Read gitonga 1 Dzikoronika 18 Bible Online

1 Dzikoronika 18 - gitonga bible

1 Dzikoronika 18

¹Hwane nya esi, Dhavhidhe a di sasela Vafilisitiya a va khozisa, a dzega litigo la Gadhi ni madhoropa yaye mandzani ga Vafilisitiya.

²A di pala gambe va na Mowabhi, va khala sithumi sa Dhavhidhe, va mu livba khupo.

³Hadhadhezeri nuye mufumeli wa Zobha, a di sasedwa khu Dhavhidhe, vbafuvbi ni Hamati, avbo a nga bani a hongode aya tiyisa mufumo waye vbafuvbi ni tsongo wa Ewufrate.

⁴Dhavhidhe a di mu wandrela likhumi mazana (1.000) dzikareta, livbandre na mavili magumi mazana (7.000) vakhileli nya dzikavalu, magumavili magumi mazana (20.000) masotshwa nya gugimbile khu mawundru; a rumela gu pilela misivba nya dzikavalu dzi nga bani dzi ndrindra dzikareta, a tshiya basi tengo nya lizana nya idzo.

⁵Vaasiriya, va dita khu Dhamasiko guta phasedzela Hadhadhezeri, mufumeli wa Zobha, aholu Dhavhidhe a di songa magumavili na mavili magumi mazana (22.000) vama nya Vaasiriya.

⁶Dhavhidhe a di vega sikwata nya masotshwa tigoni ga Siriya wa Dhamasiko, gasi Vaasiriya va di khala sithumi sa Dhavhidhe, va mu livba khupo; dzindzilani gwatshavbo ga Dhavhidhe, PFHUMU Nungungulu a di mu ninga tshivba nya gu pale.

⁷Dhavhidhe a di wandra sitshangu nya ndralama si nga bani si thumiswa khu dzindrena dza Hadhadhezeri a si yisa Jerusalema.

⁸ Dhavhidhe a di wandra gambe sombo nya singi nya sugu sa tigoni ga Tibhati ni Kumi, madhoropa ya Hadhadhezeri. Khu sugu yoyo khuwo Solomoni a giridego khuwo Yiphwa nya sugu, madingo ni simbe sombo nya sugu.

⁹Avbo Tohu, mufumeli wa Hamati na pwide nya gupwani Dhavhidhe pade dzinyimbi dzatshavbo dza Hadhadhezeri, mufumeli wa Zobha,

¹⁰a di rumela mwanaye Hadhoramu, ga mufumeli Dhavhidhe, guya mu losedzela ni gu mu bonga, khu gu bani a wugede ni gu pala Hadhadhezeri, kholu Hadhadhezeri gikhati gyatshavbo a di khala khu mayunga nya gu dwanise Tohu. Hadhoramu a di resa gambe ni sombo nya ndralama, parata ni sugu.

¹¹Esi a di si pata gumogo ni parata ni ndralama eyi Dhavhidhe a nga yi phangago ga mayigo yatshavbo a nga ma palago, a gu aya: Edhomi, va na Mowabhi, va na Amoni, Vafilisitiya ni va na Amaleki, a si phasela ga PFHUMU Nungungulu.

¹² Abhisayi, mwamana wa Zeruya, uye nuye a di sasela likhumi na livbandre na mararu magumi mazana (18.000) vathu va na Edhomi kovani nya Munyu.

¹³A di vega vawoneleli tigoni ga Edhomi, vatshavbo va na Edhomi va khala sithumi sa Dhavhidhe, PFHUMU Nungungulu a di ninga tshivba Dhavhidhe nya gu pale malangani yatshavbo umo a nga bani a bela khumo.

¹⁴Khu guralo, Dhavhidhe a di fumela va na Israyeli vatshavbo, a lamula khu gululama mahungu ya vathu vaye vatshavbo.

¹⁵Muthangeli nya nyimbi, a diri Jowabhi, mwamana wa Zeruwa, gasi Josafati, mwamana wa Ayiludhe, a diri musayisi nya matimo.

¹⁶Vaphasi nya mhamba va diri Sadhoki mwamana wa Ayitubhi, ni Abhimeleki, mwamana wa Abhiyatari, Sawusa, a diri mulovi.

¹⁷Muthangeli wa na Keleti ni va na Peleti, a diri Bhenaya, mwamana wa Joyadha. Aholu, sanana sa Dhavhidhe va diri vakhongolo gulandrela mufumeli.[21]