Read gitonga 2 Dzikoronika 13 Bible Online

2 Dzikoronika 13 - gitonga bible

2 Dzikoronika 13

¹Khu mwaga nya likhumi na livbandre na miraru nya gufume ga Jerobhowamo, Abhiya a di phela gufumela Israyeli.

²Fumide myaga miraru Jerusalema; lina la mayi waye khu Mikeya, nyamahegyane wa Uriyeli, wa Gibheya. Gu manegide gambe nyimbi nya gudwane Abhiya ni Jerobhowamo.

³Abhiya a di soma nyimbi, nari ni mazana mana magumi mazana (400.000) masotshwa nya guhathwe vbakari nya dzindrena dzatshavbo, Jerobhowamo nuye a di somisa Livbandre na mararu mazana magumi mazana (800.000) vama nya guhathwe vbakari nya dzindrena dzatshavbo.

⁴Khavbo avbo, Abhiya a di gwela vbatshani nya gigomo; gi ranwago gupwani Zemarayimi, gi manegago ga gipandre nya sigomo sa Efrayimi, a ganela, khuye: Uwe Jerobhowamo, nenu mwatshavbo va na Israyeli, nyi yingiseni!

⁵Ina kha mu dziti gukhenu PFHUMU Nungungulu wa na Israyeli, a ningide Dhavhidhe mufumo wa na Israyeli, ni ga sanana saye khu gidzumeledzwano nya gupindruge, gani?

⁶Aholu, Jerobhowamo, mwamana wa Nebhati, githumi gya Solomoni, mwamana wa Dhavhidhe, a ngu khuga a wugela mune waye.

⁷Va nya guhandruga, sitandra valayi, va tombanide gwaye va somela matshari Robhowamo, mwamana wa Solomoni. Robhowamo a nga bani na ngari gyanana nari mwalo tshivba, a di tandrega gu dzi vhikela.

⁸Olu mu ngu pimisa gukhenu mu na dugelela ga mufumo wa PFHUMU Nungungulu, gani? Hi ngu dziti gukhethu enu mu gidzemo nya gingi, gambe mu na ni vanungungulu nya simombyana nya ndralama, esi Jerobhowamo a mi giredego.

⁹Kha mwa tutumisani vaphasi nya mhamba va PFHUMU Nungungulu, va na Aroni gumogo ni va na Levhi, gani? Kha mwa dzi girelani vambe vaphasi nya mhamba, kha nga vathu va mambe mayigo, gani? Ni wevbini muthu atago guta dzi agisa nari ni gimombyana, ni livbandre na dzimbili dzihamba, muthu yoyo a ngu kodza gu girwa muphasi nya mhamba ga esi si gu siri vanungungulu.

¹⁰Aholu, ethu, Pfhumu, khuye Nungungulu wathu, gima kha hi na mu diga, hi na ni vaphasi va thumago thumo wa Pfhumu, va na Aroni, ni va na Levhi, khavo va girago thumo yoyo.

¹¹Litshigu ni litshigu, vbadzimindrutunu ni silambosile, va gu ningela dzimhamba nya guvbiswe, ni guvbisa libani nya gunungele; va gu vega sibaba nya miphaselo vbamezatunu nya miphaso; va khondrisa dzikandriya nya ndralama vbamezatunu gakone matshigu yatshavbo vbasilambotunu. Kholu ethu hi ngu landrisa Nayo wa PFHUMU Nungungulu, oyu enu mu mu digidego.

¹²Wonani nya gukhenu Nungungulu a na ni ethu, thangide mbeli gumogo ni vaphasi vaye. Mipundru va wombago khya gu mi tivisani enu va na Israyeli; gasi mu si somi nyimbi mu dwana ni PFHUMU Nungungulu wa vababe vanu, kholu kha mu na dugelela.

¹³Aholu Jerobhowamo a di ruma gimbe gikwata nya masotshwa gi siyamela Vajudha gasi gu va dhumela khu hwane. Khu magirelo yoyo gidzemo nya gingi nya masotshwa gi di dhumela Vajudha khu mbeli, aholu vasiyameli va di va dhumela khu hwane.

¹⁴Va na Judha va gu khedza va di dzi wona na va randredwe khu libutho ya valala khu hwane ni mbeli gwawe. Khavbo avbo, va di lila ga PFHUMU Nungungulu, vaphasi nya mhamba va womba mipundru.

¹⁵Vama va na Judha va di womba huwa, Nungungulu a di mbembisa Jerobhowamo ni vatshavbo va na Israyeli, mbeli ga Abhiya ni va na Judha.

¹⁶Va na Israyeli va di tutuma mbeli ga Judha; Nungungulu a va ningela mandzani gwaye.

¹⁷Abhiya ni vathu vaye, va di songa vathu nya gutale ngudzu va na Israyeli, gu thega khu gumogo tengo nya livbandre mazana magumi mazana (500.000) vama nya guhathwe.

¹⁸Khu gikhati gyogyo va na Israyeli va di mbembiswa havo bhi. Va na Judha va di simama, kholu va di gu tumba Nungungulu, wa vababe vawe.

¹⁹Abhiya, a di lundra Jerobhowamo a mu dzegela madhoropa yaye, Bheteli ni mitalala yaye; Jesana ni mitalala yaye; ni Efroni ni mitalala yaye.

²⁰Matshiguni ya Abhiya, Jerobhowamo kha nga mana gambe tshivba; khu guralo, PFHUMU Nungungulu a di mu bayisa afa.

²¹Khavbo avbo, Abhiya, a di mana gukhadzisega gwadi a tiya, a dzega likhumi na vana vanyamayi, a velega navo magumavili na sivili sanana nya sikhwathana ni likhumi na livbandre na gimwegyo sanana nya vanyamahegyane.

²²Simbe sigiro sa Abhiya a si giridego, niso a ganedego, si lovidwe umo nya Libhuku nya Matimo ya muprofeti Idho.