Read gitonga 1 Dzikoronika 13 Bible Online

1 Dzikoronika 13 - gitonga bible

1 Dzikoronika 13

¹Dhavhidhe a di gira gikungo a bhula ni vathangeli nya sikwata nya likhumi mazana (1.000) ni esi nya lizana (100), gumogo ni manganagana yatshavbo,

²a embela tshangano watshavbo wa na Israyeli, khuye: “Mwa gu si wona siri sadi, ni gu tuledwa khu PFHUMU Nungungulu wathu, hi di hadza gu rumela myango khu givbiredza hi rana va na gyathu vatshavbo va mayigoni yatshavbo ya Israyeli, ga vaphasi nya mhamba, ga va na Levhi, va guromo madhoropani ni wubambe gwawe, gasi hi ta tshangana navo,

³hi bwelo khavbo hi wuyisa Ngasa nya Gidzumeledzwano ya Nungungulu wathu, kholu matshiguni ya Sawule kha ha yi sayisa gilo.”

⁴Khu guralo, tshangano watshavbo wu di dzumela gukhavo si na girege; kholu esi si di wonega na si lulamide mahoni ga vathu vatshavbo.

⁵ Khu guralo, Dhavhidhe a di tshanganisa vathu vatshavbo va na Israyeli, gukhugela tsongoni wa Siyori, wu girago vbingano ni Egipito, kala dzinyangwani ga Hamati, gasi gu wuyisa Ngasa ya Nungungulu, khu Kiriyati-Jeyarimi.

⁶ Khavbo avbo, Dhavhidhe ni vatshavbo va na Israyeli, va di gwela Bhahala gu ranwago gupwani Kiriyati-Jeyarimi, gu manegago tigoni gwa Judha, vaya dzega Ngasa ya Nungungulu; PFHUMU Nungungulu a khalago vbatshani nya dzikerubhimi, a khozedwa khu lina la laye.

⁷Ngasa ya Nungungulu yi di vegwa umo nya kareta nya yiphya, va yi dusa khu nyumbani ga Abhinadhabhi; kareta yi di gimbidziswa khu Uza ni Ayo.

⁸Dhavhidhe ni vatshavbo va na Israyeli, va di hana mbeli ga Nungungulu, khu monyo wawe watshavbo; va embelela, va womba sitendre, ni dzimbila, singomana, sitshatsharu ni mipundru.

⁹Avbo va nga vboha vbagithalatunu gya Kidhomi, Uza a di thawuludza mandza a hakha ngasa yi nga bani yi gu vbweta gu thega kholu dzimombe dzi di tshunganela yi wegela kareta.

¹⁰Khavbo avbo, PFHUMU Nungungulu, a di wugela Uza, kholu a nga phara ngasa khu mandza, a di mu songa. Uye a difa vbale mbeli ga Nungungulu.

¹¹Dhavhidhe a di khunguvanyega kholu PFHUMU Nungungulu a nga veta Uza afa, khu guralo, wulanga wowo wa gu ranwa Perezi-Uza[17] kala na muhuno.[18]

¹²Khu litshigu lolo, a di taledwa khu hwanga a thava Nungungulu, khuye: “Nyi na kodza kharini gu hakha Ngasa ya Nungungulu nyumbani gwangu.”

¹³Khavbo avbo, Dhavhidhe kha nga kodza gu hakha Ngasa ya Nungungulu Dhoropani gwaye, aholu a di yi yisa nyumbani ga Obhedhi-Edhomi nya Mugiti.

¹⁴ Khu guralo, Ngasa ya Nungungulu yi diya khala pangoni ga Obhedhi-Edhomi, gipandre nya migima miraru; PFHUMU Nungungulu a di kategisa lipango la Obhedhi-Edhomi ni satshavbo a nga bani nari naso.