girelago khu gu hi hakha gwadi. Gyomo u gi vbwetago gukhuwe hi ya gu ganelela ga mufumeli gani mwendro ga muthangeli nya nyimbi, gani?” Nyamayi a di hakha, khuye: “Eni nya gu vbanya vbakari ga va na gyathu.”

¹⁴Khavbo avbo, Elizewu a di ganela, khuye: “Olu hi na gira ginani khuye; Nyamayi yoyu a mwalo gyanana narigu mwama waye gumbide.”

¹⁵Elizewu a di ganela, khuye: “Nga mu rana. Avbo a nga mu ranago, nyamayi a dita ema vbanyangwatunu.”

¹⁶ Elizewu a di mu embela, khuye: “Khu mwaga wutago khu gikhati nya nga egi, u na bani u wugarela gyanana.” Nyamayi a di hakha, khuye: “U nga ganeli kharato mune wangu, muthu wa Nungungulu, u nga lipheli githumi gyago.”

¹⁷Nyamayi a di khura mimba, a velega gyanana nya gikhwathana, khu gikhati gi nga ganedwago, kha nga guganela ga Elizewu.

¹⁸Avbo gyanana gi nga dandrago, litshigu limwedo, gyanana gi di landra babe waye thembweni kholu a diri ni vavbweri.

¹⁹Gi di embela babe waye, khigyo: “Hungo wangu wa gu vbisa! Hungo wangu wa gu vbisa!” A di embela githumi gyaye, khuye: “Mu khuse u mu yisa ga mayi waye.”

²⁰Githumi gi di mu yisa ga mayi waye, a mu vega vbamarumbitunu ga mayi waye kala vbakari nya mihani, khu hwane a difa.

²¹A di gwela naye aya mu ladzisa vbadawutunu la muthu wa Nungungulu; a mu segela lidimba a duga vbavbandze.

²²A rana mwama waye ata mu embela, khuye: “Nyi rumele moyo nya sithumi, ni giburwana gasi nyi kodza gututuma nyi ya ga muthu wa Nungungulu nyi na wuya.”

²³Uye a di mu wudzisa, khuye: “Wa gu yela ginani iyo gwaye muhuno? Khandri litshigu nya Buzo nya gumege nya Ngima, gambe khandri Sabhadho.” Nyamayi a di hakha, khuye: “U nga garadzegi.”

²⁴A di ghabhata buru, a embela githumi gyaye, khuye: Yi ghule u gimbidzisa, u nga emi ndzilani; kala nyi gu embela.

²⁵Nyamayi a di khuga a hongola ga muthu wa Nungungulu, gigomoni gya Karimelo; avbo muthu wa Nungungulu a nga mu wona na ngari hwindzo, a di embela githumi gyaye Geyazi, khuye: “Khu mu woni wule nyamayi nya Musunami.

²⁶Olu, khuga u mu khinga u mu wudzisa khuwe wa guta gwadi, gani? Mwama wago khwadi, gani? Mwanago nuye khwadi, gani?” Nyamayi a di hakha, khuye: “Hi ngari vadi.”

²⁷Avbo a nga vbohago gigomoni ga muthu wa Nungungulu a dita mu phara mawundru yaye. Geyazi a di hidzimela vbafuvbi gasi guta mu digisa, aholu muthu wa Nungungulu a di mu embela, khuye: “Mu dige, kholu hefemulo waye wu ngu garadzega, aholu PFHUMU Nungungulu a nyi sihede silo sesi, kha nyi tivisa gilo.”

²⁸Khu guralo, nyamayi a di ganela, khuye: “Ina eni nyi di lombide gyanana ga mune wangu, gani? Ina kha nya nga ganedza gukheni u nga nyi pfhadzi, gani?”

²⁹Muprofeti a di embela Geyazi, khuye: “Dzi hunge giwununi gwago, u dzega ndronga yangu u phara ndzila u hongola, wa gu mana muthu ndzilani u nga mu losi, wa gu loswa khu muthu u nga mu hakhi, indra uya vega ndronga yangu khovbeni ga gyanana.”

³⁰Aholu, mayi wa gyanana a di ganela, khuye: “Nyi ngu sambanya khu PFHUMU Nungungulu a vbanyago ni hefemulo wangu, kheni: Gima kha nyi na gu diga.” Khavbo avbo, uye a di khuga a mu landra.

³¹Geyazi a di va thangela aya handzega ndronga khovbeni ga gyanana; aholu gu diri mwalo lito mwendro gikombiso nya guvbanye; a di bwelela ata wonana ni Elizewu ata mu ninga gitiviso, khuye: “Gyanana kha gya khendzuga.”

³²Avbo Elizewu a nga belago nyumbani mule, a di mana gyanana na gi gu fude, na gi ladzisidwe vbadawutunu.

³³Khavbo avbo, Elizewu a di bela nyumbani a dzi segela lidimba uye gumogo ni gyanana, a lombelela ga PFHUMU Nungungulu.

³⁴A di lala vbatshani ga gyanana, a tshanganisa likana laye ni la gyanana, ni maho yaye a ma tshanganisa ni ya gyanana, ni mandza yaye ni ya gyanana, a wugarelana nagyo; mili wa gyanana wu di furumela.

³⁵ Khu hwane a di khuga a ema, a dzundrulugela nyumbani eno ni eno, a engedza gu lita ata dzi ladza vbatshani nya gyanana; khavbo avbo, gyanana gi di watshimula livbandre na dzimbili dzinyondro, gi tula maho gi wona.

³⁶Khavbo avbo, a di rana Geyazi, ata mu embela, khuye: “Nga rana nyamayi yoyo nya Musunami.” Uye a di mu rana ata gwaye, ata mu embela, khuye: “Dzega gyanana gyago.”

³⁷Nyamayi a di bela ata khidzima migondroni gwaye a noga kala vbavbatshi; a dzega gyanana gyaye a duga vbavbandze.

³⁸Khu hwane nya esi, Elizewu a di bwelela Giligali. Tigoni mule gu diri ni ndzala, avbo vapizane va vaprofeti va nga bani va khade mbeli gwaye, a di embela githumi gyaye, khuye: “Tshelega khali nya yikhongolo niloni, u phulela guhodza nya mitongwe vapizane va vaprofeti.”

³⁹Khavbo avbo, moyo wawe a di hongola mahangeni guya hava tongwe, a diya mana nganga a hava dzikhanga dzaye a dzi fumbela mwendrani gwaye, ata dzi pilela a thela khalini nya guhodze; aholu uye a di si dziti.

⁴⁰Khu hwane, a di thela vathu va hodza, avbo va nga phela guhodza, vathu va di womba dzihuwa, khavo: “Muthu wa Nungungulu, khalini momu, lomo lufu! Khavbo avbo, avo kha va nga hodza gilo.”

⁴¹Aholu uye a di va embela, khuye: “Nyi reseleni wuguvbi! A di wu thela khalini, khuye: Thelani vathu va hodze! Gu diri mwalo gambe mhango khalini.”

⁴²Mwama moyo nya gute khu Bhahali-Salisa, a di resa ga muthu wa Nungungulu sibaba nya mihandro nya guhegule, magumavili sibaba nya mala, sivbila nya makonva ni mahagane yaye, a embela Elizewu, khuye: Ninga vathu va hodze.

⁴³Aholu githumi gyaye gi di ganela, khigyo: “Nyi na dzi kodza kharini gu hodzisa lizana vathu? Uye a di mu hakha, khuye: Ningela vathu va hodze; kholu PFHUMU Nungungulu a ngu ganela kharati, khuye: Va na hodza si bwelo khavbo si tshala.”

⁴⁴Khavbo avbo, a di si vega mbeli gwawe; va di hodza va khura, gu bwelo khavbo gu tshala matshatsha, kha nga guganela ga PFHUMU Nungungulu.