Read gitonga 2 Dzikoronika 14 Bible Online

2 Dzikoronika 14 - gitonga bible

2 Dzikoronika 14

¹Abhiya a diya lala gumogo ni vavelegi vaye, va mu dzingide Dhoropani ga Dhavhidhe. A tshikedzwa wulangani gwaye khu mwanaye Asa, matshiguni gwaye, tigoni gu manegide gurula ndrani nya likhumi myaga.

²Asa a di gira gwatshavbo ugo gu gu gwadi ni gululama mahoni ga PFHUMU Nungungulu waye.

³Kholu a di fuvisa siluvelo nya vanungungulu nya malipha, ni malangani nya sigomo, a khungumulela madingo, a pandrelela gifananiso gya nungungulu Asitaroti.

⁴A di laya va na Judha, gukhuye va vbweta PFHUMU Nungungulu wa vababe vawe, ni gu landrisa Nayo ni sileletelo saye.

⁵Fuviside gambe madhoropani gwatshavbo gwa Judha, miphaselo ya malangani nya sigomo, sifananiso nya lidambo; ni mufumo waye wu di mana gurula gipandre nya likhumi myaga.

⁶A vbaha madhoropa nya makhokhola tigoni gwa Judha, tigoni gu diromo gurula, kholu khu myaga yoyo, gu diri mwalo dzinyimbi, PFHUMU Nungungulu a di mu ningide guhefemula.

⁷A di embela va na Judha, khuye: Hongoleni hi vbahe madhoropa yaya hi ma bhiya khu makhokhola, hi vega dzilangwe, malimba nya dzisimbi, litigo li ngari gurulani vbakari gwathu, hi vbwetide PFHUMU Nungungulu wathu; hi mu vbwetide a hi ningide guhefemula vbakari gwathu. Khavbo avbo, va di vbaha va bwelo khavbo va velegelana.

⁸Asa, a diri ni gikwata nya masotshwa nya mazana mararu magumi mazana (300.000) vama va na Judha, na va pharide sitshangu ni matshari, ni mazana mavili na livbandre na mararu magumi mazana (280.000) masotshwa ya na Bhejami, na va pharide navo sitshangu ni gu khwandra siholoma, vatshavbo vava, va diri vama nya dzindrena nya nyimbi.

⁹Khavbo avbo, Zera, nya Muetiyopi, a di soma nyimbi guta dwana navo, nari ni vathu nya guenele likhulukhulu (1.000.000) nya masotshwa, ni mazana mararu (300) dzikareta, a vboha kala Maresa.

¹⁰Khavbo avbo, Asa a di somisa nyimbi a mu khinga, vaya manana kovani ga Zefata, vbafuvbi ni Maresa.

¹¹Asa a di womba huwa a rana PFHUMU Nungungulu waye, a ganela, khuye: PFHUMU Nungungulu, vbavbandze gwago, mwalo mumbe a kodzago guphasedzela avo va gu mwalo tshivba, va gu wugedwa khavo va gu ni tshivba. Hi phase Uwe PFHUMU Nungungulu wathu, kholu ethu ha gutumba Uwe, hi somide nyimbi yeyi Linani gwago, guta dwana ni mwandra yoyu; PFHUMU Nungungulu, Uwe, khuwe Nungungulu wathu, a nga manegi muthu nya gu gupale.

¹²PFHUMU Nungungulu a di sasela Vaetiyopiya mahoni ga Asa ni ga Judha, Vaetiyopiya va thava va tutuma.

¹³Asa gumogo ni vathu vaye, va di va lundra, kala Gerari, avbo Vaetiyopiya va nga thegago nya vangi khu gufa; khu guvbeledwa khu tshivba; kholu va nga bani va gu sasedwa mbeli ga Pfhumu ni mahoni ga va na Judha; khu vbale va di phanga phango nya wungi.

¹⁴Va di sasela madhoropa yatshavbo ma nga bani mari vbafuvbi ni Gerari, kholu avo va di tade khu hwanga nya guthave PFHUMU Nungungulu, va phanga gambe madhoropa yatshavbo, kholu ma diri ni thomba nya yingi.

¹⁵Va di phanga gambe ni mavbandro nya mitshambi; va dzega dzinvuta, ni dzingameriya, va bwelela va wuya Jerusalema.