Read gitonga 1 Dzikoronika 16 Bible Online

1 Dzikoronika 16 - gitonga bible

1 Dzikoronika 16

¹Gikhati va vbohidego ni Ngasa ya Nungungulu, va diya yi vega vbakari nya tshatsha wu nga bani wu dongisedwe khu Dhavhidhe, va di gira miphaso nya guvbiswe ga Nungungulu, ni miphaso nya gubonge.

²Avbo Dhavhidhe a nga vbedzago gu gira miphaselo nya guvbiswe, niyo nya gubonge, a di kategisa vathu linani la PFHUMU Nungungulu.

³Khavbo avbo, a di kabanisela vatshavbo va na Israyeli, vama ni vanyamayi, moyo ni moyo a mana gipandre nya gibaba ni gitsuwu nya nyama ni sibaba nya dziuvha nya gubange.

⁴Dhavhidhe a di emisa vambe vbakari ga va na Levhi, gasi va gire thumo nya gugire miphaso mbeli nya Ngasa nya Gidzumeledzwano gya PFHUMU Nungungulu, gasi gu rungudza ni gu khusedza PFHUMU Nungungulu wa Israyeli, a gu ava:

⁵Asafi, a diri muthangeli, nya wuvili khu Zakariya, a landrela Joyele, Semiramoti, Joyeli, Matatiya, Eliyabhi, Bhenaya, Obhedhi-Edhomi ni Joyeli, va diri ni sitendre ni dzimbila; gasi Asafi a di womba siphaphato nya dzisimbi.

⁶Vaphasi nya mhamba, Bhenaya ni Jahaziyeli, ava va diri ni thumo nya gu wombe mipundru matshigu yatshavbo, mbeli nya Ngasa nya Gidzumeledzwano gya Nungungulu.

⁷Khu litshigu lile kamwe, Dhavhidhe a di rwega thumo Asafi, gumogo ni vandriyaye, nya guembelele ndzimo yeyi nya gurungudze PFHUMU Nungungulu, khuye:

⁸“Bongani PFHUMU Nungungulu, mu khozela lina laye, huwelelani vbakari nya mayigo sigiro saye nya gusamadzise.

⁹Mu embeleleni khu dzindzimo ni sizimba, mu huwelela sigiro saye nya gusamadzise.

¹⁰Dhumisani lina laye nya gukatege, yi na nengele myonyo ya vale va vbwetago PFHUMU Nungungulu!

¹¹Vbwetani PFHUMU Nungungulu ni tshivba yaye; gikhati gyatshavbo vbwetani khovbe yaye.

¹²Dundrugani mithumo yaye nya gusamadzise a yi giridego, siliwugiso ni gululama ga kanani gwaye;

¹³Enu livelego la Israyeli, githumi gyaye, sanana sa Jakobe, gihathwa gyaye.

¹⁴Uye khuye PFHUMU Nungungulu wathu, gulamula gwaye gomo mafuni gwatshavbo.

¹⁵ Dundruga gikhati gyatshavbo gidzumeledzwano gyaye, ni magana a ganedego ga likhumi mazana situgulwana;

¹⁶ ni gidzumeledzwano a giridego ni Abrahama ni gisambanyo a giridego ni Isaki;

¹⁷ Igyo a tiyisidego ga Jakobe, kha nga nayo, ni ga Israyeli, kha nga gidzumeledzwano nya gupindruge,

¹⁸khuye: Nyi na gu ninga litigo la Khanani, li khala gipandre nya thomba yago.

¹⁹Avo va diri tengo nya wudugwane, gambe na vari valuveli umomo.

²⁰Va di legalega khu litigo ni litigo, va khuga khu ga oyu mufumo, vaya ga wumbe mufumo.

²¹ Kha dzumela gukhuye va tshaniswa khu muthu, aholu khu lihaladzo gwawe, a tsayiside vafumeli;

²²khuye: Mu nga khumbi sihathwa sangu, mu nga tshanisi vaprofeti vangu.

²³Mafuni gwatshavbo embelelani ga PFHUMU Nungungulu, huwelelani guvbanyisa gwaye, khu litshigu ni litshigu.

²⁴ Tivisani wudhumo waye mayigoni gwatshavbo, ni sisamadziso saye ga vatshavbo,

²⁵kholu PFHUMU Nungungulu khongolo, fanede gu rungudzwa, a ngu thavisega guvbindra vanungungulu vatshavbo.

²⁶Kholu vanungungulu vatshavbo va vanya mayigo sifananiso basi, aholu PFHUMU Nungungulu, giride ndzadzini.

²⁷Wudhumo ni wugulu, somo mbeli gwaye, tshivba ni gunengela, si tade wulanga waye nya miphaso.

²⁸Ningelani ga PFHUMU Nungungulu, enu vathu nya mayigo, ningelani ga PFHUMU Nungungulu wudhumo ni tshivba.

²⁹Ningelani ga Pfhumu wudhumo wu fanelago lina laye; resani miningelo yanu mu bele nayo makupakupani gwaye; khozelani PFHUMU Nungungulu, wulangani gwaye nya wumburi wu agidego.

³⁰Enu mayigo ndrendremelani mbeli gwaye, kholu uye tiyiside litigo, gasi li si tsekatseki.

³¹Gu na nengele ndzadzini, mafuni gu na kulungele; va na ganele vbakari nya mayigo, khavo: PFHUMU Nungungulu a ngu fuma.

³²Li na dzume linene, ni satshavbo si guromo umo; mahange ma na tsake, ni satshavbo si bugago umomo.

³³Misimbo ya khabini yi na embelele khu gutsaka mbeli ga PFHUMU Nungungulu, kholu, a nguta guta lamula litigo.

³⁴Bongani PFHUMU Nungungulu, kholu uye khwadi, kholu wuhindzi waye wu ngu simama kala gupindruga.

³⁵Ganelani, khenu: Hi vbanyise Uwe PFHUMU Nungungulu nya guvbanyise gwathu, gasi hi kodze gu bonga lina lago nya Guage, hi bhuma khu wuzundzo wago.

³⁶A na bongwe PFHUMU Nungungulu wa Israyeli, khu gupindruga ni gupindruga!” Khavbo avbo, vathu vatshavbo va di khavo: Amen! Va dhumisa PFHUMU Nungungulu.

³⁷Khavbo avbo, Dhavhidhe a di tshiya vbale, mbeli nya Ngasa nya Gidzumeledzwano gya PFHUMU Nungungulu, Asafi, ni vandriyaye, gasi va simamisa ni mithumo nya gukhozele, mayelano ni sileletelo nya litshigu ni litshigu;

³⁸a di tshiya gambe Obhedhi-Edhomi, gumogo ni vandriyaye, khu tengo nya livbandre na limwedo magumi ni livbandre na vararu vathu; Obhedhi-Edhomi, mwamana wa Jedhutumi, ni Hosa, va di vegwa gu khala vawoneleli nya dzinyangwa.

³⁹A di tshiyedza muphasi nya mhamba Sadhoki, ni vambe vandriyaye nya vaphasi, va na gyawe, mbeli nya tshatsha wa PFHUMU Nungungulu, wulangani nya gigomo nya gulaphe tigoni gwa Gibheyoni.

⁴⁰Gasi gu fela gu ningela matshigu yatshavbo ga PFHUMU Nungungulu miphaselo nya guvbiswe vbagiluvelotunu, dzimindrudzile ni vbasilambotunu, satshavbo kha nga idzo gu lovidwego khidzo Nayo, kha nga idzo PFHUMU Nungungulu a nga leletelago khidzo Israyeli.

⁴¹Vbakari gwawe, a di romo gambe Hemani, Jedhutumi, ni vambe va hathidwego malina yawe ma pwadzidwego gasi gu dhumisa PFHUMU Nungungulu, kholu wuhindzi waye wu ngu simama kala gupindruga;

⁴²gumogo navo gu diromo Hemani ni Jedhutumi, va nga bani va womba mipundru ni siphaphato nya dzisimbi dzimindrudzile nya gudhumise Nungungulu; va na Jedhutumi va diri vawoneleli nya dzinyangwa.

⁴³ Khavbo avbo, vathu vatshavbo va di phalalega, muthu ni muthu a bwelela gaya gwaye. Dhavhidhe nuye, a di bwelela gaya, gasi gu ya kategisa ndranga yaye.