Read gitonga 2 Dzikoronika 10 Bible Online

2 Dzikoronika 10 - gitonga bible

2 Dzikoronika 10

¹Robhowamo a di hongola Sikemi, kholu vatshavbo va na Israyeli va di tshanganide iyoyo gasi guya mu pharisa ndronga nya wufumu.

²Avbo Jerobhowamo, mwamana wa Nebhati ngapwago isoso, (kholu a di bani na ngari tigoni ga Egipito, a nga thavelago iyo, khu gu thava mufumeli Solomoni), a di wuya khu Egipito.

³Va di rumela guya mu rana; Jerobhowamo a dita gumogo ni va na Israyeli vatshavbo, vata mu embela Robhowamo, khavo:

⁴“Babe wago a di hi rwega mirwalo ni mikhinyavezo nya gulemele; gasi olu, uwe hi vbevbugisele rwalo yoyu nya gulemele, hi nga rwegwa khu babe wago, gasi ethu hi kodze gu gu thumela.”

⁵Aholu uye a di va phindrula, khuye: “Khavba, khu hwane nya matshigu mararu wuyani avba gwangu.” Vathu va di bwelela.

⁶Mufumeli Robhowamo, a di wudzisa madhota ya gale ma nga bani ma gu thuma ni babe waye, Solomoni, na nga gu vbanya, ava embela, khuye: “Nyi na va ninga phindrulo muni vathu vava?”

⁷Avo va di mu embela, khavo: “Wa gu khala muthu nya wadi ga vathu vava, u va nengedzisa, u ganela magana nya yadi avbo gwawe, avo va na khala sithumi sago kala gupindruga.”

⁸Aholu uye a di kanyisa wusingalagadzi a nga ningwago khu madhota, a gu lomba mawonelo ya madzaha a nga dandrago nawo ma nga bani ma mu thumela.

⁹A ma wudzisa, khuye: “Hi nata ninga phindrulo muni ga vathu vava vatago avbo gwangu, va nga nyi embela khavo, hi vbevbugisele mirwalo hi rwegidwego khu babe wago?”

¹⁰Gasi madzaha ma nga dandrago naye, ma di mu embela, khayo: U na ganela kharati ga vathu va nga gu embelago khavo babe wago a di hi rwega mirwalo nya gulemele, aholu uwe hi vbevbugisele. Gasi uwe u na va embela, kharati: Ginyalana gyangu nya gidugwana, gi gude ngudzu guvbindra giwunu gya babe wangu.

¹¹Babe wangu a gu bani a mi rwegide nyandra nya gulemele, eni nyi nga na gu mi engedzela nyandra nya gulemele nya guvbindre yile; babe wangu a di mi tsayisa khu gu mi kwamula, eni nyi na mi tsayisa khu dzihume.

¹²Khu hwane nya matshigu mararu, a dita Jerobhowamo ni vathu vatshavbo, kha nga idzo a nga ganelago khidzo mufumeli Robhowamo, khuye: “Mu nata eno gwangu khu hwane nya matshigu mararu.”

¹³Mufumeli Robhowamo a dita va ninga phindrulo nya gulemele kholu, a di si khathali khu tshangano nya madhota;

¹⁴a di va hakha kha nga idzo madzaha makwawe ma nga mu embelago, a di khuye: “Babe wangu a mi lemedzide khu dzinyandra nya gulemele, aholu eni nyi na wu engedzela; babe wangu a mi tsayiside khu gu mi kwamula khu dzimboma, aholu eni nyi na mi tsayisa khu dzihume.”

¹⁵Khu guralo, mufumeli kha nga yingisa iso si nga ganedwago khu vathu, kholu esi si di guta khu ga Nungungulu, gasi PFHUMU Nungungulu a tiyisa magana a nga ganelago khu ga muprofeti Ayiya wa Silo, ga Jerobhowamo, mwamana wa Nebhati.

¹⁶ Avbo vathu vatshavbo va na Israyeli va nga wona gukhavo, mufumeli kha va yingisi, va di ganedza, khavo: “Giphaso muni hi gi manago ethu ga Dhavhidhe? Yi mwalo thomba ethu hi yi manago ga mwamana wa Jese! Muthu ni muthu a na hongole gaya gwaye. Olu, uwe Dhavhidhe, dzi wonele ni ndranga yago. Khu guralo, va na Israyeli vatshavbo va di hongola magaya gwawe!”

¹⁷Aholu Robhowamo a di fumela va na Israyeli va nga bani va vbahide tigoni ga Judha.

¹⁸Khavbo avbo, mufumeli Robhowamo a di rumela Adhoramo, a nga bani a rwegidwe thumo nya gu khupise; aholu va na Israyeli va dita mu pfara khu siwindri afa. Khavbo avbo, mufumeli Robhowamo a di bela khu givbiredza karetani gwaye, a tutuma a thavela Jerusalema.

¹⁹Khu guralo, va na Israyeli va di wugela kharati nyumba ya Dhavhidhe, kala na muhuno.