Read gitonga 1 Dzikoronika 24 Bible Online

1 Dzikoronika 24 - gitonga bible

1 Dzikoronika 24

¹Mitsawa ya na Aroni yi kabanisidwe, kharati: Sanana sa Aroni khesi: Nadhabhi, Abhiyu, Eliyazari ni Itamari.

²Nadhabhi ni Abhiyu va phede khavo gufa, babe wawe na nga gu vbanya, kha va nga tshiya sanana; Eliyazari ni Itamari va diri vaphasi nya mhamba.

³Dhavhidhe ni Sadhoki, situgulwana sa Eliyazari, ni Ayimeleki, gitugulwana gya Itamari, va di kavedzedwa mithumo mayelano ni fanelo nya mithumo yawe.

⁴Gikhati va nga kabanisedwa mitsawa, gu wonegide na vari vangi ngudzu va na Eliyazari, vathangeli nya dzinyumba dza vababe vawe va diri likhumi na livbandre na moyo, gasi va na Itamari mayelano ni dzinyumba dza vababe vawe, va diri livbandre na vararu.

⁵Va di kabanisedwa khu mitsawa khu gu lodwa khu nyatumbatumbane; kholu gu diromo vathangeli va vbawulangani nya Guage ngudzu ni vathangeli va Nyumbani ya Nungungulu, ga va na Eliyazari ni ga na Itamari.

⁶Mulovi Simaya, mwamana wa Nataniyeli, wa na Levhi, a di va lovela mbeli ga mufumeli, ga vathangeli, ga muphasi nya mhamba Sadhoki, ga Ayimeleki, mwamana wa Abhiyatari, ni ga vathangeli nya mapango ya vaphasi nya mhamba ni ga va na Levhi; nyumba ni nyumba yi di hathwa khu gu lodwa khu solo, mweyo yi khala ya Eliyazari, yimbe yi khala ya Itamari.

⁷Solo nya guhegule yi diya thegela Jeyoyaribhe; nya wuvili yi ya thegela Jedhaya;

⁸nya wuraru yi thegela Harimi; nya wu na yi thegela Seyorime;

⁹solo nya livbandre yi thega ga Malikiya; nya livbandre na mweyo yi thega ga Miyamimi;

¹⁰nya livbandre na dzimbili yi thegela Hakuzi; nya livbandre na wuraru yi thegela Abhiya;

¹¹nya livbandre na wu na yi thegela Jesuwa; nya likhumi yi thegela Sekaniya;

¹²nya likhumi na mweyo yi thegela Eliyasibhe; nya likhumi na dzimbili yi thegela Jakimi;

¹³nya likhumi na wuraru yi thegela Hupa; nya likhumi na wu na yi thegela Jesebheyabhi;

¹⁴nya likhumi na livbandre yi thegela Bhiliga; nya likhumi na livbandre na mweyo, yi thegela Imeri;

¹⁵nya likhumi na livbandre na wuvili, yi thegela Heziri; nya likhumi na livbandre na wuraru, yi thegela Hapise;

¹⁶nya likhumi na livbandre na wu na, yi thegela Petaya; nya magumavili yi thegela Jeyezikeli;

¹⁷nya magumavili na mweyo, yi thegela Jakimi; nya magumavili na wuvili, yi thegela Gamuli;

¹⁸nya magumavili na wuraru yi thegela Dhelaya; nya magumavili na wu na, yi thegela Mahaziya.

¹⁹Va di sasamedzedwa kharati mithumoni gwawe, gasi va bela Nyumbani ga PFHUMU Nungungulu, mayelano khu sileletelo si tiyisidwego khu babe wawe Aroni, kha nga idzo PFHUMU Nungungulu wa na Israyeli a mu rumidego khidzo.

²⁰Vambe vathangeli va na Levhi va nga tshalago khava: Ga va na Aniramo, Subayeli; ga va na Subayeli, Jedhiya;

²¹va na Reyabhiya, muthangeli a diri Isiya;

²²ga va Isarita, khu Selomiti; ga na Selomiti, khu Jahati;

²³Ga va na Hebroni, nya guhegule khu Jeriya; [25] Nya wuvili khu Amariya; nya wuraru khu Jahaziyeli; nya wu na khu Jekameyama;

²⁴wa va na Uziyeli, khu Mika; wa na Mika, a diri Samiri;

²⁵ndruye wa Mika, khu Isiya; wa va na Isiya, khu Zakariya;

²⁶wa na Merari, khu Mali ni Musi; wa va na Jahaziya, khu Bhenu;

²⁷wa va na Merari, khu gipandre gya jahaziya khava: Bhenu, Sowamu, Sakuri ni Ibhiri;

²⁸wa va na Mali, khu Eliyazari, a ngamba velega sanana;

²⁹wa va na Khisi, khu Jerameyeli;

³⁰wa va na Musi, khu Mali Edheri ni Jerimoti. Ava khavo va na Levhi, mayelano khu longoloko nya dzinyumba dzawe.

³¹Ava navo vathangeli nya dzinyumba, ni vandriyawe nya valandra, va di gu gira kha nga idzo va giridego vandriyawe va na Aroni, va di lola solo mbeli ga mufumeli Dhavhidhe, ga Sadhoki, ga Ayimeleki ni ga yatshavbo mihungo nya dzinyumba dza vaphasi nya mhamba ni ga va na Levhi.