Read gitonga 1 Dzikoronika 15 Bible Online

1 Dzikoronika 15 - gitonga bible

1 Dzikoronika 15

¹Dhavhidhe a di dzi girela dzinyumba Dhoropani ga Dhavhidhe; a dongisela tshatsha nya guvege umo Ngasa nya Gidzumeledzwano gya Nungungulu.

² Khavbo avbo, Dhavhidhe a di khuye: “Mwalo a yelago gu dzega Ngasa nya Gidzumeledzwano ya Nungungulu, vbavbandze ga va na Levhi, kholu khavo va hathidwego khu PFHUMU Nungungulu gasi gu yi rwala ni gu mu khozela gikhati gyatshavbo.”

³Dhavhidhe a di tombanisa vatshavbo va na Israyeli dhoropani ga Jerusalema, gasi va gwedzisa Ngasa ya PFHUMU Nungungulu wulangani gwaye a wu dongisedego.

⁴Dhavhidhe a di tombanisa gambe va na Aroni ni va na Levhi.

⁵Va na Khowati va diri ava: Muthangeli wawe a diri Uriyeli, gumogo ni vandriyaye, nya lizana ni magumavili (120);

⁶Va na Merari, va diri ava: Muthangeli wawe a diri Asaya, gumogo ni vandriyaye nya mazana mavili ni magumavili (220);

⁷Va na Gerisoni, va diri ava: Muthangeli wawe a diri Joyele, gumogo ni vandriyaye nya lizana ni magumararu (130);

⁸Va na Elisafane, va diri ava: Muthangeli wawe a diri Semaya, gumogo ni vandriyaye nya mazana mavili (200);

⁹Va na Hebroni, va diri ava: Muthangeli wawe a diri Eliyeli, gumogo ni vandriyaye nya livbandre na mararu magumi (80);

¹⁰Va na Uziyeli, va diri ava: Muthangeli wawe a diri Aminadhabhi, gumogo ni vandriyaye nya lizana ni likhumi na vavili (112).

¹¹Dhavhidhe a di rana vaphasi nya mhamba, a gu ava: Sadhoki ni Abhiyatari ni va na Levhi; Uriyeli, Asaya, Joyeli, Semaya, Eliyeli ni Aminadhabhi,

¹²a va embela, khuye: “Enu khenu mihungo nya dzinyumba dza na Levhi; dzi agiseni, enu gumogo ni vandriyanu, mu dzegani Ngasa ya PFHUMU Nungungulu wa Israyeli mu yi yisa wulangani nyi wu dongisedego.

¹³Khu guralo, olu guhegulani mu ngamba manegani, PFHUMU Nungungulu wathu a hi vetide, kholu kha ha landrisa sileletelo a hi leletedego.”

¹⁴Khu guralo, vaphasi nya mhamba, gumogo ni va na Levhi va di dzi agisa, gasi gu rwala Ngasa ya PFHUMU Nungungulu wa Israyeli.

¹⁵ Va na Levhi va di vbagara magatani Ngasa ya Nungungulu khu mipingo yi nga bani yiri vbatshani gwaye, kha nga idzo va nga leletedwago khidzo khu Mosi, gukhedza khu idzo a rumidego khidzo Nungungulu.

¹⁶Dhavhidhe a di embela vathangeli va na Levhi, gu va wumba tsawa vbakari ga va na gyawe nya vaembeleli, gasi va womba siwombawomba nya gufanane ni dzimbila, sitendre ni siphaphato nya dzisimbi, va gira ligwaha ni gutsaka.

¹⁷Khu guralo, va na Levhi va di emisa Hemani, mwamana wa Joyele, ni vbakari ga vandriyaye, Asafi, mwamana wa Bherekiya, ni ga va na Merari, gu hathwa va na gyawe, Etani, mwamana wa Khusaya,

¹⁸gumogo ni vandriyaye nya tsawa nya wuvili, a gu ava: Zakariya, Bheni, Jahaziyeli, Semiramoti, Jeyeli, Uni, Eliyabhi, Bhenaya, Mahaseya, Matatiya, Elifelewu ni Mikineya, ni Obhedhi-Edhomi, ni Jeyeli, vawoneleli nya dzinyangwa.

¹⁹Hemani, Asafi ni Etani, va di embelela na va gu womba siphaphato nya sugu.

²⁰Zakariya, Aziyeli, Semiramoti, Jeyeli, Uni, Eliyabhi, Mahaseya ni Bhenaya, va di embelela khu dzimbila ni malito nya gugendze.

²¹Matatiya, Elifelewu, Mikineya, Obhedhi-Edhomi, Jeyeli ni Azaziya, va di embelela khu sitendre gasi gu engedzela malito.

²²Khenaniya, muthangeli nya vaembeleli va na Levhi, a diri muthangeli nya vaembeleli, kholu a di gu wuti thumo yoyo.

²³Gasi Bherekiya ni Elikana, va di rwegidwe thumo nya guwonelele vbanyangwatunu yi vegidwego Ngasa.

²⁴Vaphasi nya mhamba Sebhaniya, Josafati, Nataniyeli, Amasayi, Zakariya, Bhenaya ni Eliyezeri avo va di gu womba mipundru mbeli nya Ngasa ya Nungungulu. Obhedhi-Edhomi, ni Jeya, a diri vawoneleli nya Ngasa.

²⁵Dhavhidhe ni madhota ya na Israyeli, ni vathangeli nya sikwata nya likhumi mazana (1.000), va di hongola nyumbani ga Obhedhi-Edhomi, va ya dzega Ngasa nya Gidzumeledzwano gya PFHUMU Nungungulu, na va gu kulungela khu tshivba.

²⁶Avbo Nungungulu a nga phasedzela va na Levhi va nga bani va rwade Ngasa nya Gidzumeledzwano gya PFHUMU Nungungulu, avo va di paya livbandre na dzimbili dzimombe nya vamatune ni livbandre na dzimbili dzihamba.

²⁷Dhavhidhe gumogo ni vatshavbo va na Levhi va nga bani va rwade Ngasa, vaembeleli ni Khenaniya, muthangeli nya avo va nga bani va rwade Ngasa ni vaembeleli, va di ambade dzingandzu nya wumburi nya seda, Dhavhidhe a di ambade gambe keka nya wuphasi nya mhamba nya seda.

²⁸Vatshavbo va na Israyeli, avo va nga bani va gu vbwelegedza Ngasa nya Gidzumeledzwano gya PFHUMU Nungungulu, va di kulungela khu gutsaka na va gu womba siphaphato ni mipundru, singomana, sitendre ni dzimbila.

²⁹Avbo va nga belago ni Ngasa nya Gidzumeledzwano Dhoropani ga Dhavhidhe, Mikali, nyamahegyane wa Sawule, a di khedzisela khu vbagihogotunu a wona mufumeli Dhavhidhe na gu hana ni gu tsaka, uye a di mu sola khu monyoni gwaye.