Read gitonga 2 Dzikoronika 1 Bible Online

2 Dzikoronika 1 - gitonga bible

2 Dzikoronika 1

¹Solomoni mwamana wa Dhavhidhe, a di tiyisa wufumu waye, PFHUMU Nungungulu waye, a diri ni uye a mu khusedza ngudzu.

²Solomoni a di ganela ga va na Israyeli vatshavbo, ga vathangeli nya sikwata nya likhumi mazana (1.000) niso nya lizana (100), ga valamuli, ni ga manganagana yatshavbo ya tigoni ga Israyeli, ni ga vathangeli nya dzinyumba dza vababe vawe;

³Solomoni a di gwela ni tshangano watshavbo wu nga bani wuri Gibheyoni, kholu iyoyo, khiyo gu nga bani guromo Tshatsha nya Tshangano wa Nungungulu, wu nga bani wu giridwe giwulani khu Mosi, githumi gya PFHUMU Nungungulu.

⁴Aholu Dhavhidhe, a di dzegide Ngasa ya Nungungulu khu Keriyati-Jeyarimi, a yi resa Tshatshani a nga bani a wu dongisede Jerusalema.

⁵ Giluvelo nya sugu gi nga bani gi giridwe khu Bhezaleli, mwamana wa Uri, mwamana wa Huri, gi di vegidwe nigyo mbeli nya Tshatsha wa PFHUMU Nungungulu. Solomoni gumogo ni tshangano, va di gu hongola vaya wudzisa avbo PFHUMU Nungungulu.

⁶Solomoni a di ningela dzimhamba nya miphaselo mbeli ga PFHUMU Nungungulu, vbagiluvelotunu nya sugu gi nga bani giri Tshatshani nya Tshangano; a ningela avbo likhumi mazana (1.000) miphaselo nya guvbiswe.

⁷Ni wutshiguni wowo wa wumowo, Nungungulu a di wonega ga Solomoni a mu embela, khuye: “Lomba igyo u gi vbwetago gukhuwe Eni nyi gu ninge?”

⁸Solomoni a di embela Nungungulu, khuye: “U yeyedzide wuwadi nya wukhongolo ga babe wangu, Dhavhidhe, bwelo khavbo U nyi vega nyi khala mufumeli wulangani gwaye.

⁹ Gasi olu PFHUMU Nungungulu, tiyisa magana yago, u nga ganelago ga babe wangu Dhavhidhe; kholu U nyi emiside gu khala mufumeli ga vathu nya gutale kha nga kudzudzwane nya mafu.

¹⁰Khu guralo, nyi ninge wugengeli ni mapimo, gasi nyi kodze gu gimbidzisa vathu vava; kholu, khu mani a na kodzago gu lamula vathu nya vangi nya nga ava?”

¹¹Khavbo avbo, Nungungulu a di embela Solomoni, khuye: “Kha nga u gu ni maalakanyo yoyo monyoni gwago; kha nga u ngamba lomba dzithomba ni gufuma, wudhumo, ni gu songetela valala vago, ambari guvbanya matshigu nya gulaphe; aholu u lombidego wugengeli ni mapimo, gasi u kodza gu fumela vathu vangu, avo nyi gu emisedego gu khala mufumeli wawe,

¹²nyi ngu gu ninga guti ni mapimo. Hwane nya isoso, nyi na gu ninga gambe gufuma, dzithomba ni wudhumo, avbo nya gu, mwalo mufumeli a manidego wufumu nya nga uwowo ga vatshavbo ga vatshavbo va gu hegudzidego gu fuma. Gambe, gima kha na manega mumbe, hwane gwago.”

¹³Khavbo avbo, Solomoni a di khuga mbeli nya Tshatsha nya Tshangano wu nga bani wuri gigomoni ga Gibheyoni, a wuya Jerusalema. A ta fumela litigo la Israyeli.

¹⁴ Solomoni a di tshanganisa dzikareta ni vakhileli nya dzikavalu; a diri ni likhumi na mana mazana (1400) dzikareta ni likhumi na mavili mazana (1200) vakhileli nya dzikavalu, a va vega madhoropani nya gege umo dzikareta, vambe a va vega Jerusalema, vbafuvbi gwaye.

¹⁵Mufumeli a di gira gukhuye, Jerusalema gu manege ndralama ni parata, kha nga siwindri, ni misedhari nya gutale kha nga mikanyi ya panini ga Sefela.

¹⁶ Dzikavalu a nga bani ari nadzo Solomoni a di gu dzi renga tigoni ga Egipito ni Silisiya; varengisi va mufumeli va diya tigoni ga Silisiya, vaya dzi renga khu tengo nya wutshukwana;

¹⁷Mweyo ni mweyo nya dzikareta, dzi di rengwa tigoni ga Egipito khu tengo nya livbandre na limwedo mazana (600) singerengere nya parata, kavalu ni kavalu, yi di rengwa khu tengo nya lizana ni livbandre magumi; khu guralo, Solomoni, a di rengisela nuye vafumeli nya Vahiti ni Vaasiriya.