Read gitonga 1 Dzikoronika 10 Bible Online

1 Dzikoronika 10 - gitonga bible

1 Dzikoronika 10

¹Vafilisitiya va di dhumela va na Israyeli; va na Israyeli va di padwa va tutuma mbeli ga Vafilisitiya, nya vangi vawe va di songwa gigomoni gya Gilibhowa.

²Vafilisitiya va di lundra Sawule gumogo ni sanana saye, va songa Jonatane, Abhinadhabhi, ni Malikisuwa, sanana sa Sawule.

³Nyimbi yi di vbisa ngudzu ga Sawule kala a wonwa khu Vafilisitiya va nga bani vari ni siholoma, uye a di tala khu hwanga a ndrendremela khu gu thava.

⁴Khu guralo, Sawule a di embela muphari nya matshari yaye, khuye: Homola litshari lago u nyi paya, kholu nyi ngata sagedwa khu va nya misutu vava. Aholu muphari nya matshari a di bomba, kholu a diri ni hwanga ngudzu; khavbo avbo, Sawule a di dusa litshari laye a dzi paya khilo vbakhanatunu.

⁵Muphari nya matshari, na wone nya gukhuye Sawule fude, uye nuye a di dzi paya khu litshari laye, afa gumogo naye.

⁶Khu guralo, Sawule a difa gumogo ni sanana saye sa siraru, ndranga yatshavbo yi mbemba gumogo naye.

⁷Vama vatshavbo va na Israyeli va nga bani va vbahide kovani, na va wonide gukhavo masotshwa ma tutumide, ni gu Sawule ni sanana saye va songidwe, avo va di diga madhoropa yawe va tutuma navo; khavbo avbo, Vafilisitiya va dita khala avo dzinyumbani gwawe.

⁸Khu litshigu li landrelago, avbo Vafilisitiya va ngata guta phanga dzitshalu nya sirumbi, va dita tugula Sawule gumogo ni sanana saye na va fude gigomoni gya Gibhowa.

⁹Va dita va phanga, va pila hungo waye ni matshari yawe va rumela myango tigoni ga Vafilisitiya, guya bikela mahungu yaya nya maphya ga vanungungulu vawe, ni ga vathu vawe vatshavbo.

¹⁰Matshari ya Sawule va diya ma vega nyumbani ga vanungungulu vawe, hungo waye va wu tshomega nyumbani ga nungungulu a ranwago gupwani Dhagoni.

¹¹Avbo litigo latshavbo la Jabhesi wa Gileyadhi li pwidego satshavbo si nga girwago khu Vafilisitiya ga Sawule,

¹²khavbo avbo, vama vatshavbo nya dzindrena, va di khuga, vaya dzega girumbi gya Sawule ni sirumbi sa sanana saye, va wuya naso tigoni ga Jabhesi; vata dzinga marambo yawe vbavbatshi nya nguhu, tigoni ga Jabhesi, va hala livbandre na mavili matshigu.

¹³ A di fisa kharato Sawule khu kotani nya gighoho a giridego ga PFHUMU Nungungulu, khu kotani nyamba landrisa magana ya PFHUMU Nungungulu, ni guya wudzisa ni gu lomba gu phaswa khu muloli nya dzisolo,

¹⁴a diga gu lomba ga PFHUMU Nungungulu. Khu kharato, Uye a di mu songa, a dusa mufumo a ningela ga Dhavhidhe, mwamana wa Jese.